पुण्यातील पौड येथे हेलिकॉप्टर कोसळले; चार जखमी

 

पुणे: पुणे जिल्ह्यातील पौड तालुक्यातील घोटवडे गावाजवळ गुरुवारी सकाळी एक खासगी हेलिकॉप्टर कोसळ्ले. यात चारजण जखमी झाले आहेत. प्राथमिक माहितीनुसार, खराब हवामान आणि मुसळधार पावसामुळे हा अपघात घडल्याचे समजते.

'ग्लोबल' कंपनीच्या मालकीचे हे हेलिकॉप्टर मुंबईहून विजयवाडाकडे जात असताना हा अपघात झाला. हेलिकॉप्टरमध्ये पायलट आणि तीन प्रवासी अशा एकूण चार व्यक्ती होत्या.

पुणे ग्रामीण पोलिसांच्या वरिष्ठ अधिकाऱ्यांनी दिलेल्या माहितीनुसार, हेलिकॉप्टरमधील सर्व प्रवासी सुखरूप आहेत. तथापि, पायलट कॅप्टन आनंद  यांना दुखापत झाली असून त्यांना तात्काळ सदर रुग्णालयात दाखल करण्यात आले आहे. इतर तीन प्रवासी - दीप भाटिया, अमरदीप सिंग आणि एसपी राम यांची प्रकृती स्थिर आहे.

घटनेची माहिती मिळताच स्थानिक नागरिकांनी घटनास्थळी धाव घेतली. पोलीस आणि प्रशासनाने तात्काळ बचाव कार्य सुरू केले. सध्या अपघाताची नेमकी कारणे शोधण्यासाठी तपास सुरू आहे.

हवामान खात्याने पुढील काही तासांसाठी परिसरात मुसळधार पावसाचा इशारा दिला असल्याने, नागरिकांना सतर्क राहण्याचे आवाहन करण्यात आले आहे. तसेच हवाई वाहतूक कंपन्यांनाही सावधगिरीचे पालन करण्यास सांगण्यात आले आहे.