एनसीबीचे अधिकारी असल्याचे भासवून महिलेची आर्थिक फसवणूक

 

पिंपरी : आधुनिक तंत्रज्ञानाच्या युगात सायबर गुन्हेगारी नवनवीन रूपे धारण करत आहे. अशाच एका धक्कादायक प्रकरणात, स्वतःला नार्कोटिक्स विभागाचे अधिकारी म्हणवून एका महिलेची तब्बल २४ लाख ९९ हजार रुपयांची फसवणूक करणाऱ्या चार संशयितांना पिंपरी-चिंचवड सायबर सेलने यशस्वीरीत्या जेरबंद केले आहे.

स्वरूप अशोक खांबेकर (वय ४२, कोपरगाव, अहमदनगर), पुष्कर चंद्रकांत पाखले (चाळीसगाव, जळगाव), मोनिक भरतभाई रंगोलीया (सुरत),कौसिक मन्सूखभाई बोराडे (सुरत)

बाणेर येथील ३८ वर्षीय महिलेला एका अज्ञात व्यक्तीने फोन करून स्वतःला फेडेक्स कुरीअर कंपनीचा कर्मचारी असल्याचे भासवले. त्यानंतर तिच्या नावावर मुंबईहून इराणला जाणाऱ्या पार्सलमध्ये ड्रग्ज असल्याचे सांगून तिचा संपर्क कथित नार्कोटिक्स विभागाशी जोडला. या कल्पित अधिकाऱ्यांनी महिलेला विविध कारणे सांगून तिच्याकडून हळूहळू २४ लाख ९९ हजार ९९८ रुपये उकळले.

हिंजवडी पोलीस ठाण्यात दाखल झालेल्या तक्रारीनंतर पिंपरी-चिंचवड सायबर सेलने या प्रकरणाचा समांतर तपास सुरू केला. संशयितांच्या बँक खात्यांचा मागोवा घेत पोलिसांनी प्रथम अहमदनगरमधून एका संशयिताला ताब्यात घेतले. त्याच्या माहितीवरून उर्वरित तीन साथीदारांना जळगाव आणि सुरत येथून अटक करण्यात आली.

तपासात आणखी एक धक्कादायक माहिती समोर आली आहे. संशयितांनी वापरलेल्या बँक खात्यांवर दोन कोटींहून अधिक रकमेचे व्यवहार झाल्याचे आढळून आले असून, या खात्यांसंदर्भात देशभरातून ६८ तक्रारी नोंदवल्या गेल्या आहेत.

पोलिसांची कौतुकास्पद कामगिरी:

सहायक पोलीस आयुक्त विशाल हिरे यांच्या मार्गदर्शनाखाली सायबर सेलच्या निरीक्षक अनिल देवडे, सहायक निरीक्षक प्रवीण स्वामी, उपनिरीक्षक सागर पोमण यांच्यासह अनेक पोलीस कर्मचाऱ्यांनी या कारवाईत महत्त्वाची भूमिका बजावली.