पिंपरी : पिंपरी-चिंचवड शहरात आकुर्डी खंडोबा माळ ते चिंचवड स्टेशन दरम्यानच्या रस्त्यावर निर्माण झालेल्या खड्ड्यांमुळे वाहनचालकांना तसेच सर्व नागरिकांना मोठा त्रास सहन करावा लागत आहे. ही परिस्थिती इतकी गंभीर बनली आहे की या मार्गाने जाणाऱ्या लोकांच्या जीवाला धोका निर्माण झाला आहे.
पिंपरी ते निगडी महामेट्रोच्या दुसऱ्या टप्प्याचे काम सुरू असल्यामुळे, ठेकेदारांनी आणि प्रशासनाने लावलेल्या बॅरिकेड्समुळे रस्त्याची रुंदीच कमी झाली आहे. त्यातच मुसळधार पावसामुळे या मार्गावर प्रवास करणार्यांची स्थिती सांगण्याजोगी नाही.
स्थानिक रहिवासी आणि माजी नगरसेवक मारुती भापकर यांनी पिंपरी-चिंचवड महानगरपालिकेचे आयुक्त श्री शेखर सिंह यांच्याकडे या समस्येबाबत तक्रार नोंदवली आहे. त्यांनी या रस्त्यावरील खड्डे तातडीने बुजवण्याची मागणी केली आहे. तसेच भविष्यात कोणताही मोठा अपघात होऊ नये आणि नागरिकांचे प्राण धोक्यात येऊ नयेत यासाठी योग्य ती उपाययोजना करण्याचे आवाहन केले आहे.
श्री भापकर यांनी आयुक्तांना पाठवलेल्या पत्रात स्पष्टपणे म्हटले आहे की, "या सगळ्या परिस्थितीत या ठिकाणी मोठा अपघात होऊन एखाद्या नागरिकाला आपल्या प्राणास मुकावे लागू शकते." त्यांनी आयुक्तांना विनंती केली आहे की त्यांनी स्वतः लक्ष घालून मेट्रो प्रशासन व संबंधित ठेकेदाराला कडक आदेश द्यावेत आणि या समस्येचे निराकरण युद्धपातळीवर करावे.
आपल्या शहराच्या नागरिकांमध्ये या समस्येबाबत तीव्र नाराजी व्यक्त होत असून, प्रशासनाने तातडीने कारवाई करावी अशी मागणी होत आहे. रस्त्यावरील खड्डे बुजवणे आणि वाहतूक सुरळीत करण्यासाठी योग्य ती उपाययोजना करण्याची गरज आहे, जेणेकरून नागरिकांच्या सुरक्षिततेची हमी मिळेल.
Reviewed by ANN news network
on
८/२४/२०२४ १२:५१:०० PM
Rating:
कोणत्याही टिप्पण्या नाहीत: