पिंपरी : पिंपरी-चिंचवड महानगरपालिकेच्या कर आकारणी आणि कर संकलन विभागाने आतापर्यंत ५०८ कोटी रुपयांचा मालमत्ता कर जमा केला आहे. पहिल्या आणि दुसऱ्या तिमाहीत दिलेल्या विविध सवलतींचा लाभ घेऊन नागरिकांनी मोठ्या प्रमाणात कर भरला आहे. तथापि, १ ऑक्टोबरपासून थकीत मालमत्ताधारकांवर २ टक्के विलंब शुल्क लागू करण्यात आले आहे. अद्याप कर न भरलेल्या मालमत्ताधारकांनी त्वरीत आपला कर भरून विलंब शुल्क टाळावे, असे आवाहन सहाय्यक आयुक्त अविनाश शिंदे यांनी केले आहे.
३.९ लाखाहून अधिक मालमत्ताधारकांनी भरला कर:
आत्तापर्यंत ६ लाख ३० हजार मालमत्ताधारकांपैकी ३ लाख ९० हजार ५७७ मालमत्ताधारकांनी ५०८ कोटी रुपयांचा कर भरला आहे. यात ३ लाख ४२ हजार १५२ निवासी मालमत्ताधारकांनी, ३२ हजार ३४४ बिगरनिवासी, ८ हजार ७११ मिश्र, २ हजार ९३७ औद्योगिक आणि २ हजार ६७० मोकळी जमीन मालमत्ता धारकांचा समावेश आहे.
महापालिकेचे आवाहन:
महापालिकेने दिलेल्या सवलतींचा लाभ घेऊन नागरिकांनी वेळेवर कर भरला आहे. तथापि, ज्या मालमत्ताधारकांनी अद्याप कराचा भरणा केलेला नाही, त्यांनी लवकरात लवकर कर भरून विलंब शुल्क टाळावे, असे आवाहन अतिरिक्त आयुक्त प्रदीप जाभंळे-पाटील यांनी केले आहे.
विलंब शुल्क लागू:
१ ऑक्टोबरपासून मालमत्ताकर न भरलेल्या मालमत्ताधारकांवर २ टक्के दरमहा विलंब शुल्क लागू करण्यात आले आहे. त्यामुळे नागरिकांनी त्वरित कर भरून शहराच्या विकासात योगदान द्यावे आणि वाढणारे विलंब शुल्क टाळावे, असे सहाय्यक आयुक्त अविनाश शिंदे यांनी स्पष्ट केले.
Reviewed by ANN news network
on
१०/१०/२०२४ ०२:१७:०० PM
Rating:
कोणत्याही टिप्पण्‍या नाहीत: