लष्करात नोकरी लावण्याचे आमिष दाखवून फसवणूक करणारा सराईत अटकेत

 

पुणे : लष्करात नोकरी लावतो असे आमिष दाखवून लोकांची आर्थिक फसवणूक करणार्‍या एका सराईताला तो नेपाळमध्ये पळून जाण्याच्या तयारीत असतानाच कोंढवा पोलिसांनी अटक केली आहे. हा ठकसेन पूर्वी लष्कराच्या सदर्न कमांडमध्ये ड्रायव्हर म्हणून काम करत होता.

गणेश बाबुलाल परदेशी रा.कृष्ण केवल सोसायटी, एन.आय.बी.एम.रोड कोंढवा खुर्द, पुणे असे या आरोपीचे नाव आहे. त्याने एका व्यक्तीला त्याच्या मुलीना लष्करात सिव्हिलियन म्हणून नोकरी लावतो असे आश्वासन देत त्याच्याकडून ८ लाख ३२ हजार रुपये उकळले होते.

फसवणूक झाल्याचे लक्षात येताच त्या व्यक्तीने कोंढवा पोलीसठाण्यात तक्रार नोंदविली होती. त्या अनुषंगाने परदेशी याच्यावर ११८९/२०२४ क्रमांकाने भारतीय दंडविधान कलम ४०६,४२०,४६४(अ),४६५,४६८ प्रमाणे गुन्हा दाखल करण्यात आला होता. गुन्हा दाखल होताच परदेशी हा अन्यत्र राहण्यास गेला. त्याने आपले मोबाईल नंबरही बदलले होते.

या प्रकरणाचा तपास कोंढवा पोलीस करत असताना त्यांना हा आरोपी एन. आय. बी. एम. रोड साळुंखेविहार येथील महालक्ष्मी स्टेशनरी सेंटर येथे आला असल्याची माहिती मिळाली. पोलीस पथकाने तात्काळ त्याला तेथे जाऊन अटक केली.

त्याने आणखीही काही व्यक्तींची फसवणूक केली असल्याचे, तसेच तो नेपाळ येथे पळून जाण्याच्या तयारीत होता असे पोलिसांना समजले आहे.अधिक तपास उपनिरीक्षक वैभव सोनवणे करत आहेत.

ही कामगिरी अपर आयुक्त,पूर्व प्रादेशिक विभाग, पुणे शहर मनोज पाटील, उपआयुक्त परि. ५, आर. राजा,सहायक आयुक्त, वानवडी विभाग, गणेश इंगळे, वरिष्ठ निरीक्षक, संतोष सोनवणे, निरीक्षक (गुन्हे) मानसिंग पाटील, यांच्या मार्गदर्शनाखाली सहायक निरीक्षक लेखाजी शिंदे, दिनेश पाटील,उपनिरीक्षक, वैभव सोनवणे अंमलदार अमोल हिरवे, राहुल वंजारी, अभिजीत रत्नपारखी, शशांक खाडे विकास मरगळे, राहुल थोरात, सुहास मोरे, जयदेव भोसले, अभिजीत जाधव, आशिष गरुड, रोहित पाटील, अक्षय शेंडगे यांनी केली.