पुण्यात हरवलेली २.५४ लाखांची रोकड आणि अडीच लाखांचा चेक; कोंढवा पोलिसांनी दोन दिवसांत शोधून मालकाला दिला परत

 

पुणे: पुण्यातील येवलेवाडी भागात राहणाऱ्या एका किराणा व्यापाऱ्याची प्रवासात हरवलेली २ लाख ५४ हजार रुपयांची रोख रक्कम आणि अडीच लाख रुपयांचा सही केलेला चेक अशी एकूण सुमारे ५ लाख रुपयांची रक्कम कोंढवा बुद्रुक पोलिसांनी अवघ्या दोन दिवसांत शोधून काढत मूळ मालकाला सुपूर्द केली आहे. पोलिसांच्या या जलद, तत्पर आणि प्रामाणिक कामगिरीमुळे व्यापाऱ्याने सुटकेचा निश्वास सोडत पुणे पोलीस दलाचे मनःपूर्वक आभार मानले आहेत.

मार्केटला जाताना हँडलवरून पडली पैशांची बॅग:

मिळालेल्या माहितीनुसार, १६ सप्टेंबर २०२६ रोजी येवलेवाडी परिसरातील बालाजी ट्रेडर्स या दुकानाचे मालक आपल्या दुकानासाठी किराणा साहित्य खरेदी करण्याकरिता मार्केट यार्डाकडे मोटारसायकलवरून जात होते. त्यांनी रोख २ लाख ५४ हजार रुपये आणि २.५ लाखांचा स्वाक्षरी केलेला चेक असलेली बॅग गाडीच्या हँडलला अडकवली होती. मात्र, प्रवासादरम्यान ही बॅग रस्त्यात कुठेतरी पडली. बॅग गहाळ झाल्याचे लक्षात येताच त्यांनी तातडीने कोंढवा बुद्रुक येवलेवाडी पोलीस ठाण्यात धाव घेऊन मदतीची याचना केली.

सीसीटीव्ही विश्लेषणातून लागला वाटसरूचा शोध:

घटनेचे गांभीर्य ओळखून वरिष्ठ पोलीस निरीक्षक मारुती पाटील आणि पोलीस निरीक्षक (गुन्हे) दीपक कारंडे यांनी तपास पथकातील अंमलदारांना व्यापाऱ्याच्या येण्या-जाण्याच्या मार्गावरील सीसीटीव्ही कॅमेरे तपासण्याचे आदेश दिले. पोलिसांच्या पथकाने सलग दोन दिवस परिसरातील विविध ठिकाणच्या सीसीटीव्ही फुटेजचे बारकाईने विश्लेषण केले. तपासादरम्यान व्यापाऱ्याची बॅग व्यंकटेश गॅलक्सी सोसायटीजवळ रस्त्याच्या बाजूला पडल्याचे आणि एका पायी जाणाऱ्या वाटसरूने ती उचलून सोबत नेल्याचे दृश्य दिसून आले.

संपूर्ण रक्कम व्यापाऱ्याला सुपूर्द:

पोलिसांनी त्या वाटसरूचा माग काढला असता, तो इसम बॅग घेऊन व्यंकटेश गॅलक्सी सोसायटीत गेल्याचे निष्पन्न झाले. पोलीस पथकाने तातडीने त्या सोसायटीत जाऊन संबंधित व्यक्तीला गाठले. त्याच्याकडे विचारपूस केली असता, रस्त्यावर पडलेली बॅग मिळून आल्याने ती घरी घेऊन आल्याचे त्याने सांगितले. पोलिसांनी त्याच्याकडून २.५४ लाखांची रोख रक्कम आणि अडीच लाखांचा चेक असा संपूर्ण मुद्देमाल सुरक्षितपणे ताब्यात घेऊन व्यापाऱ्याला सुपूर्द केला.

सदर कारवाई अपर आयुक्त (पूर्व प्रादेशिक विभाग) मनोज पाटील, उपायुक्त (परिमंडळ ५) राजलक्ष्मी शिवणकर, सहायक आयुक्त रामदास इंगवले यांच्या सूचनांनुसार वरिष्ठ निरीक्षक मारुती पाटील, निरीक्षक दीपक कारंडे यांच्या मार्गदर्शनाखाली पोलीस अंमलदार महेश बेदुगडे, अभिजीत जाधव, अभिजीत रत्नपारखी, गणेश चिंचकर, लक्ष्मण होळकर, अनिल बनकर, किशोर पवार, मयूर मोरे, रुपेश पाटील, सुजित मदन व विजय खेंगरे यांच्या पथकाने केली.

• Labels: Pune Police, Kondhwa Police Station, Lost Cash Recovered, Yeolewadi News, Pune Crime News, Good Samaritans Pune

• Search Description: Kondhwa Police in Pune tracked down and recovered a lost bag containing Rs 2.54 lakh in cash and a Rs 2.5 lakh check within two days, returning it to the merchant.

• Hashtags: #PunePolice #KondhwaPolice #LostFound #PuneNews #PoliceAction #Honesty #CrimeBranchPune