८१.५ कोटी भारतीयांचा पर्सनल डेटा हॅक; डार्कवेबवर विक्रीसाठी उपलब्ध!

 

नवी दिल्ली : ८१.५ दशलक्ष भारतीय वापरकर्त्यांचा संवेदनशील वैयक्तिक डेटा हॅक झाला आहे चोरी झालेल्या माहितीमध्ये आधार आणि पासपोर्ट तपशील, नावे, फोन नंबर आणि तात्पुरते आणि कायमचे पत्ते यांचा समावेश आहे. भारतीय वैद्यकीय संशोधन परिषदेने (ICMR) कोविड-१९ चाचणी दरम्यान गोळा केलेली ही माहितीे आहे.

ही भारताच्या इतिहासातील सर्वात मोठी डेटा चोरी आहे. ‘pwn0001’ या हॅकरने ही चोरलेली माहिती विकण्यासाठी डार्क वेबवर जाहिरात केली होती. हॅकरने चोरलेल्या माहितीमध्ये लाखो भारतीयांची नावे, फोन नंबर आणि तात्पुरते आणि कायमचे पत्ते यासह आधार आणि पासपोर्ट तपशीलांचा समावेश आहे.

सर्वप्रथम ही बाब रेसिक्युरिटी या अमेरिकन एजन्सीने उजेडात आणली. सायबर सुरक्षा संशोधकांनी शोधून काढले आहे की लीक झालेल्या डेटामध्ये भारतीय नागरिकांच्या वैयक्तिक तपशीलांसह १ लाख फायली होत्या. त्यांची अचूकता तपासण्यासाठी, यापैकी काही नोंदी सरकारी पोर्टलच्या "आधार सत्यापित करा" वैशिष्ट्याचा वापर करून तपासण्यात आल्या. आधार पोर्टलने ती माहिती प्रमाणित केली.

भारताच्या कॉम्प्युटर इमर्जन्सी रिस्पॉन्स टीमने (सीईआरटी-इन) आयसीएमआरला या उल्लंघनाबद्दल सतर्क केले आहे. कोविड-19 चाचणीची माहिती नॅशनल इन्फॉर्मेटिक्स सेंटर (NIC), ICMR आणि आरोग्य मंत्रालय यांसारख्या विविध सरकारी संस्थांमध्ये विखुरलेली आहे, ज्यामुळे उल्लंघन कोठून झाले हे ओळखणे आव्हानात्मक बनले आहे. या वर्षाच्या सुरुवातीला, सायबर गुन्हेगारांनी (भारतीय आयुर्विद्न्यान संस्थेचे (AIIMS) सर्व्हर हॅक केले होते; आणि मोठ्या खंडणीची मागणी करत संस्थेतील १ टेराबाईट पेक्षा जास्त डेटा ताब्यात घेतला होता. त्या अगोदर काही महिने डिसेंबर २०२२ मध्ये एम्स दिल्लीचा डेटा चिनी लोकांनी हॅक केला होता आणि क्रिप्टोकरन्सीमध्ये २०० कोटी रुपयांची मागणी केली होती.