मुंबई: सार्वजनिक शांतता राखण्यासाठी, सुव्यवस्थेचा भंग रोखण्यासाठी तसेच मानवी जीवन व मालमत्तेचे नुकसान टाळण्यासाठी बृहन्मुंबई पोलीस आयुक्तांच्या हद्दीत ९ सप्टेंबर २०२६ पासून २३ सप्टेंबर २०२६ पर्यंत १५ दिवसांच्या कालावधीसाठी जमावबंदीचे आदेश जारी करण्यात आले आहेत. मुंबई पोलीस कायद्याच्या कलम ३७(३) सह कलम १०(२) अन्वये मिळालेल्या अधिकारांचा वापर करून उप पोलीस आयुक्त (अभियान) अकबर पठाण यांनी हे प्रतिबंधात्मक आदेश निर्गमित केले आहेत.
विविध सूत्रांकडून मिळालेल्या गुप्त माहितीच्या आधारे शहरात शांतता बिघडण्याची व दंगलसदृश परिस्थिती निर्माण होण्याची शक्यता लक्षात घेऊन प्रशासनाने हा खबरदारीचा उपाय योजला आहे. ९ सप्टेंबर रोजी मध्यरात्री ००:०१ वाजल्यापासून सुरू होणारा हा आदेश २३ सप्टेंबर रोजी रात्री २४:०० वाजेपर्यंत अंमलात राहील.
काय आहेत प्रमुख निर्बंध?
१. बृहन्मुंबई परिसरात पाच किंवा त्याहून अधिक व्यक्तींनी एकत्र जमण्यास मनाई.
२. कोणत्याही स्वरूपाच्या बेकायदेशीर मोर्चे व मिरवणुका काढण्यास बंदी.
३. कोणत्याही मिरवणुकीत लाऊडस्पीकर, ध्वनिवर्धक, वाद्यवृंद (बँड) वाजवणे आणि फटाके फोडण्यावर पूर्णपणे बंदी.
या कार्यक्रमांना मिळणार सवलत:
सार्वजनिक जीवन सुरळीत राहावे यासाठी पोलीस प्रशासनाने काही आवश्यक बाबींना या आदेशातून वगळले आहे.
विवाह व धार्मिक कौटुंबिक सोहळे.
अंतिम संस्कार व स्मशानभूमीकडे जाणारे अंत्ययात्रांचे मार्ग.
कंपन्या, सहकारी संस्था, क्लब व इतर संघटनांच्या वैधानिक व दैनंदिन कामकाजाच्या बैठका.
चित्रपटगृह, नाट्यगृह किंवा सार्वजनिक करमणुकीच्या ठिकाणी चित्रपट किंवा नाटक पाहण्यासाठी जमलेले नागरिक.
शाळा, महाविद्यालये आणि इतर शैक्षणिक संस्थांमधील शैक्षणिक उपक्रम.
कारखाने, दुकाने व व्यावसायिक आस्थापनांमधील नियमित कामकाज.
सरकारी/निमसरकारी कामे पार पाडण्यासाठी न्यायालये आणि शासकीय कार्यालयांमधील गर्दी.
संबंधित क्षेत्राचे विभागीय उप पोलीस आयुक्त किंवा त्यांच्या पर्यवेक्षक अधिकाऱ्यांनी विशेष परवानगी दिलेले मेळावे अथवा मिरवणुका.
Labels: Mumbai News, Mumbai Police, Prohibitory Orders, Section 37, Mumbai Law And Order, Civic News
Search Description: Mumbai Police issues prohibitory orders under Section 37 from Sept 9 to Sept 23, 2026, banning assemblies of 5+ persons and loudspeakers.
Hashtags: #MumbaiPolice #ProhibitoryOrder #MumbaiNews #LawAndOrder #Rule37 #Mumbai
कोणत्याही टिप्पण्या नाहीत:
टिप्पणी पोस्ट करा