पिंपरी-चिंचवड : आंतरराष्ट्रीय सायकल स्पर्धेवर ११३ कोटींची उधळपट्टी नको;स्पर्धा रद्द करण्याची मारुती भापकर यांची मागणी

पिंपरी-चिंचवड: पिंपरी-चिंचवड महानगरपालिकेची सध्याची आर्थिक परिस्थिती अत्यंत खालावलेली असून महापालिका ठेकेदारांचे तब्बल साडेचार हजार कोटी रुपये देणे बाकी आहे. महापालिकेकडून मुदतठेवी मोडल्या जात आहेत आणि नव्याने कर्जे काढली जात आहेत. अशा बिकट आर्थिक परिस्थितीत तसेच महाराष्ट्रासह संपूर्ण देशात अलनिनोच्या प्रभावामुळे निर्माण झालेल्या भीषण दुष्काळसदृश परिस्थितीच्या पार्श्वभूमीवर, महापालिकेकडून आयोजित करण्यात येणाऱ्या आंतरराष्ट्रीय सायकल स्पर्धेवर ११३ कोटी रुपयांची उधळपट्टी करण्यात येत असल्याचा गंभीर आरोप सामाजिक कार्यकर्ते मारुती भापकर यांनी केला आहे. या अवाढव्य खर्चाला तीव्र विरोध दर्शवत ही आंतरराष्ट्रीय सायकल स्पर्धा तात्काळ रद्द करण्यात यावी आणि ११३ कोटी रुपयांचा हा निधी दुष्काळ निवारण व शहराच्या पायाभूत विकासासाठी वापरण्यात यावा, अशी मागणी करणारे अधिकृत पत्र त्यांनी महापालिका प्रशासन आणि पदाधिकाऱ्यांना दिले आहे.

मारुती भापकर यांनी पत्रात नमूद केले आहे की, पर्यावरण बदलांमुळे आणि पर्जन्यमानातील घट झाल्यामुळे संपूर्ण राज्यात दुष्काळाची परिस्थिती निर्माण झाली आहे. आगामी जानेवारी महिन्यात या दुष्काळाची भीषणता अधिक तीव्र होण्याची शक्यता वर्तवण्यात येत आहे. वाढती महागाई आणि बेरोजगारीमुळे नागरिक अडचणीत सापडले आहेत. अशा संकटसमयी दुष्काळग्रस्त शेतकरी, कामगार व सर्वसामान्यांना मदत करण्याऐवजी महापालिकेकडून आंतरराष्ट्रीय सायकल स्पर्धेच्या नावाखाली रस्ते चकाचक करणे, पदपथ दुरुस्त करणे आणि आकर्षक रोषणाईच्या नावावर कोट्यवधी रुपयांची उधळपट्टी केली जात आहे. या शर्यतीमुळे उद्योगनगरीचे नाव जागतिक पटलावर चमकणार असल्याचे सांगत प्रशासनाकडून या खर्चाचे समर्थन केले जाणे अत्यंत बेजबाबदारपणाचे आणि संतापजनक असल्याचे त्यांनी म्हटले आहे.

गतवर्षीच्या तुलनेत दुप्पट खर्च आणि कामांचे नियोजन

गेल्या वर्षी पुणे ग्रँड टूर २०२६ या आंतरराष्ट्रीय सायकल स्पर्धेच्या वेळी शहरात ५४ किलोमीटर अंतराची शर्यत पार पडली होती. त्या वेळी महापालिकेने ६० कोटी रुपये खर्च केले होते. मात्र, यंदाच्या दुसऱ्या आवृत्तीमध्ये ही शर्यत पिंपरी-चिंचवड शहर, पुणे शहर आणि पुणे ग्रामीण परिसरात सहा टप्प्यांत आयोजित केली जात आहे. यामध्ये पिंपरी-चिंचवड शहरातून दुप्पट म्हणजेच तब्बल ११३ किलोमीटर अंतराच्या रस्त्यांवरून ही शर्यत धावणार आहे.

या स्पर्धेच्या तयारीसाठी शहरातील ११३ किलोमीटर रस्त्यांचे डांबरीकरण करणे, पूर्वीचे गतिरोधक काढून रस्ते दुरुस्त करणे, नवीन पदपथ तयार करणे, जुन्या पदपथांची दुरुस्ती करणे, रस्त्यांवर रोड मार्किंग करणे, दिशादर्शक व वाहतूक सूचना फलक उभारणे, रस्ते व संरक्षक भिंतींवर आकर्षक रंगकाम करणे, बीआरटी मार्गावरील बॅरिकेट्सची रंगरंगोटी करणे, स्वागत फलक उभारणे आणि विजेची रोषणाई करणे या कामांसाठी तब्बल ११३ कोटी रुपयांचा खर्च प्रस्तावित करण्यात आला आहे. हा खर्च मागील वर्षाच्या तुलनेत थेट दुप्पट आहे.

नेत्यांच्या चमकोगिरीसाठी करदात्यांच्या पैशांची उधळपट्टी

पिंपरी-चिंचवड महापालिका सुमारे साडेचार हजार कोटी रुपये ठेकेदारांचे देणे लागते. महापालिका कर्जबाजारी झालेली असताना केवळ लोकप्रतिनिधी व अधिकाऱ्यांच्या टक्केवारीसाठी तसेच नेत्यांच्या चमकोगिरीसाठी हा खर्च केला जात असल्याचा थेट आरोप भापकर यांनी केला आहे. पंतप्रधान नरेंद्र मोदी आणि मुख्यमंत्री देवेंद्र फडणवीस यांनी दुष्काळाच्या पार्श्वभूमीवर वारंवार काटकसरीचे धोरण स्वीकारण्याचे आणि महागड्या वस्तूंची अथवा अनावश्यक खरेदी न करण्याचे आवाहन देश व राज्याला केले आहे.

अशा काळात करदात्या नागरिकांच्या पैशांची अशा प्रकारे उधळपट्टी करणे ही दुष्काळग्रस्त शेतकरी, कष्टकरी आणि शहरातील नागरिकांची चेष्टा करण्यासारखे आहे. त्यामुळे महापालिकेने ही स्पर्धा तात्काळ रद्द करावी आणि त्यातून वाचणारा ११३ कोटी रुपयांचा निधी महापालिकेच्या प्रलंबित विकासकामांसाठी तसेच दुष्काळग्रस्त बांधवांच्या मदतीसाठी वर्ग करण्यात यावा, अशी आक्रमक भूमिका भापकर यांनी पत्राद्वारे मांडली आहे.

• Labels: Pimpri Chinchwad News, PMC Water Cut, Maruti Bhapkar, International Cycle Race, Drought Relief Maharashtra, PCMC Financial Crisis

• Search Description: Social activist Maruti Bhapkar demanded the cancellation of the Rs 113 crore International Cycle Race organized by Pimpri Chinchwad Municipal Corporation amidst financial crisis and severe drought.

• Hashtags: #PimpriChinchwad #PCMC #MarutiBhapkar #InternationalCycleRace #DroughtRelief #PMCNews #PublicMoney