१ कोटी ८ लाख रोख, ७२ लाखांचे सोने, साडेचार लाखांची चांदी आणि स्थावर मालमत्तेची कागदपत्रे जप्त
बीड : बीड येथील अ‍ॅन्टीकरप्शन ब्युरोच्या पथकाने बीड पोलीस अधीक्षक कार्यालयातील आर्थिक गुन्हे अन्वेषण शाखेत नोकरी करत असलेल्या एका पोलीस निरीक्षकासाठी पाच लाख रुपयांची लाच स्वीकारताना एका खासगी व्यक्तीस १५ मे रोजी 'रंगेहाथ' पकडले. मात्र, ज्याच्यासाठी लाच स्वीकारली तो पोलीस निरीक्षक आणि त्याला प्रोत्साहन देणारा फौजदार फरार झाले आहेत. या दोघांच्या घराची झडती अ‍ॅन्टीकरप्शन ब्युरोच्या पथकाने घेतली असता मोठ्या प्रमाणावर रोख रक्कम, दागदागिने, स्थावर मालमत्तेची कागदपत्रे पथकाला सापडली आहेत.
कुशल प्रवीण जैन, वय २९ वर्षे, रा. मंत्री कॉलनी, बीड असे लाच स्वीकारणार्‍याचे नाव आहे. तर हरिभाऊ खाडे, वय ५२ वर्षे, रा. चाणक्यपुरी, बीड असे पोलीस निरीक्षकाचे नाव आहे. रविभूषण जाधवर, वय ४६, रा. आनंदनगर, बीड असे सहायक पोलीस फौजदाराचे नाव आहे. खाडे आणि जाधवर हे दोघेही फरार आहेत.
गतवर्षी बीडमधील जिजाऊ मल्टिस्टेट पतसंस्थेत १०० कोटी रुपयांच्या घोटाळा झाला होता. त्या प्रकरणी पतसंस्थेचे प्रमुख बबन शिंदे,अध्यक्षा अनिता शिंदे, व्यवस्थापक सुनीता वांढरे व इतरांवर एकूण ४ गुन्हे दाखल झाले आहेत. या प्रकरणातील अनिता शिंदे अटकेत असून इतर आरोपी फरार आहेत. या प्रकरणाचा तपास हरिभाऊ खाडे याच्याकडे होता.फरार आरोपींपैकी बबन शिंदे याने दोन व्यावसायिकांना बांधकामाचे साहित्य पुरविल्याचे बिल म्हणून ६० लाख रुपये दिले होते.या दोन्ही व्यावसायिकांना पतसंस्था घोटाळा प्रकरणात आरोपी करण्याची भीती दाखवून खाडे याने दोघांकडे प्रत्येकी ५० लाख अशी एकूण १ कोटी रुपयांची लाच मागितली होती. तडजोडीअंती ३० लाख रुपये घेण्याचे मान्य केले होते.
या प्रकरणातील लाचेचा पहिला हप्ता ५ लाख रुपये कुशल जैन याच्याकडे देण्यास खाडे याने त्या व्यावसायिकांना सांगितले होते. दरम्यान त्या व्यावसायिकांनी अ‍ॅन्टीकप्शनच्या बीड येथील कार्यालयाकडे तक्रार केली.अ‍ॅन्टीकप्शनच्या अधिकार्‍यांनी पडताळणी करून सापळा लावला, आणि १५ मे रोजी ५ लाख रुपये लाच घेताना जैन याला 'रंगेहाथ' पकडले. त्याला पकडल्याचे कळताच हरिभाऊ खाडे आणि रविभूषण जाधवर हे दोघे फरार झाले.
अ‍ॅन्टीकप्शनच्या अधिकार्‍यांनी न्यायालयाच्या परवानगीने खाडे आणि जाधवर यांच्या घराची झडती घेतली. यावेळी खाडे याच्या घरात १ कोटी ८ लाख रुपये रोख, ७२ लाख रुपयांचे ९७० ग्रॅम सोने, ४ लाख ६२ हजार रुपयांची साडेपाच किलो चांदी असे एकूण १ कोटी ८५ लाख रुपयांचे घबाड जप्त केले आहे. खाडे याच्या नावावर बारामती, इंदापूरमध्ये असलेले फ्लॅट, इंदापूरमधील व्यापारी गाळा, तसेच बारामती व परळीतील फ्लॅटची कागदपत्रे अ‍ॅन्टीकप्शनच्या पथकाच्या हाती लागली आहेत.
रविभूषण जाधवर याच्या घरातून १५ हजार रुपये रोख आणि २५ तोळे सोने जप्त करण्यात आले आहे.
Reviewed by ANN news network
on
५/१७/२०२४ ०१:३९:०० PM
Rating:
कोणत्याही टिप्पण्‍या नाहीत: