व्हॉट्सॲप कॉलिंगद्वारे १.९५ कोटींची ऑनलाईन फसवणूक; पुणे सायबर पोलिसांकडून चीनी कनेक्शन असलेल्या टोळीतील ५ जणांना अटक

पुणे (दि. २२ सप्टेंबर २०२६): कंपनीच्या मालकाचा व्हॉट्सॲप कॉलद्वारे बनाव करून १ कोटी ९५ लाख रुपयांची ऑनलाईन फसवणूक करणाऱ्या आंतरराज्यीय टोळीचा पुणे शहराच्या सायबर पोलीस ठाण्याने पर्दाफाश केला आहे. या प्रकरणात पोलिसांनी एकूण ५ आरोपींना अटक केली असून, त्यापैकी एका आरोपीचे थेट चीनशी (China Connection) संबंध असल्याचे तपासात उघड झाले आहे. सायबर पोलिसांनी अत्यंत तत्परतेने कारवाई करत पीडित कंपनीचे तब्बल ५० लाख २६ हजार १७१ रुपये परत मिळवून देण्यास यश मिळवले आहे.

सायबर पोलीस ठाण्यात दाखल झालेल्या गुन्ह्यानुसार (गु.र.नं. १३/२०२६), सायबर भामट्यांनी एका कंपनीच्या अकाउंटंट मॅनेजरशी व्हॉट्सॲपद्वारे संपर्क साधला. आपण कंपनीचे मालक बोलत असल्याचे भासवून, कंपनीच्या कामाकरिता तातडीने पैसे पाठवायचे असल्याचे सांगत वेगवेगळ्या दोन बँक खात्यांवर १,९५,००,००० रुपये ट्रान्सफर करण्यास भाग पाडले. फसवणूक झाल्याचे लक्षात आल्यानंतर अकाउंटंट मॅनेजरने सायबर पोलीस ठाण्यात तक्रार नोंदवली.

तपासादरम्यान सायबर पोलिसांनी ज्या बँक खात्यांवर रक्कम ट्रान्सफर झाली होती, त्या बँकांशी तत्काळ ई-मेलद्वारे संपर्क साधून खाती गोठवली (Debit Freeze / Lien Freeze). फसवणुकीच्या एकूण रकमेपैकी ९५ लाख रुपये हे ॲक्सिस बँकेच्या एका ठराविक खात्यावर वर्ग झाले होते. पोलिसांनी या खात्याचा तांत्रिक माग काढत ई-मेल आयडी, मोबाईल क्रमांक आणि बँक ट्रान्सफर ट्रेलचे विश्लेषण केले. यावरून पोलिसांनी ५ आरोपींना गंडात अडकवून अटक केली. अटक केलेल्या आरोपींपैकी रोहन रामेश्वर जाधव (रा. छत्रपती संभाजीनगर) याचे थेट चीनमधील हॅकर्स/नेटवर्कशी कनेक्शन असल्याचे तपासात समोर आले आहे. उर्वरित १ कोटी रुपयांच्या ट्रान्सफर ट्रेलचा तपास सध्या पोलीस करत आहेत.

दरम्यान, सायबर पोलिसांनी केलेल्या या धडक कारवाईमुळे न्यायालयाच्या आदेशान्वये आणि शासनाच्या M.R.M. (MRM Portal) द्वारे पीडित तक्रारदाराला ४७,६९,१७१ रुपये आणि अतिरिक्त २,५७,००० रुपयांचा प्रस्ताव सादर करून एकूण ५० लाख २६ हजार १७१ रुपये परत मिळवून दिले आहेत.

सायबर पोलिसांचे नागरिकांना आवाहन:

या प्रेसनोटद्वारे पुणे शहर सायबर पोलीस ठाण्याने नागरिकांना सतर्कतेचा इशारा दिला आहे. शेअर ट्रेडिंगमध्ये जास्त परताव्याचे आमिष, डिजिटल अरेस्टची भीती, पार्सलमध्ये ड्रग्ज, महावितरण (MSEDCL) वीज बिल, MNGL फ्रॉड, ऑनलाईन बँक KYC अपडेट आणि S.I.R. अपडेट अशा कोणत्याही प्रलोभनांना किंवा धमक्यांना बळी पडू नका. असा संशय आल्यास तात्काळ जवळच्या पोलीस ठाण्याशी संपर्क साधावा. तसेच, कंपन्यांच्या मालकांनी आपल्या अकाउंट्स विभागात काम करणाऱ्या कर्मचाऱ्यांशी नियमित सुसंवाद ठेवावा, जेणेकरून अशा ऑनलाईन फसवणुकीस आळा बसेल.

सदर कारवाई आयुक्त अमितेश कुमार, सहआयुक्त रंजन कुमार शर्मा/संजय दराडे, अप्पर आयुक्त (गुन्हे) तेजस्विनी सातपुते, उपआयुक्त (आर्थिक व सायबर) विवेक मासाळ, सहायक आयुक्त शुभदा संख्यान यांच्या मार्गदर्शनाखाली वरिष्ठ निरीक्षक स्वप्नाली शिंदे, तपास अधिकारी निरीक्षक संगीता देवकाते, उपनिरीक्षक सुशिल डमरे आणि अंमलदार संदेश कर्ण, राजुदास चव्हाण, प्रशांत बोहाडे, प्रविणसिंग राजपूत, शितल डांगे, श्रीकृष्ण नागटिळक, सोनाली चव्हाण, सतीश मांडरे व कृष्णा मार्कड यांच्या पथकाने केली.

• Labels: Cyber Crime, Fraud Arrest, China Connection, Pune Cyber Police, Financial Fraud, Cyber Security

• Search Description: Pune Cyber Police arrested 5 fraudsters including one with China connections in a Rs 1.95 crore WhatsApp impersonation scam and recovered over Rs 50 lakh.

• Hashtags: #CyberCrime #PunePolice #CyberFraud #OnlineFraudAwareness #ChinaConnection #PuneNews

•