अडीच किलो मेफेड्रॉन आणि ५६६ ग्रॅम कोकेन जप्त; कुख्यात नायजेरियन तस्कराला बेड्या

नवी मुंबई: नवी मुंबई पोलीस आयुक्तालय क्षेत्रात अमली पदार्थांच्या व्यापाराविरुद्ध राबवण्यात येत असलेल्या विशेष मोहिमेत पोलिसांच्या अंमली पदार्थ विरोधी पथकाने एका कुख्यात नायजेरियन तस्कराला जेरबंद केले आहे. त्याच्याकडून तब्बल ३ कोटी ५७ लाख ९१ हजार २०० रुपये किमतीचे अडीच किलोहून अधिक मेफेड्रॉन (MD) आणि कोकेन हे घातक अमली पदार्थ जप्त करण्यात आले आहेत. अॅनी इकेच्युक्वु डार्लीग्टन (वय ४१, रा. नायजेरिया, सध्या रा. अंबिका बिल्डींग, रोहींजण गाव, तळोजा) असे अटक करण्यात आलेल्या परदेशी आरोपीचे नाव आहे.

दिनांक ८ ऑक्टोबर २०२६ रोजी नवी मुंबईच्या अंमली पदार्थ विरोधी कक्षाचे वरिष्ठ पोलीस निरीक्षक संदीप निगडे यांना मिळालेल्या खात्रीशीर बातमीच्या आधारे तळोजा येथील रोहींजण गावात सापळा रचण्यात आला.

 
घराच्या झडतीत कोटींचा अमली साठा हस्तगत

पोलिसांनी संशयित परदेशी नागरिक अॅनी इकेच्युक्वु डार्लीग्टन याला ताब्यात घेऊन त्याची झडती घेतली असता, त्याच्याकडे ६ लाख ६३ हजार रुपये किमतीचा २२१ ग्रॅम मेफेड्रॉन हा अमली पदार्थ मिळून आला. त्यानंतर पोलिसांनी त्याच्या घराची सखोल झडती घेतली असता, तेथे आणखी ६८ लाख २८ हजार ५०० रुपये किमतीचा २२७६ ग्रॅम मेफेड्रॉन आणि तब्बल २ कोटी ८३ लाख रुपये किमतीचा ५६६ ग्रॅम कोकेन असा प्रचंड साठा सापडला. अमली पदार्थांच्या खरेदी-विक्रीसाठी वापरले जाणारे इतर साहित्य व उपकरणांसह एकूण ३ कोटी ५७ लाख ९१ हजार २०० रुपयांचा मुद्देमाल जप्त करण्यात आला आहे.

या प्रकरणी तळोजा पोलीस ठाण्यात एनडीपीएस कायदा (NDPS Act) कलम ८ (क), २९ आणि २१ (६) अन्वये गुन्हा नोंदवण्यात आला असून, आरोपीला दिनांक ८ ऑक्टोबर २०२६ रोजी रात्री २१:३० वाजता अधिकृतपणे अटक करण्यात आली आहे. प्राथमिक तपासात असे समोर आले आहे की, यापूर्वीही या आरोपीविरुद्ध एनसीबी मुंबई (NCB Mumbai) कार्यालयामार्फत एनडीपीएस कायद्यांतर्गत गुन्हा दाखल करण्यात आला होता. त्या खटल्यात तो तब्बल ७ वर्षे कारागृहात होता आणि २०२५ मध्येच त्याची जामिनावर सुटका झाली होती.

 
नवी मुंबई पोलिसांची कठोर पावले

नवी मुंबई पोलीस आयुक्तालयाकडून अमली पदार्थांच्या बेकायदेशीर तस्करीवर नियंत्रण मिळवण्यासाठी सातत्याने कठोर कारवाया केल्या जात आहेत. या अवैध व्यापाराशी निगडित दोन टोळ्यांवर मोक्का (MCOCA) कायद्यांतर्गत तर एका पुरुष व एका महिला आरोपीविरुद्ध पिट एनडीपीएस (PIT NDPS) कायद्यान्वय स्थानबद्धतेची कारवाई करण्यात आली आहे. मागील पाच वर्षांच्या कालावधीत नवी मुंबई पोलिसांनी २,३८७ गुन्हे दाखल करून तब्बल ३,२०० आरोपींना बेड्या ठोकल्या आहेत. या मोहिमेत एकूण १,०७८ किलो वजनाचे अंदाजे १५० कोटी रुपये किमतीचे अमली पदार्थ जप्त करण्यात आले आहेत. अमली पदार्थांविषयी कोणतीही गोपनीय माहिती नागरिकांना द्यायची असल्यास त्यांनी ८८२८११२११२ या पोलिसांच्या हेल्पलाईन क्रमांकावर संपर्क साधावा, असे आवाहन करण्यात आले आहे.

सदरची कारवाई आर्थिक गुन्हे शाखेचे सहायक आयुक्त विशाल हिरे यांच्या मार्गदर्शनाखाली अंमली पदार्थ विरोधी कक्षाचे वरिष्ठ निरीक्षक संदीप निगडे, सहायक निरीक्षक निलेश धुमाळ, तुषार माने, गणेश पाटील, हवालदार रमेश तायडे, अंकुश म्हात्रे, शिपाई ज्ञानेश्वर चव्हाण, सुदाम पालवे, प्रशांत खिल्लारे, एकनाथ पारधी, सचिन राठोड, हवालदार सुरेखा दळवी, हेमांगी पाटील आणि चालक हवालदार पाटील यांच्या पथकाने पार पाडली आहे.

• Labels: Navi Mumbai Police, Drug Bust, Mephedrone Seizure, Cocaine, Taloja Crime News, Nigerian National Arrested, NDPS Act

• Search Description: Navi Mumbai Anti-Narcotics Cell arrested a Nigerian national in Taloja, seizing 2.5 kg of Mephedrone and 566g of cocaine worth Rs 3.57 crore.

• Hashtags: #NaviMumbaiPolice #DrugBust #AntiNarcotics #Mephedrone #CocaineSeizure #TalojaCrime #CrimeNews