पुणे (१८ ऑगस्ट २०२६): पिंपरी येथील ऐतिहासिक हाफकिन जीव-औषध निर्माण महामंडळाला पुन्हा गतवैभव मिळवून देण्यासाठी आणि संस्थेची उत्पादनक्षमता वाढवण्यासाठी शासन पूर्णपणे कटिबद्ध असल्याचे अन्न व औषध प्रशासन राज्यमंत्री योगेश कदम यांनी स्पष्ट केले आहे. १७ ऑगस्ट रोजी पिंपरी येथील हाफकिन प्रकल्पास भेट देऊन त्यांनी उत्पादन विभाग, सर्पालय, अश्व संवर्धन विभाग तसेच अत्याधुनिक प्रयोगशाळेची प्रत्यक्ष पाहणी केली. पाहणीनंतर आयोजित आढावा बैठकीत बोलताना, अँटी-स्नेक व्हेनम सीरमचे उत्पादन वाढवून राज्यातील प्रत्येक प्राथमिक आरोग्य केंद्रात सर्पदंश उपचार किट उपलब्ध करून देण्यासाठी तातडीने कृती आराखडा तयार करण्याचे निर्देश राज्यमंत्र्यांनी प्रशासनाला दिले.
या पाहणी दौऱ्यादरम्यान राज्यमंत्री योगेश कदम यांनी हाफकिन संस्थेची सध्याची क्षमता, अत्याधुनिक पायाभूत सुविधा आणि प्रदीर्घ अनुभवाचा प्रभावी वापर करून औषध निर्मितीचा वेग वाढवण्यावर भर दिला. ग्रामीण व दुर्गम भागात सर्पदंशाच्या घटनांमध्ये वेळेवर उपचार मिळणे अत्यंत महत्त्वाचे असल्याने, हाफकिनने अँटी-स्नेक व्हेनम सीरम निर्मितीत मोठे योगदान देणे गरजेचे असल्याचे त्यांनी नमूद केले.
संस्थेच्या प्रलंबित निधीबाबत बोलताना त्यांनी सांगितले की, याविषयी उपमुख्यमंत्री एकनाथ शिंदे यांच्याशी अत्यंत सकारात्मक चर्चा झाली असून, उर्वरित निधी व मदतीसाठी केंद्र शासनाकडेही आवश्यक पाठपुरावा केला जाईल. महामंडळाच्या प्रलंबित मागण्यांवर आणि अडचणींवर सकारात्मक मार्ग काढण्यासाठी येत्या आठवड्यात मंत्रालयात विशेष बैठक आयोजित करण्यात येणार आहे.
याप्रसंगी अन्न व औषध प्रशासनाचे सहआयुक्त हुकरे, हाफकिनचे महाव्यवस्थापक धीवर, पिंपरी विभाग व्यवस्थापक डॉ. बाबासाहेब कुरहे यांच्यासह महामंडळाचे वरिष्ठ अधिकारी आणि कर्मचारी उपस्थित होते.
Labels:
Haffkine Institute,Pimpri News,Yogesh Kadam,FDA Maharashtra,Anti Snake Venoms,Maharashtra GovernmentSearch Description:
Minister Yogesh Kadam inspects Haffkine Institute in Pimpri and orders action plan to increase anti-snake venom production and restore its glory.Hashtags:
#HaffkineInstitute #YogeshKadam #Pimpri #HealthcareMaharashtra #AntiSnakeVenom #FDAMaharashtra
Reviewed by ANN news network
on
८/१८/२०२६ ०९:१३:०० PM
Rating:
कोणत्याही टिप्पण्या नाहीत: