पिंपरी-चिंचवड महापालिका उद्यान विभागाच्या कारभाराविरोधात आम आदमी पार्टी युवा आघाडी आक्रमक; अधिकाऱ्याला दिले 'पैशांचे झाड' भेट

पिंपरी (विशेष प्रतिनिधी): पिंपरी-चिंचवड महानगरपालिका मुख्यालयाच्या लगत सुरू असलेल्या एका खाजगी बांधकाम प्रकल्पासाठी तब्बल ५२ जुन्या व मोठ्या वृक्षांची बेकायदेशीरपणे आणि निर्घृण कत्तल करण्यात आल्याचा गंभीर प्रकार उघडकीस आला आहे. या प्रकरणी उद्यान व वृक्षसंवर्धन विभागातील अधिकाऱ्यांनी खाजगी बिल्डरच्या फायद्यासाठी झाडांचे वय व संख्या कागदपत्रांवर कमी दाखवून वृक्ष प्राधिकरणाची दिशाभूल केल्याचा आरोप आम आदमी पार्टी (आप) युवा आघाडीने केला आहे. या भ्रष्ट कारभाराचा पर्दाफाश करत 'आप' युवा आघाडीच्या वतीने प्रदेशाध्यक्ष रविराज काळे यांच्या नेतृत्वात उद्यान मुख्य अधीक्षक महेश गारगोटे यांना 'पैशांचे झाड' भेट देऊन अभिनव आणि तीव्र निषेध नोंदवण्यात आला.

या वृक्षतोडीप्रकरणी आम आदमी पार्टीच्या शिष्टमंडळाने महानगरपालिका आयुक्तांना लेखी निवेदन सादर करून दोषी अधिकाऱ्यांवर तातडीने कठोर कारवाई करण्याची मागणी केली आहे. निवेदनात मांडलेले मुख्य मुद्दे खालीलप्रमाणे आहेत:

१. कागदपत्रांत फेरफार: खाजगी बिल्डरच्या बांधकामात अडथळा ठरणार्या ५२ जुन्या वृक्षांची कत्तल करण्यासाठी उद्यान विभागातील अधिकाऱ्यांनी झाडांचे वय आणि संख्या यामध्ये फेरफार करून वृक्ष प्राधिकरणाची दिशाभूल केली आहे.

२. माहिती देण्यास टाळाटाळ: या बेकायदेशीर वृक्षतोडीसंदर्भातील अधिकृत माहिती व कागदपत्रे देण्यास अधिकारी टाळाटाळ करत असून, महापालिकेचा कारभार बिल्डरच्या कार्यालयातून चालतोय की काय, असा संताप नागरिक व्यक्त करत आहेत.

३. परवानगी रद्द करण्याची मागणी: ज्या ना-हरकत दाखल्याच्या (NOC) आधारे सदर प्रकल्पाला बांधकाम परवानगी दिली आहे, ती तातडीने रद्द करण्यात यावी आणि पर्यावरणाचा ऱ्हास थांबवावा.

४. फौजदारी कारवाईची मागणी: मुंबई उच्च न्यायालयाच्या आदेशानुसार व महाराष्ट्र वृक्षतोड कायद्यानुसार, कर्तव्यात कसूर करणाऱ्या व बेकायदेशीर वृक्षतोडीला खतपाणी घालणाऱ्या उद्यान मुख्य अधीक्षक महेश गारगोटे आणि इतर कर्मचाऱ्यांना तातडीने निलंबित करावे. तसेच त्यांच्यावर भारतीय न्याय संहिता (BNS) व भ्रष्टाचार प्रतिबंधक कायद्यांतर्गत फौजदारी खटला दाखल करावा.

उद्यान व वृक्षसंवर्धन विभाग हा पर्यावरणाचे रक्षण करण्यासाठी नसून केवळ बिल्डरधार्जिणी भूमिका घेऊन स्वतःचे उदरभरण करण्यासाठीच कार्यरत आहे का, असा सवाल करत रविराज काळे व 'आप' युवा आघाडीच्या कार्यकर्त्यांनी अधिकाऱ्यांना 'पैशांचे झाड' भेट देऊन प्रशासनाचा निषेध केला.

"झाडांचे रक्षण करायचे सोडून मनपाचे अधिकारी बिल्डरांच्या फायद्यासाठी जुन्या वृक्षांचा बळी देत आहेत. ५२ झाडांची कत्तल हा थेट पर्यावरणावर झालेला दरोडा आहे. जर मनपा आयुक्तांनी या भ्रष्ट अधिकारी आणि कर्मचाऱ्यांवर तातडीने निलंबनाची व चौकशीची कारवाई केली नाही, तर आम आदमी पार्टीच्या वतीने संपूर्ण शहरात महापालिकेविरोधात व्यापक आणि तीव्र जनआंदोलन छेडले जाईल."

— रविराज काळे (प्रदेशाध्यक्ष, आप युवा आघाडी)

या आंदोलनादरम्यान आम आदमी पार्टी व युवा आघाडीचे प्रदेश उपाध्यक्ष ऋषिकेश कानवटे, युवक शहराध्यक्ष विकी पासोटे, योगेश गायकवाड यांच्यासह पर्यावरणप्रेमी आणि नागरिक मोठ्या संख्येने उपस्थित होते.

• Labels: PCMC News, Pimpri Chinchwad, AAP Maharashtra, Environmental News, Tree Felling Controversy, Ravindra Kale,PCMC Corruption

• Search Description: AAP Youth Wing protests PCMC Garden Department over illegal felling of 52 trees for a private builder project; gifts money tree to officials.

• Hashtags: #PCMC #PimpriChinchwad #AAMAadmiParty #SaveTrees #PCMCCorruption #RavirajKale #EnvironmentNews