उरणमध्ये तरुणीची अनेक वार करून हत्या; लव्ह जिहादचे प्रकरण असल्याची परिसरात चर्चा

 

विठ्ठल ममताबादे

उरण : नवी मुंबईतील अक्षता म्हात्रे हिच्यावर अत्याचार करून तिची हत्या घडल्याची घटना ताजी असतानाच नुकतेच उरण मध्ये एका २२ वर्षीय मुलीची निर्घृण हत्या करण्यात आली आहे. उरण शहरात एन. आय. हायस्कूलच्या जवळ राहणारी यशश्री सुरेंद्र शिंदे वय २२ ही गुरुवार दिनांक २५ जुलै रोजी सकाळी घरातून निघाली ती दुपारी दिडच्या सुमारास उरण बाजारपेठ येथे आढळून आली. मात्र त्या नंतर ती  कुठेही दिसली नाही. मुलगी घरी न आल्याने तीच्या नातेवाईकांनी तीचा शोध घेतला. मात्र ती कुठेही आढळून आली नाही. त्यानंतर मुलगी हरवली किंवा बेपत्ता झाल्याचे लक्षात येताच तीच्या कुटुंबियांनी ती हरविली असल्याची तक्रार उरण पोलीस ठाण्यात नोंदविली.तीचा शोध सुरु होता मात्र ती कुठेही सापडली नाही. 

दिनांक २६ जुलै रोजी रात्री उरण तालुक्यातील कोटनाका येथील पेट्रोलपंपानजिक तिचा मृतदेह आढळला. शवविच्छेदन झाल्यानंतर तिच्या शरीरावर अनेक वार करून तिची क्रूरतेने हत्त्या केल्याची बाब समोर आली आहे. ही घटना समजताच  २७ जुलै २रोजी सकाळी ८ वाजल्यापासून सर्वच राजकीय पक्षाचे पदाधिकारी कार्यकर्ते, विविध सामाजिक संस्था संघटनेचे प्रतिनिधी सदस्य, विविध हिंदुत्ववादी संघटनेचे पदाधिकारी सदस्य, जागरूक नागरिकांनी इंदिरा गांधी ग्रामीण शासकीय रुग्णालयामध्ये धाव घेतली. घडलेल्या घटनेचा सर्वांनीच जाहीर निषेध केला.

यशश्री शिंदे हिच्या शरीरावर इतके वार करण्यात आले होते की तिची ओळख पटणेसुद्धा अवघड झाले होते. हा प्रकार प्रेमप्रकरणातून घडला असल्याची  बाब समोर आली आहे. यशश्री शिंदे हिचा खून कोणी केला? तिचा खून कशासाठी करण्यात आला? हे प्रश्न अध्याप अनुत्तरित आहेत.  

या सर्व प्रकरणाची सखोल चौकशी उरण पोलीस ठाण्याचे वरिष्ठ निरीक्षक राजेंद्र पाटील व त्यांचे सहकारी करीत आहेत. उरण मध्ये लव्ह जिहादची अनेक प्रकरणे समोर येत असून या अशा प्रकरणात पोलीस प्रशासनाने त्वरित ऍक्शन  घेउन कडक कारवाई करावी अशी मागणी जनतेने केली आहे. 

यशश्री शिंदेच्या बाबतीत घडलेली घटना अत्यंत क्रूर व मानव जातील काळिमा फासणारी घटना असल्याने सदर दोषी व्यक्तीला त्वरित अट्क करण्यात यावी व त्याच्यावर कठोर कारवाई करावी अशी मागणी यशश्रीच्या कुटुंबियांनी व संतप्त झालेल्या नागरिकांनी केली आहे.

आरोपीचा शोध सुरु असून त्या अनुषंगाने तपास सुरु आहे. दोषी व्यक्तीवर कठोरात कठोर कारवाई करण्यात येईल. व यशश्री शिंदे हिच्या कुटुंबियांना न्याय मिळवून देऊ असे आश्वासन उरण पोलीस ठाण्याचे वरिष्ठ निरीक्षक राजेंद्र पाटील यांनी दिले. या निंदनीय कृत्याचे सोशल मीडियावर पडसाद उमटले असून सोशल मीडियावर नागरिकांनी मोठया प्रमाणात निषेध व्यक्त केला आहे. तर उरण मधील व्यापारांनी आपली दुकाने बंद ठेवून निषेध व्यक्त केला आहे.