पार्थ पवार यांचा अण्णा बनसोडे यांच्या विजयासाठी आटोकाट प्रयत्न

 

पिंपरी (प्रतिनिधी): विधानसभा निवडणुकीच्या पार्श्वभूमीवर राष्ट्रवादी काँग्रेसचे युवा नेते पार्थ पवार यांनी पिंपरी-चिंचवड शहरातील विविध मान्यवरांच्या भेटी घेऊन अण्णा बनसोडे यांच्या विजयासाठी मोट बांधण्याचा प्रयत्न केला आहे.

विधान परिषद सदस्य अमित गोरखे यांच्यासह भाजपा प्रदेश कार्यकारणी सदस्य राजेश पिल्ले, ज्येष्ठ नेते नंदू कदम, प्रदेश युवा मोर्चाचे अनुप मोरे यांच्यासह अनेक माजी नगरसेवक आणि स्थानिक नेत्यांच्या कार्यालयांना भेटी देऊन त्यांच्याशी चर्चा केली.

पार्थ पवार यांनी पिंपरी विधानसभेतील सर्व प्रभागांमधील जनसंपर्क वाढवून अण्णा बनसोडे यांच्या विजयासाठी सर्वतोपरी प्रयत्न करण्याचे आवाहन केले. या भेटीदरम्यान राष्ट्रवादी काँग्रेस पार्टीचे शहर कार्याध्यक्ष फजल शेख यांच्यासह अनेक पदाधिकारी उपस्थित होते.

पिंपरी मतदारसंघातील सध्याची परिस्थिती आणि भविष्यातील कार्ययोजनेबाबत सविस्तर चर्चा करण्यात आली. राष्ट्रवादी काँग्रेस महायुतीच्या वतीने या भेटींचा सकारात्मक परिणाम होईल, असा विश्वास व्यक्त करण्यात आला आहे.