१३ ऑगस्टपासून पिंपरी-चिंचवड महापालिकेत संप?;'कर्मचारी महासंघा'ने दिली प्रशासनाला नोटीस!

 

पिंपरी-चिंचवड: पिंपरी-चिंचवड महानगरपालिकेतील अधिकारी व कर्मचाऱ्यांच्या विविध प्रलंबित मागण्यांवर पालिका प्रशासनाकडून सातत्याने होणाऱ्या टाळाटाळीमुळे अखेर कामगार संघटना आणि प्रशासनामधील संघर्ष टोकाला पोहोचला आहे. 'पिंपरी-चिंचवड महानगरपालिका कर्मचारी महासंघ' या मान्यताप्राप्त संघटनेच्या वतीने औद्योगिक कलह कायदा अधिनियम, १९४७ च्या कलम २२ अन्वये महापालिका आयुक्तांना संपाची अधिकृत नोटीस बजावण्यात आली आहे. येत्या १३ ऑगस्ट २०२६ रोजी किंवा त्यानंतर महापालिकेतील सर्व कर्मचारी कायदेशीर संपावर जातील, असा स्पष्ट इशारा कर्मचारी महासंघाचे अध्यक्ष  बबनराव झिंझुर्डे आणि सरचिटणीस अभिमान  भोसले यांनी पत्राद्वारे दिला आहे.

 
पाठपुरावा करूनही चर्चेसाठी वेळ नाही; कर्मचाऱ्यांत तीव्र असंतोष

कर्मचारी महासंघाने दिलेल्या माहितीनुसार, महानगरपालिकेतील अधिकारी व कर्मचाऱ्यांचे सेवाविषयक प्रश्न, पेन्शन, पदोन्नती आणि इतर कायदेशीर हक्क याबाबत महासंघाने २५ मार्च २०२६ (पत्र क्र. महासंघ/१२२/२०२६) रोजी २२ मुद्द्यांची सविस्तर विषयपत्रिका प्रशासनाला सादर केली होती. त्या पाठोपाठ २९ जुलै २०२६ रोजीही (जावक क्र. १३६/२०२६) स्मरणपत्र देऊन प्रशासकीय कामकाज सुरळीत चालण्यासाठी तातडीने चर्चेची वेळ मागितली होती.

परंतु, वारंवार निवेदने देऊन आणि पाठपुरावा करूनही महापालिका प्रशासनाने या विषयांवर चर्चा करण्यासाठी कोणतीही बैठक आयोजित केली नाही किंवा वेळ दिला नाही. त्यामुळे कर्मचाऱ्यांचे हक्क आणि सेवाविषयक प्रश्न अधांतरी राहिले असून कर्मचाऱ्यांमध्ये प्रशासनाविरोधात तीव्र असंतोष निर्माण झाला आहे.

 
संपाच्या नोटीसमधील मुख्य मागण्या व २२ मुद्द्यांची विषयपत्रिका
कर्मचारी महासंघाने ३९ जुलै २०२६ (जावक क्र. ४९/२०२६) रोजी औद्योगिक कलह कायद्यांतर्गत पाठवलेल्या संपाच्या नोटीससोबत २५ मार्च रोजीची २२ मुद्द्यांची विषयपत्रिका जोडली आहे. यामध्ये कर्मचाऱ्यांच्या अत्यंत महत्त्वाच्या आर्थिक व सेवाविषयक मागण्यांचा समावेश आहे:

जुनी पेन्शन योजना लागू करणे: ठाणे व कल्याण-डोंबिवली महानगरपालिकेच्या धर्तीवर पिंपरी-चिंचवड महापालिकेतील कर्मचाऱ्यांना पूर्ववत जुनी पेन्शन योजना लागू करावी.

अंशदान पेन्शनची रक्कम: १ नोव्हेंबर २००५ नंतर पालिकेत रुजू झालेल्या कर्मचाऱ्यांची कापलेली अंशदान पेन्शन रक्कम अदा करण्याबाबत निर्णय घेणे.

बोनस व सानुग्रह अनुदान: महापालिकेतील अधिकारी व कर्मचाऱ्यांना देय असलेल्या प्रथा बोनस व सानुग्रह अनुदानाचा करारनामा करणे.

PMPML कर्मचाऱ्यांची पेन्शन: पुणे महानगर परिवहन महामंडळातून (PMPML) पालिकेत सेवावर्ग झालेल्या ११८ कर्मचाऱ्यांच्या सेवानिवृत्तीनंतर देय असलेल्या रकमा अदा करणे.

पदोन्नती व सेवाज्येष्ठता याद्या: सर्व संवर्गातील (प्रशासकीय, लेखा, वैद्यकीय, अभियांत्रिकी, शिक्षण) पदोन्नती प्रक्रिया राबवणे आणि अद्ययावत सेवाज्येष्ठता याद्या वेबसाईटवर प्रसिद्ध करणे.

घरकुल योजना व धन्वंतरी योजना: सलग २५ वर्षे सेवा झालेल्या आरोग्य कर्मचाऱ्यांना डॉ. बाबासाहेब आंबेडकर श्रमसाफल्य आवास योजनेअंतर्गत मोफत घरे देणे व निवृत्त कर्मचाऱ्यांना सुधारित धन्वंतरी योजना लागू करणे.

शिक्षक व सुरक्षा कर्मचाऱ्यांचे प्रश्न: शिक्षकांना घरबांधणी, वाहन, संगणक कर्ज व वरिष्ठ/निवड वेतनश्रेणी लागू करणे. सुरक्षा विभागातील सुपरवायझर/निरीक्षक पदे कंत्राटी पद्धतीने न भरता पालिकेच्या कर्मचाऱ्यांमधून पदोन्नतीने भरणे.

 
कामगार आयुक्त आणि महापालिका प्रशासनाला प्रती सुपूर्द
कर्मचारी महासंघाने संपाच्या नोटीसच्या प्रती कामगार आयुक्त/समेत अधिकारी, अप्पर कामगार आयुक्त कार्यालय (शिवाजीनगर, पुणे) तसेच महापालिकेच्या सामान्य प्रशासन विभागाचे सहआयुक्त व कामगार कल्याण विभागाच्या उपआयुक्तांकडे रीतसर पाठवल्या आहेत.

कर्मचारी महासंघाचे अध्यक्ष झिंझुर्डे आणि सरचिटणीस  भोसले यांनी स्पष्ट केले की, "आम्ही अद्यापही चर्चेद्वारे सामंजस्याने तोडगा काढण्यास तयार आहोत. मात्र, प्रशासनाने दुर्लक्ष कायम ठेवल्यास १३ ऑगस्ट २०२६ पासून कर्मचाऱ्यांना नाईलाजाने कामबंद आंदोलनाचा मार्ग स्वीकारावा लागेल."

 
पालिका प्रशासन काय पाऊल उचलणार?
महापालिकेतील सर्व संवर्गातील कर्मचारी या आंदोलनात सहभागी झाल्यास पिंपरी-चिंचवड शहरातील नागरी सेवा, आरोग्य, स्वच्छता आणि प्रशासकीय कामकाजावर मोठा परिणाम होण्याची शक्यता वर्तवली जात आहे. त्यामुळे संपाची नोटीस मिळताच आता महापालिका आयुक्त आणि प्रशासन कामगार संघटनेला चर्चेसाठी आमंत्रित करून सामंजस्याने तोडगा काढतात की नाही, याकडे संपूर्ण शहराचे व पालिकेतील हजारो कर्मचाऱ्यांचे लक्ष लागले आहे.

• Labels: PCMC News, Pimpri Chinchwad Municipal Corporation, Strike Notice, PCMC Employee Union, Babanrao Zinjurde, Abhiman Bhosale, Old Pension Scheme, Maharashtra News

• Search Description: PCMC Employee Union issues a formal strike notice under Industrial Disputes Act starting August 13, 2026, demanding resolution of 22 pending employee issues including Old Pension Scheme and bonus.

Hash Tags

#PCMC #PimpriChinchwad #PCMCEmployees #StrikeNotice #OldPensionScheme #MaharashtraNews #CivicNews #BreakingNews