दोन कोटींच्या खंडणीसाठी कंत्राटदाराची हत्या?

खडकवासला धरणात सापडला कंत्राटदाराचा छिन्नविछिन्न मृतदेह

पुणे : पुणे शहरात एका धक्कादायक घटनेने खळबळ उडाली आहे. सिंहगड किल्ल्याच्या पायथ्याशी असलेल्या डोणजे गावचे माजी उपसरपंच आणि शासकीय कंत्राटदार विठ्ठल सखाराम पोळेकर (वय 70) यांचे अपहरण करून त्यांची निर्घृण हत्या करण्यात आली आहे. त्यांचा छिन्नविछिन्न मृतदेह खडकवासला धरणाच्या पाण्यात ओसाडे गावच्या हद्दीत आढळून आला.

पोलिसांच्या प्राथमिक तपासानुसार, गुरुवारी सकाळी सहा वाजता मॉर्निंग वॉकदरम्यान पोळेकर यांचे अपहरण करण्यात आले. या प्रकरणी कुटुंबीयांनी स्थानिक पोलीस ठाण्यात तक्रार नोंदवली होती. फिर्यादीत नमूद केल्यानुसार, भागातील कुख्यात गुंड बाबू मामे याने हे अपहरण केल्याचा संशय व्यक्त करण्यात आला आहे.

विशेष म्हणजे, काही दिवसांपूर्वी बाबू मामे याने पोळेकर यांच्या पुण्यातील कार्यालयात जाऊन जग्वार कार किंवा दोन कोटी रुपयांची खंडणी मागितली होती. या प्रकरणी पोलिसांनी जबलपूरहून एका संशयिताला ताब्यात घेतले असून, पुढील तपास सुरू आहे.

पोलीस आयुक्त कार्यालयाकडून मिळालेल्या माहितीनुसार, या गंभीर गुन्ह्याचा तपास विशेष पथकामार्फत केला जात असून, लवकरच सर्व आरोपींना अटक करण्यात येईल. शहरातील कायदा व सुव्यवस्थेची परिस्थिती नियंत्रणात असल्याचेही पोलिसांनी स्पष्ट केले आहे.