शिवसेनेचा भव्य रोजगार मेळावा : पिंपरी-चिंचवडमध्ये २ हजार तरुणांना नोकरीची संधी, एआयच्या युगात करिअर मार्गदर्शनावर भर

 

चिंचवड (पिंपरी-चिंचवड): बदलत्या तंत्रज्ञानाच्या युगात आणि कृत्रिम बुद्धिमत्तेच्या (AI) वाढत्या प्रभावामुळे नोकरीच्या स्वरूपात मोठे बदल होत आहेत. अशा काळात तरुणांनी हताश न होता नव्या संधींकडे सकारात्मक दृष्टीने पाहिले पाहिजे. पदवी घेऊन बाहेर पडणाऱ्या प्रत्येक तरुणाला तातडीने रोजगार मिळावा, यासाठी शिवसेनेच्या वतीने नोकरी मेळाव्यासोबतच करिअर मार्गदर्शनावर विशेष भर दिला जाणार असल्याचे प्रतिपादन विधान परिषदेचे उपसभापती सचिन अहिर यांनी केले.

पिंपरी-चिंचवड शहर शिवसेनेच्या वतीने चिंचवडगावातील चिंचवडे लॉन्स येथे भव्य रोजगार मेळाव्याचे आयोजन करण्यात आले होते. या मेळाव्याच्या उद्घाटनप्रसंगी उपसभापती सचिन अहिर बोलत होते. या कार्यक्रमाला खासदार श्रीरंग बारणे, महापौर रवी लांडगे, शिवसेना उपनेत्या व ज्येष्ठ नगरसेविका सुलभा उबाळे, गटनेते विश्वजीत बारणे, नगरसेवक निलेश तरस, नगरसेविका ऐश्वर्या तरस, रेश्मा कातळे, निलेश बारणे, महानगरप्रमुख राजेश फलले, युवासेनेचे जिल्हाप्रमुख सागर पाचर्णे, जिल्हा समन्वयक बाळासाहेब वाल्हेकर, जिल्हाप्रमुख राजेश खांडभोर, उपजिल्हाप्रमुख खंडूशेठ चिंचवडे, महिला जिल्हा संघटिका शैला भोंडवे, युवती संघटिका सायली साळवे आणि महिला संघटिका सरिता साने उपस्थित होते.

रोजगार आणि उद्योगांचे परस्परसंबंध

उपसभापती सचिन अहिर यांनी आपल्या भाषणात सांगितले की, कोणतेही काम किंवा नोकरी ही लहान-मोठी नसून तरुणांनी मिळालेली संधी स्वीकारून पुढे गेले पाहिजे. उद्योग टिकले तरच कामगार टिकतील आणि कामगार टिकले तरच संघटना बळकट होतील. त्यामुळे उद्योगांना प्राधान्य देणे ही काळाची गरज बनली आहे. दर सहा महिन्यांनी अशा प्रकारच्या रोजगार महोत्सवांचे आयोजन करून तरुणांना योग्य दिशा देणे आवश्यक आहे. या मेळाव्यात ज्या तरुणांना तात्काळ नोकरी मिळू शकली नाही, त्यांच्यासाठी 'शिवसेना जॉब कार्ड' देण्यात येत असून या माध्यमातून त्यांना भविष्यात रोजगाराच्या संधी उपलब्ध करून दिल्या जातील, असा दिलासा त्यांनी दिला.

१२५ हून अधिक कंपन्यांचा सहभाग आणि दिव्यांगांना प्राधान्य

या रोजगार मेळाव्यात आयटी, बँकिंग, बीपीओ, केपीओ, रिअल इस्टेट, मॅन्युफॅक्चरिंग, ऑटोमोबाईल आणि तंत्रज्ञान क्षेत्रातील सुमारे १२५ हून अधिक कंपन्यांचे प्रतिनिधी उपस्थित होते. यामध्ये ॲक्सिस बँक, आयसीआयसीआय बँक, टाटा मोटर्स, हुंदाई, बजाज, डॉ. रेड्डीज फाउंडेशन आणि बीव्हीजी इंडिया यांसारख्या नामांकित आस्थापनांचा समावेश होता.

पाचवी उत्तीर्ण उमेदवारांपासून ते आयटीआय, डिप्लोमा, पदवीधर आणि इंजिनिअरिंग पूर्ण केलेल्या उच्चशिक्षित उमेदवारांना त्यांच्या पात्रतेनुसार संधी देण्यात आली. विशेष म्हणजे, दिव्यांग बांधवांसाठी रोजगाराच्या विशेष संधी आणि मुलाखतींची वेगळी व्यवस्था करण्यात आली होती. कार्यक्रमादरम्यान महापौर रवी लांडगे यांच्या हस्ते एका दिव्यांग उमेदवाराला प्रातिनिधिक स्वरूपात ऑफर लेटर प्रदान करण्यात आले.

खासदार श्रीरंग बारणे यांचे मनोगत 

खासदार श्रीरंग बारणे यांनी मनोगत व्यक्त करताना सांगितले की, केंद्र व राज्य सरकारच्या माध्यमातून विविध कल्याणकारी योजना राबवल्या जात आहेत. 'लखपती दीदी' आणि 'लाडकी बहीण' योजनांच्या माध्यमातून महिलांना आर्थिक पाठबळ दिले जात आहे. स्थानिक पातळीवर तरुणांना रोजगाराच्या संधी सहज उपलब्ध व्हाव्यात, या उद्देशाने या मेळाव्याचे आयोजन करण्यात आले असून २ हजारांपेक्षा जास्त तरुणांना यातून थेट नोकरी मिळणार आहे.

कार्यक्रमाचे प्रास्ताविक विश्वजीत बारणे यांनी केले, तर सुलभा उबाळे यांनीही उपस्थितांना मार्गदर्शन केले. शहराच्या विविध भागांतून हजारो तरुण-तरुणींनी या मेळाव्यास हजेरी लावली होती.

Labels: Pimpri Chinchwad News, Job Fair, Shiv Sena, Employment News, Sachin Ahir, Srirang Barne, Career Guidance, AI Jobs, Maharashtra Politics

Search Description: Shiv Sena organized a massive Job Fair in Pimpri Chinchwad, offering over 2,000 employment opportunities. Legislative Council Deputy Chairperson Sachin Ahir emphasized AI career guidance and job creation.

Hashtags: #PimpriChinchwad #JobFair #EmploymentNews #ShivSena #CareerGuidance #Jobs2026 #MaharashtraNews