आळंदी : पुणे ग्रामीण पोलीस दलातील एका तरुण महिला पोलिस शिपायाने आळंदी येथील इंद्रायणी नदीत उडी मारून आत्महत्या केल्याची धक्कादायक घटना मंगळवारी संध्याकाळी घडली. ही घटना स्थानिक नागरिक आणि पोलीस दलात खळबळ उडवून देणारी ठरली आहे.
पोलिसांनी दिलेल्या माहितीनुसार, अनुष्का सुहास केदार (वय 20, रा. लक्ष्मीनारायण नगर, दिघी) या पुणे ग्रामीण पोलीस दलात शिपाई म्हणून कार्यरत होत्या. संध्याकाळी साडेपाच वाजण्याच्या सुमारास त्यांनी चाकणकडे जाणाऱ्या पुलावरील गरुड खांबापासून इंद्रायणी नदीत उडी घेतली.
ही घटना पाहणार्या एका तरुणाने अनुष्का यांना वाचवण्यासाठी नदीपात्रात उडी घेतली. मात्र, पाण्याचा प्रवाह जास्त असल्यामुळे अनुष्का वाहून गेल्या. आळंदी पोलिसांनी दिलेल्या माहितीनुसार, अग्निशमन दल सध्या त्यांचा शोध घेत आहे.
पोलीस सूत्रांनी व्यक्त केलेल्या अंदाजानुसार, अनुष्का यांनी त्यांच्या खासगी जीवनातील वैयक्तिक कारणांमुळे हे टोकाचे पाऊल उचलले असावे. मात्र, नेमके कारण अद्याप स्पष्ट झालेले नाही.
आळंदी पोलीस या प्रकरणाचा पुढील तपास करत आहेत. पुणे ग्रामीण पोलीस दलाच्या वरिष्ठ अधिकाऱ्यांनी या घटनेबद्दल शोक व्यक्त केला असून, अनुष्का यांच्या कुटुंबियांचे सांत्वन केले आहे.
या घटनेमुळे पोलीस दलातील महिला कर्मचाऱ्यांच्या मानसिक आरोग्याच्या मुद्द्यावर पुन्हा एकदा चर्चा सुरू झाली आहे. अनेक तज्ज्ञांनी पोलीस दलात कार्यरत असलेल्या महिलांसाठी विशेष समुपदेशन सेवा सुरू करण्याची मागणी केली आहे.
Reviewed by ANN news network
on
८/२६/२०२४ १२:०३:०० PM
Rating:
कोणत्याही टिप्पण्या नाहीत: