एमपीएससी आंदोलनातून रोहित पवारांचे नेतृत्व पुढे आणण्याचा डाव : भाजप प्रवक्ते नवनाथ बन

मुंबई: महाराष्ट्र लोकसेवा आयोगाच्या (एमपीएससी) विद्यार्थ्यांच्या विविध मागण्यांसाठी पुण्यात सुरू असलेले आंदोलन हे विद्यार्थ्यांच्या हितासाठी नसून, आमदार रोहित पवार यांचे राजकीय नेतृत्व पुढे आणण्यासाठी आखलेला एक पूर्वनियोजित कट असल्याचा गंभीर आरोप भारतीय जनता पक्षाने केला आहे. भाजप प्रदेश कार्यालयात आयोजित पत्रकार परिषदेत बोलताना पक्षाचे प्रदेश मुख्य प्रवक्ते नवनाथ बन यांनी या आंदोलनाच्या ठिकाणी झालेल्या राजकीय घोषणाबाजीचे अनेक व्हिडिओ सादर केले. या आंदोलनात 'आपल्या रोहितदादांना मुख्यमंत्री करायचे आहे' अशा प्रकारच्या घोषणा दिल्या जात असल्याचे या व्हिडिओंमधून उघड झाले असून, विद्यार्थ्यांच्या खांद्यावर बंदूक ठेवून स्वतःचा राजकीय अजेंडा राबवला जात असल्याचा घणाघात बन यांनी शुक्रवारी केला.

पत्रकार परिषदेत बोलताना नवनाथ बन म्हणाले की, एमपीएससी आंदोलनात प्रामाणिकपणे अभ्यास करणारे सामान्य विद्यार्थी नाहीत, तर राजकीय हेतूने प्रेरित झालेले कार्यकर्तेच पुढे आहेत हे भाजपने पहिल्या दिवसापासून स्पष्ट केले होते. आता या आंदोलनाच्या आडून रोहित पवार स्वतःचे नेतृत्व स्थापित करण्याचा प्रयत्न करत असल्याचे प्रत्यक्ष व्हिडिओंवरून सिद्ध झाले आहे.

महाराष्ट्रातील जनता नौटंकीबाजांच्या पाठीशी उभी राहणार नाही

नवनाथ बन यांनी विरोधकांवर जोरदार निशाणा साधत सांगितले की, महाराष्ट्रातील जनता रोहित पवार यांच्या मुख्यमंत्रिपदाच्या स्वप्नाला छेद दिल्याशिवाय राहणार नाही. हा महाराष्ट्र अशा प्रकारच्या राजकीय नौटंकीबाजांच्या पाठीशी कधीच उभा राहिला नाही आणि पुढेही राहणार नाही. राज्यातील जनता आणि विद्यार्थी देवेंद्र फडणवीस यांच्या पाठीशी ठामपणे उभे आहेत, कारण सरकार खऱ्या अर्थाने विद्यार्थ्यांच्या आणि सामान्य जनतेच्या पाठीशी उभे आहे.

या वेळी त्यांनी महाराष्ट्र नवनिर्माण सेनेचे अध्यक्ष राज ठाकरे यांच्या सोशल मीडियावरील निवेदनांचा दाखला दिला. राज ठाकरे यांनी राज्याच्या मुख्यमंत्र्यांशी चर्चा केली असून लवकरच विद्यार्थ्यांसाठी आनंदाची बातमी येणार असल्याचे स्पष्ट केले आहे. त्यामुळे आता कोणाच्या मुख्यमंत्रिपदाच्या शर्यतीला आणि स्वप्नांना पूर्णविराम मिळतो, हे आंदोलनातील राजकीय समर्थकांनी आणि विवेकानंद पाटील यांच्यासारख्या मंडळींनी लक्षात ठेवावे, असा सडेतोड सल्ला त्यांनी दिला.

अध्यात्मिक व वैचारिक आव्हानांची जोड

रोहित पवार आणि त्यांच्या समर्थकांकडून केल्या जाणाऱ्या टीकेचा समाचार घेताना नवनाथ बन यांनी वारकरी संप्रदाय आणि अध्यात्माचा संदर्भ दिला. ते म्हणाले की, विवेकानंद पाटील यांनी आधी रामरक्षा स्तोत्राचे श्लोक म्हणून दाखवावेत आणि नंतर रोहित पवार यांना ते वाचून म्हणायला सांगावेत. जर ते जमत नसेल, तर वारकरी संप्रदायातील 'राम कृष्ण हरी' या नामावळीपासून ते 'सुंदर ते ध्यान, रूप पाहता लोचनी' किंवा 'हेचि दान देगा देवा' ते अगदी 'ज्ञानोबा माऊली तुकाराम' यांपैकी कोणताही एक अभंग पाटील यांनी म्हणावा आणि त्याचे सखोल निरूपण रोहित पवार यांनी करून दाखवावे.

त्यानंतर खऱ्या अर्थाने कोणाचा अभ्यास किती आहे आणि कोण हरीचा दास आहे, याचा दूध का दूध पाणी का पाणी निवाडा होऊन जाईल. संपूर्ण महाराष्ट्र ही राजकीय नौटंकी उघड्या डोळ्यांनी पाहत असून विरोधकांचा खरा चेहरा आता उघड झाला आहे, असे ते म्हणाले.

"अहंकाराचा वारा न लागो;" खुल्या चर्चेचे थेट आव्हान

विरोधकांनी इतरांच्या ज्ञानाची आणि अभ्यासाची परीक्षा घेण्याच्या भानगडीत पडू नये, असा दम भरताना बन यांनी 'अहंकाराचा वारा न लागो' या उक्तीप्रमाणे संतवचनांनुसार नम्रतेने वागण्याचा सल्ला दिला. ते म्हणाले की, रोहित पवार आणि त्यांच्या ट्रोल्सना येणाऱ्या काळात योग्य ते उत्तर दिले जाईल. गावकुसाबाहेर राहणारा किंवा मागासवर्गीय (ओबीसी) असलो तरी आम्ही कोणाच्या धमकीला किंवा डिजिटल ट्रोल धाडीला घाबरणारे नाही.

"मी भारतीय जनता पक्षाचा आणि देवेंद्र फडणवीस यांचा प्रामाणिक व निष्ठावंत कार्यकर्ता आहे. रोहित पवार यांना जर तात्त्विक मुद्द्यांवर, तत्त्वज्ञानावर किंवा एमपीएससीच्या नियमावलीवर चर्चा करायची असेल, तर त्यांनी कुठेही खुली चर्चा ठेवावी. स्थळ, वेळ आणि जागा त्यांनी स्वतः ठरवावी, आम्ही सर्व मुद्द्यांवर समोरासमोर चर्चा करायला तयार आहोत. मात्र, विद्यार्थ्यांचा बळी देऊन चालवलेले त्यांचे 'मिशन मुख्यमंत्री' आम्ही महाराष्ट्रात कधीही यशस्वी होऊ देणार नाही," असा पुनरुच्चार त्यांनी केला.

शेकडो कोटींच्या संपत्तीचा फॉर्म्युला विद्यार्थ्यांना सांगावा

एमपीएससी आंदोलनाच्या मूळ उद्देशावर प्रश्न उपस्थित करताना नवनाथ बन यांनी विचारले की, या आंदोलनात प्रत्यक्षात कोण सहभागी झाले आहे? तिथे दिल्या जाणाऱ्या घोषणा विद्यार्थ्यांच्या उज्ज्वल भविष्यासाठी आणि हक्कासाठी आहेत की रोहित पवार यांना मुख्यमंत्री करण्यासाठी आहेत? दुर्दैवाने या प्रश्नांची उत्तरे रोहित पवार किंवा त्यांच्या समर्थकांकडे नाहीत. यावरूनच त्यांचा राजकीय अजेंडा उघड झाला असून आंदोलनाचा बुरखा फाटला आहे.

तसेच आंदोलनात अडकलेल्या २० टक्के प्रामाणिक विद्यार्थ्यांना आवाहन करताना बन म्हणाले की, विद्यार्थ्यांनी अशा राजकीय नेत्यांच्या भूलथापांना बळी पडू नये. आपल्याकडे शेकडो कोटी रुपयांची अथांग संपत्ती आणि प्रॉपर्टी कुठून व कशी आली, याचा फॉर्म्युला रोहित पवार यांनी स्पर्धा परीक्षेचा अभ्यास करणाऱ्या गरीब विद्यार्थ्यांना सांगायला हवा. म्हणजे सर्वच विद्यार्थी त्यांच्यासारखे उद्योगपती आणि करोडपती होतील. परंतु रोहित पवार हा फॉर्म्युला कधीही सांगणार नाहीत; कारण विद्यार्थ्यांच्या खांद्यावर बंदूक ठेवून स्वतःच्या मुख्यमंत्रिपदाची खुर्ची शेकवणे, एवढाच त्यांचा एकमेव अजेंडा आहे, असा घणाघाती आरोप नवनाथ बन यांनी पत्रकार परिषदेच्या शेवटी केला.

• Labels: BJP Maharashtra, MPSC Protest, Rohit Pawar, Navnath Ban, Devendra Fadnavis, Maharashtra Politics, Mumbai News, Crime and Politics

• Search Description: BJP Chief Spokesperson Navnath Ban exposes political agenda behind MPSC protest, presenting videos showing slogans for Rohit Pawar's Chief Minister aspirations.

• Hashtags: #MPSCProtest #NavnathBan #RohitPawar #BJPMaharashtra #DevendraFadnavis #MaharashtraPolitics #BreakingNews