राहुल गांधींच्या दिल्लीतील आंदोलनासाठी सक्तीने गर्दी जमवली जात असल्याचा भाजपचा दावा

 

 मुंबई: दिल्लीत सुरू असलेल्या राहुल गांधी यांच्या आंदोलनाला उपस्थित राहण्यासाठी युवक काँग्रेसच्या पदाधिकाऱ्यांवर दबाव टाकला जात असल्याचा खळबळजनक प्रकार समोर आला आहे. युवक काँग्रेसच्या सर्व पदाधिकाऱ्यांनी तातडीने दिल्लीत दाखल व्हावे, अन्यथा निलंबनाची कारवाई करत भविष्यात कोणतीही निवडणूक लढू दिली जाणार नाही, अशी धमकी युवक काँग्रेसचे सरचिटणीस आणि महाराष्ट्र प्रदेश प्रभारी अजय चिकारा देत असल्याचा दावा भारतीय जनता पक्षाने केला आहे. याबाबतची एक कथित ध्वनीफीत सादर करत भाजपा प्रदेश मुख्य प्रवक्ते नवनाथ बन यांनी काँग्रेस पक्षाच्या अंतर्गत राजकारणावर तीव्र शब्दांत ताशेरे ओढले आहेत. मुंबईतील भाजपा प्रदेश कार्यालयात पार पडलेल्या पत्रकार परिषदेत ते बोलत होते.

राहुल गांधी यांच्या नेतृत्वाखालील काँग्रेस पक्षात कशा पद्धतीने हुकूमशाही चालते, याचे हे उत्तम उदाहरण असल्याचा दावा नवनाथ बन यांनी केला. ते म्हणाले की, राहुल गांधी यांना जर एखादे आंदोलन किंवा चळवळ उभी करायची असेल, तर त्यांनी ती नक्की करावी; परंतु त्यासाठी पक्षाकडे आवश्यक ते सामर्थ्य आणि कर्तृत्व उरलेले नाही. हा रविवारचा ऑडिओ असल्याचा दावा करत, तुम्ही ज्या शहरात असाल तेथून तातडीने सोडून सोमवारी दिल्लीत हजर व्हा, अशा प्रकारचे हुकूमशाही आदेश महाराष्ट्रातील पदाधिकाऱ्यांना दिले जात आहेत. याच दबावापोटी कदाचित काही नेत्यांना आपले आंदोलन अर्धवट सोडून दिल्ली गाठावी लागली असावी, असा संशयही त्यांनी व्यक्त केला. हा अत्यंत गंभीर प्रकार असून यावर राहुल गांधी यांनी स्वतः स्पष्टीकरण दिले पाहिजे, अशी मागणी त्यांनी केली.

काँग्रेसमधील हुकूमशाही आणि राजकीय षडयंत्राचा आरोप

एका बाजूला देशात हुकूमशाही सुरू असल्याचा आरोप काँग्रेस पक्षाकडून केला जातो, मात्र प्रत्यक्षात त्यांच्या स्वतःच्या पक्षातच कशा प्रकारे हुकूमशाही पद्धतीने कारभार चालतो, याची ऑडिओ आणि व्हिडिओ क्लिप आता पुराव्यानिशी समोर आली आहे, असे बन यांनी नमूद केले. राहुल गांधी यांना पुन्हा राजकारणात प्रस्थापित करण्यासाठी अशा धमक्यांचा वापर करून हुकूमशाही प्रवृत्ती बळकट केली जात आहे का, असा सवाल त्यांनी उपस्थित केला. ही हुकूमशाही काँग्रेसचे इतर नेते कशी सहन करत आहेत, असा प्रश्नही त्यांनी विचारला.

देशात अराजकता निर्माण करून नेपाळ, बांगलादेश किंवा श्रीलंकेसारखी परिस्थिती निर्माण करण्याचा राहुल गांधी यांचा प्लॅन तर नाही ना, असा सवाल करत महाराष्ट्राप्रमाणेच कर्नाटक, हिमाचल प्रदेश आणि उत्तर प्रदेशातही युवक काँग्रेसच्या कार्यकर्त्यांवर असाच दबाव टाकला जात असल्याची शक्यता त्यांनी वर्तवली. आंदोलनाला पुरेशी गर्दी मिळत नसल्यामुळे पदाधिकाऱ्यांना धमकावून बोलवावे लागत असल्याची केविलवाणी अवस्था आज काँग्रेसची झाली आहे, अशी टीका त्यांनी केली. राहुल गांधी सर्वोच्च न्यायालयाच्या भूमिकेविरोधात आंदोलन करत असून, त्यांचा न्यायव्यवस्था, निवडणूक आयोग आणि भारतीय संविधानावर विश्वास नसल्याचा आरोप त्यांनी केला. जनतेचा पाठिंबा यापूर्वीही नव्हता आणि आगामी काळातही मिळणार नाही, असे ते म्हणाले.

पुण्यातील एमपीएससी आंदोलनावर भाष्य

याच पत्रकार परिषदेत बोलताना नवनाथ बन यांनी पुण्यात गाजेलेल्या एमपीएससी विद्यार्थ्यांच्या आंदोलनावरही भाष्य केले. मंत्री शिवेंद्रराजे भोसले यांनी विद्यार्थ्यांची भेट घेतल्यानंतर हे आंदोलन मागे घेण्यात आले. विवेक भीमनवार हे एमपीएससीचे अध्यक्ष असताना कोणतीही पेपरफुटीची घटना घडली नव्हती, तरीही त्यांनी स्वतःहून नैतिक जबाबदारी स्वीकारत रजेवर जाण्याचा घेतलेला निर्णय स्वागतार्ह असल्याचे सांगत त्यांनी भीमनवार यांचे आभार मानले. राज्य सरकार आणि मुख्यमंत्री देवेंद्र फडणवीस यांनी पहिल्या दिवसापासून विद्यार्थ्यांच्या पाठीशी उभे राहत त्यांच्या सर्व मागण्या मान्य केल्या होत्या, तरीही या आंदोलनाला दुर्दैवाने राजकीय वळण देण्याचा प्रयत्न झाला, अशी प्रतिक्रिया त्यांनी दिली.

• Labels: Navnath Ban, BJP Maharashtra, Youth Congress, Rahul Delhi Protest, MPSC Protest, Ajaj Chikara Audio, Pune News

• Search Description: BJP Chief Spokesperson Navnath Ban exposed Congress for allegedly threatening Youth Congress office bearers to join Rahul Gandhis Delhi protest using strict disciplinary actions.

• Hashtags: #NavnathBan #BJP #YouthCongress #RahulGandhi #DelhiProtest #MPSC #PoliticalNews #MaharashtraNews