येरवडा मध्यवर्ती कारागृहात ‘दिवाळी पहाट’चे आयोजन

 

पुणे : अपर पोलीस महासंचालक तथा कारागृह व सुधारसेवा महानिरीक्षक अमिताभ गुप्ता यांच्या संकल्पनेतून येरवडा मध्यवर्ती कारागृह येथे दिवाळी पहाट कार्यक्रमाचे आयोजन करण्यात आले.

कार्यक्रमाला कारागृह व सुधारसेवा विशेष पोलीस महानिरीक्षक डॉ.जालिंदर सुपेकर, पश्चिम विभागाच्या कारागृह उपमहानिरीक्षक स्वाती साठे, अधीक्षक सुनिल ढमाळ, उपअधीक्षक बी.एन.ढोले आदी उपस्थित होते.

यावेळी बंदी कलाकरांनी सांस्कृतिक कार्यक्रम सादर केले. अभंग व मराठी भावगितांनी कार्यक्रमाची रंगत वाढविली. बंदीजनांना यावेळी  दिवाळी फराळ देण्यात आला. श्री.गुप्ता यांनी बंदीजनांना दिवाळीच्या शुभेच्छा दिल्या. यावेळी कारागृह अधिकारी व कर्मचाऱ्यांसाठीही दिवाळी फराळाचे आयोजन करण्यात आले. 

मध्यवर्ती कारागृहात अंगणवाडी बगीचा कामाचा शुभारंभ

येरवडा मध्यवर्ती कारागृहात ‘नन्हे कदम’ बालवाडीची संरक्षक भींत व बगीचा कामाचा शुभारंभ सिबेज कंपनीच्या रितु नथानी यांच्या हस्ते करण्यात आला. यावेळी कारागृह अधीक्षक सुनिल ढमाळ यांच्यासह कारागृहतील इतर अधिकारी, कार्पेडीअम कंपनीच्या मिनौती मरिन आणि सिबेजचे कर्मचारी उपस्थित होते.