उरण ते शिर्डी पदयात्रेचे उत्साहात प्रस्थान; ॐ श्री साईराम पदयात्रा मंडळाचे २६ वे वर्ष

उरण: भक्तांना श्रद्धा आणि सबुरीचा संदेश देणारे संत साईबाबा यांच्या चरणी लीन होण्यासाठी उरण ते शिर्डी पदयात्रेचे आयोजन करण्यात आले आहे. ॐ श्री साईराम पदयात्रा मंडळ, उरण यांच्या वतीने आयोजित या पदयात्रेचे हे सलग २६ वे वर्ष असून रविवार, २५ ऑक्टोबर रोजी उरण येथील अंबिकावाडी येथून ही दिंडी शिर्डीकडे रवाना झाली. पालखी, सुसज्ज साई रथ, वाद्यवृंद आणि टाळ-मृदंगाच्या गजरात साई भक्तांनी शिर्डीच्या दिशेने पायी वाटचाल सुरू केली आहे.

उरण तालुक्यात साईबाबांना मानणारा मोठा वर्ग असून येथे अनेक साई मंदिरे आहेत. या मंदिरांमध्ये नियमित पूजा, आरती व भजन चालते. अशातच ॐ श्री साईराम पदयात्रा मंडळाचे विश्वस्त जनार्दन घरत यांनी गेली २५ वर्षे अखंडपणे अंबिकावाडी उरण ते शिर्डी पदयात्रेची परंपरा कायम ठेवली आहे. यंदा या पदयात्रेचे २६ वे वर्ष साजरे होत आहे. ही पदयात्रा उरणहून निघून २ नोव्हेंबर रोजी शिर्डी येथे पोहोचेल. त्यानंतर गुरुवार, ७ नोव्हेंबर रोजी सायंकाळी ५ ते रात्री १० या वेळेत साई मंदिर अंबिकावाडी, नागाव-उरण येथे महाप्रसाद अर्थात भव्य साई भंडाऱ्याचे आयोजन करण्यात आले आहे.

पदयात्रेदरम्यान भक्तांसाठी दैनंदिन धार्मिक कार्यक्रमांची आखणी करण्यात आली आहे. यात दररोज पहाटे ४ वाजता चरण पादुका व पालखी पूजन, काकड आरती आणि पुढील प्रस्थान; दुपारी १२ वाजता मध्यान्ह आरती व साई चरित्र अध्याय पारायण; दुपारी ३ वाजता ‘ॐ श्री साईनाथाय नमः’ नामजप करून पुढील प्रवास आणि सायंकाळी ६:३० वाजता धूप आरतीसह भजन, कीर्तन, भारुड व प्रवचन अशा भरगच्च कार्यक्रमांचा समावेश आहे.

सदर पदयात्रा यशस्वी करण्यासाठी अध्यक्ष संदीप ठाकूर, उपाध्यक्ष लक्ष्मीकांत पाटील, सचिव विजय घरत, उपसचिव गणेश पाटील, खजिनदार हिम्मत पाटील, पालखी प्रमुख उमेश भोईर, खानपान व्यवस्थापक निशा शांताराम घरत, शांता संजय भोईर, महिला हरिपाठ मंडळाच्या प्रमिला घरत, नयना नाईक, निराबाई घरत, सल्लागार जनार्दन घरत, बळीराम गायकवाड, हरि नाईक यांच्यासह सर्व पदयात्री, कारसेवक आणि साईभक्त परिश्रम घेत आहेत.

- Labels: Uran News, Shirdi Padyatra, Sai Baba Devotees, Raigad News, Maharashtra Pilgrimage, Religious News, Ambikawadi Uran, Sai Palkhi Sohala

- Search Description: The 26th annual Uran to Shirdi Padyatra by Om Shree Sai Ram Mandal commenced from Ambikawadi with grand religious fervor and Sai Palkhi.

- Hashtags: #UranNews #ShirdiPadyatra #SaiBaba #Raigad #Pilgrimage #SaiPalkhi #MaharashtraNews #AstraNews