पुणे महापालिकेचा निष्काळजीपणा उघड! पर्यावरण परवानगीशिवाय उभारले बेकायदेशीर बांधकाम; आमदार अमित गोरखे आक्रमक

पुणे: पुण्यातील धायरी येथील सर्व्हे क्रमांक ४८/१ ते ४८/१६ येथे साकारण्यात आलेल्या 'मॅजेस्टिक व्हेनिस' (Majestique Venice) या गृहप्रकल्पात मोठ्या प्रमाणावर बेकायदेशीर बांधकाम करून पर्यावरणविषयक सर्व नियमांची सर्रास पायमल्ली करण्यात आल्याची अत्यंत धक्कादायक बाब समोर आली आहे. मॅजेस्टिक निर्माण एलएलपी या विकसकाने पर्यावरण संरक्षण कायदा १९८६, ईआयए नोटिफिकेशन २००६, जल व वायू प्रदूषण कायदा तसेच महाराष्ट्र प्रादेशिक नियोजन व नगररचना कायद्याचे (MRTP Act) सर्रास उल्लंघन केले आहे. विधानपरिषद सदस्य अमित गोरखे यांनी याप्रकरणी विधानपरिषदेत आणि पुणे महानगरपालिकेकडे पुराव्यानिशी तक्रार दाखल केली होती. या तक्रारीच्या अनुषंगाने शहर अभियंता कार्यालयाने दिलेल्या अधिकृत खुलाशातून महापालिकेचा निष्काळजीपणा आणि विकसकाचा महाघोटाळा उघड झाला आहे.

पुणे महापालिकेच्या खुलाशातून उघड झालेले पाच प्रमुख मुद्दे

१. पर्यावरण परवानगीची मूळ मर्यादा आणि फेरफार:

सदर प्रकल्पाला ३ डिसेंबर २०१६ रोजी १७,७९०.७५ चौरस मीटर भूखंड क्षेत्रावर ५०,४५२.९७ चौरस मीटर एकूण बांधकामासाठी पर्यावरण परवानगी (Environment Clearance - EC) देण्यात आली होती. तथापि, या दाखल्यामधील सर्वसाधारण अटींनुसार, पूर्व बांधकामाच्या स्थितीसाठी पूर्व मंजूर नकाशांन्वये केवळ २९,९८५.११ चौरस मीटर क्षेत्रासाठीच प्रत्यक्ष मंजुरी देण्यात आली होती आणि तसाच प्रस्ताव पर्यावरण विभागाकडे सादर केला गेला होता.

२. एमपीसीबीचा नकार असतानाही 'ऑक्युपन्सी सर्टिफिकेट'ची खैरात:

सर्वात गंभीर बाब म्हणजे, कायदेशीररीत्या केवळ २९,९८५.११ चौरस मीटर बांधकाम करण्याची परवानगी असताना विकसकाने प्रत्यक्षात तब्बल ५०,४५२ चौरस मीटरचे प्रचंड बांधकाम उभे केले. यासाठी नूतनीकरण केलेले पर्यावरण प्रमाणपत्र (Renewed EC), महाराष्ट्र प्रदूषण नियंत्रण मंडळाचा (MPCB) 'कन्सेंट टू एस्टॅब्लिश' (Consent to Establish) आणि 'कन्सेंट टू ऑपरेट' (Consent to Operate) दाखला घेणे बंधनकारक होते. एमपीसीबीने या प्रकल्पाबाबत अत्यंत नकारात्मक अहवाल देऊन परवानगी फेटाळलेली (Refuse) असतानाही, पुणे महानगरपालिकेच्या बांधकाम विभागाने १२ जुलै २०२२ रोजी या प्रकल्पाला पूर्णत्वाचा दाखला (Full Occupancy Certificate) देऊन टाकला.

३. आवश्यक कागदपत्रांची लपवाछपवी:

विकसक आणि संबंधित वास्तुविशारदाने (Architect) सुधारित बांधकाम परवानगी आणि भोगवटा प्रमाणपत्राचा प्रस्ताव महापालिकडे सादर करताना पर्यावरण परवानगीशी संबंधित अत्यंत महत्त्वाची आणि अनिवार्य कागदपत्रे सादरच केली नाहीत. विकसकाने कागदपत्रे सादर केली नसल्याची कबुली पुणे महानगरपालिकेने स्वतः आपल्या लेखी खुलाशात दिली आहे.

४. आर्थिक मूल्यांकनात ७ ते ८ कोटींची तफावत:

या संपूर्ण गृहप्रकल्पाच्या एकूण किमतीमध्ये तब्बल ७ ते ८ कोटी रुपयांची मोठी आर्थिक तफावत आढळून आली आहे. या गंभीर विसंगतीमुळे महापालिकेने विकसकाला ऑडिटेड बॅलन्स शीट (Audited Balance Sheet) तात्काळ सादर करण्याचे स्पष्ट आदेश दिले आहेत.

आमदार अमित गोरखे यांची आक्रमक भूमिका

या संपूर्ण प्रकरणावर भाष्य करताना विधानपरिषद सदस्य अमित गोरखे म्हणाले, "पुणे महानगरपालिकेने सादर केलेल्या लेखी खुलाशाने माझ्या तक्रारीत पूर्ण तथ्य होते हेच १०० टक्के सिद्ध झाले आहे. पर्यावरणाची कोणतीही वैध परवानगी नसताना २१,००० चौरस मीटरपेक्षा जास्त बेकायदेशीर आणि अनधिकृत बांधकाम उभारून हजारो नागरिकांच्या आणि रहिवाशांच्या जीवाशी खेळणाऱ्या विकसकाला पाठीशी घालणाऱ्या महापालिका अधिकाऱ्यांची गय केली जाणार नाही. या प्रकरणात केवळ तुटपुंजा दंड आकारून प्रकरण दाबण्याचा प्रयत्न झाल्यास तो खपवून घेतला जाणार नाही."

त्यांनी पुढे नमूद केले की, "संबंधित विकसक, वास्तुविशारद आणि त्यांना बेकायदेशीर कामात मदत करणाऱ्या सर्व दोषी महापालिका अधिकाऱ्यांवर तात्काळ फौजदारी गुन्हे दाखल झाले पाहिजेत. या संपूर्ण प्रकरणाची उच्चस्तरीय चौकशी समितीमार्फत चौकशी करण्यात यावी. तसेच पर्यावरण विभाग, महाराष्ट्र प्रदूषण नियंत्रण मंडळ आणि पुणे महानगरपालिकेने या प्रकल्पाला दिलेल्या सर्व बेकायदेशीर परवानग्या त्वरित रद्द करण्यात याव्यात, अशी जोरदार मागणी मी राज्याचे मुख्यमंत्री आणि पर्यावरण मंत्री यांच्याकडे करणार आहे."

धायरीतील या मॅजेस्टिक व्हेनिस प्रकल्पातील बेकायदेशीर बांधकामाचा पर्दाफाश झाल्यामुळे पुण्यातील रिअल इस्टेट क्षेत्रात आणि महापालिका प्रशासनात मोठे वादळ निर्माण झाले आहे.

• Labels: Pune News, Majestique Venice Dhayri, Amit Gorkhe, PMC Illegal Construction, Environment Clearance Fraud, MPCB, Pune Real Estate Scam

• Search Description: MLA Amit Gorkhe exposes 21,000 sq.m. illegal construction at Majestique Venice in Dhayri; demands FIR against developer, architect, and PMC officials.

• Hashtags: #PuneNews #MajestiqueVenice #AmitGorkhe #PMC #EnvironmentClearance #RealEstateScam #Dhayri #Pune