म्युल अकाऊंटद्वारे देशभरातील १९ नागरिकांची १ कोटी ८० लाखांची फसवणूक; आंतरराज्य सायबर भामट्यांच्या टोळीचा पर्दाफाश

पुणे: इतरांच्या नावावर बनावट आणि म्युल (Mule Account) बँक खाती उघडून देशाभरातील नागरिकांची १ कोटी ८० लाख १५ हजार ७९५ रुपयांची ऑनलाईन फसवणूक करणाऱ्या टोळीचा वानवडी पोलिसांनी पर्दाफाश केला आहे. या प्रकरणात मुख्य सूत्रधारासह एकूण ५ जणांना अटक करण्यात आली आहे. महाराष्ट्र सायबर, मुंबई यांच्याकडून प्राप्त झालेल्या मनी ट्रेल आणि एटीएम विड्रॉलच्या डेटा विश्लेषणावरून ही मोठी कारवाई करण्यात आली.

वानवडी पोलीस ठाण्यात गुन्हा रजि. क्र. ३४३/२०२६ नुसार भारतीय न्याय संहिता कलम ११२ (२), ६१ (२), ३१८ (४), ३ (५) सह माहिती तंत्रज्ञान कायदा (IT Act) कलम ६६ (डी) अन्वये गुन्हा दाखल करण्यात आला आहे.

 
कसा उघडकीस आला सायबर घोटाळा?

महाराष्ट्र सायबर कार्यालयाकडून म्युल बँक खाती आणि चेक अथवा एटीएमद्वारे झालेल्या संशयास्पद रोख रक्कमेच्या व्यवहारांची माहिती पुणे पोलिसांना प्राप्त झाली होती. या तपासादरम्यान वानवडी पोलीस ठाण्याच्या पथकाने संशयित आरोपींचा शोध घेऊन त्यांची कसून चौकशी केली.

अटक करण्यात आलेल्या आरोपींची नावे पुढीलप्रमाणे आहेत: १) श्रवण राजेंद्र अंकूशे (वय २५, रा. देवाची उंड्री, पुणे - मुख्य सूत्रधार) २) हरीओम हरीराम साहू (वय २४, रा. साळुंके विहार रोड, पुणे) ३) सौद इदफान शेख (वय २३, रा. येरवडा, पुणे) ४) साहील रौफ शेख (वय २५, रा. येरवडा, पुणे) ५) तालीब नुरमोहम्मद शेख (वय २५, रा. येरवडा, पुणे)

 
गुन्ह्याची पद्धत (Modus Operandi)

पोलिसांनी दिलेल्या माहितीनुसार, या टोळीचा मुख्य सूत्रधार श्रवण अंकुशे याने त्याचा हस्तक हरीओम साहू याला सायबर फसवणुकीचे पैसे वळवण्यासाठी विविध व्यक्तींची बँक खाती आणि केवायसी (KYC) कागदपत्रे मिळवण्यास सांगितले होते. या कामासाठी श्रवण हा हरीओमला प्रत्येक खात्यामागे ३००० रुपये कमिशन देत असे.

हरीओम साहू याने त्याच्या परिचयातील सौद शेख, साहील शेख, तालीब शेख आणि उबेद शेख यांना गाठले. त्यांच्या नावावर विविध बँकांमध्ये खाती उघडून ती वापरण्यास दिल्यास प्रत्येक खात्यामागे ५००० रुपये देण्याचे आमिष दाखवण्यात आले. या आमिषाला बळी पडून आरोपींनी स्वतःच्या नावावर खाती उघडून ती श्रवण अंकुशे याच्या हवाली केली. त्यानंतर श्रवणने या खात्यांचा वापर करून ऑनलाईन फ्रॉडचे पैसे स्वीकारले.

 
१९ नागरिकांची फसवणूक; १.८० कोटी जमा

तपासादरम्यान या बनावट खात्यांवर देशभरातील तब्बल १९ नागरिकांची १ कोटी ८० लाख १५ हजार ७९५ रुपयांची फसवणूक करून जमा झालेली रक्कम वळवण्यात आल्याचे स्पष्ट झाले. सर्व आरोपींचा गुन्ह्यात थेट सहभाग निष्पन्न झाल्याने त्यांना २८ ऑगस्ट २०२६ रोजी रात्री १०:३० वाजता रीतसर अटक करण्यात आली.

ही कारवाई अपर आयुक्त (पूर्व प्रादेशिक विभाग) मनोज पाटील, उपआयुक्त (परिमंडळ-५) राजलक्ष्मी शिवणकर आणि सहायक आयुक्त (वानवडी विभाग) रामदास इंगवले यांच्या मार्गदर्शनाखाली करण्यात आली. या कारवाईत वरिष्ठ निरीक्षक पंडीत रेजितवाड, निरीक्षक (गुन्हे) कैलास डाबेराव, उपनिरीक्षक शेखर मोकाटे, समाधान उगले आणि अंमलदार गणेश आगम, अमोल पिलाणे, प्रमोद टिळेकर, विनोद शिवले, दया शेगर, आशिष कांबळे, दिपक क्षिरसागर, विठ्ठल चोरमले, बालाजी वाघमारे, अभि चव्हाण, गोपाळ मदने, विष्णू सुतार तसेच महिला  अंमलदार चैत्राली यादव व रुपाली दिवटे यांनी महत्त्वाची भूमिका बजावली.

• Labels: Pune Cyber Crime, Wanawadi Police Station, Online Fraud Pune, Mule Bank Accounts, Manoj Patil IPS, Pune News

• Search Description: Wanawadi police in Pune busted a major cyber fraud gang using mule bank accounts to scam 19 citizens across India of Rs 1.80 crore. 5 arrested.

• Hashtags: #PuneCyberCrime #WanawadiPolice #CyberCrime #MuleAccountFraud #PuneNews #CrimeNews