पुणे पोलिसांचा मोठा निर्णय: संपूर्ण शहरात १४ दिवसांसाठी मनाई आदेश लागू; पाच किंवा त्यापेक्षा जास्त लोकांच्या जमवावजमावीवर आणि सभा-मिरवणुकांवर बंदी!

पुणे: पुणे शहरात आगामी काळातील सण-उत्सव, राजकीय पक्षांची आंदोलने, मोर्चे, धरणे आणि निदर्शने यांच्या पार्श्वभूमीवर कायदा व सुव्यवस्था अबाधित राखण्यासाठी पुणे पोलीस प्रशासनाने महत्त्वपूर्ण निर्णय घेतला आहे. पुणे शहर पोलीस आयुक्तालय कार्यक्षेत्रात संपूर्ण शहरासाठी पुढील १४ दिवसांचा विशेष मनाई आदेश (प्रतिबंधात्मक आदेश) लागू करण्यात आला आहे.

पोलीस उप-आयुक्त (विशेष शाखा, पुणे शहर) डॉ. प्रशांत अमृतकर यांनी महाराष्ट्र पोलीस अधिनियम १९५१ चे कलम ३७ (१)(२)(३) मधील अधिकारांचा वापर करून हे आदेश जारी केले आहेत. हा मनाई आदेश दिनांक ०४ ऑगस्ट २०२६ रोजी मध्यरात्री ००:०१ वाजेपासून ते दिनांक १७ ऑगस्ट २०२६ रोजी रात्री २४:०० वाजेपर्यंत (एकूण १४ दिवस) लागू राहणार आहे.

 
कायदेविषयक पार्श्वभूमी आणि आदेशाचे कारण
पुणे शहर हे राजकीय, सामाजिक आणि सांस्कृतिकदृष्ट्या अत्यंत संवेदनशील व महत्त्वाचे केंद्र मानले जाते. शहरात जनतेच्या विविध मागण्यांसाठी विविध राजकीय पक्ष, सामाजिक संघटना यांच्याकडून मोर्चे, धरणे आंदोलने, निदर्शने, बंद आणि उपोषणांचे आयोजन केले जाते. तसेच रस्ते अतिक्रमण हटवण्याच्या कारवाईदरम्यान किंवा सार्वजनिक सण-उत्सवांच्या काळात कायदा व सुव्यवस्थेचा प्रश्न निर्माण होण्याची शक्यता नाकारता येत नाही.
या सर्व बाबींचा गांभीर्याने विचार करून शहरातील सार्वजनिक शांतता, सलोखा आणि मानवी सुरक्षितता टिकवून ठेवण्यासाठी पोलीस प्रशासनाने हे प्रतिबंधात्मक पाऊल उचलले आहे.

 
या कृत्यांवर आणि बाबींवर असणार पूर्ण बंदी
पोलीस उप-आयुक्तांनी जारी केलेल्या आदेशानुसार, १४ दिवसांच्या कालावधीत खालील कृत्ये करण्यास सक्त मनाई करण्यात आली आहे:
शस्त्रास्त्रे व घातक पदार्थ बाळगणे: कोणत्याही प्रकारचे दाहक, स्फोटक अथवा ज्वलनशील द्रव्य पदार्थ बरोबर नेणे.
दगड व क्षेपणास्त्रे एकत्र करणे: दगड, शस्त्रे, अस्त्रे, किंवा फेकावयाची हत्यारे एकत्र करणे, जमा करणे अथवा तयार करणे.
शारीरिक इजा करणारी साधने: शस्त्रे, सोते, भाले, तलवारी, दंड, काठ्या, बंदुका अथवा शारीरिक इजा करण्यासाठी वापरता येईल अशी कोणतीही वस्तू सोबत बाळगणे.
प्रतिक्रयात्मक दहन व चित्रे: कोणत्याही इसमाचे चित्र, प्रतीकात्मक प्रेताचे दहन, पुतळ्यांचे प्रदर्शन किंवा दहन करणे.
गोंधळ व आक्षेपार्ह घोषणा: मोठ्याने अवाच्य घोषणा देणे, सार्वजनिक टीका करणे, उच्चार गाणी गाणे किंवा वाद्य वाजवणे.
सार्वजनिक नीतिमत्तेला बाधा आणणारे कृत्य: शालिनता किंवा शिष्टाचाराच्या विरोधात असणारे चित्रे, चिन्हे, फलक लावणे, प्रदर्शन करणे ज्या मुळे सार्वजनिक नीतिमत्ता किंवा सुरक्षा धोक्यात येईल.
प्रक्षोभक भाषणे व प्रचार: आवेशपूर्ण भाषणे करणे, प्रक्षोभक कृत्य करणे किंवा राज्य उलथवून टाकण्यास प्रवृत्त करेल असा कोणताही जिन्नस तयार करून प्रसिद्ध करणे.
सोशल मीडिया व 'गुन्हेगारी रील्स'वर बंदी: गुन्हेगारांची किंवा गुन्हेगारीचे उदात्तीकरण करणारी रील्स (Reel) बनवून सोशल मीडियावर टाकून दहशत पसरवणे किंवा धमकी देणे यावर पूर्ण बंदी असेल.

 
जमावबंदी आणि सभा-मिरवणुकांवर मर्यादा
महाराष्ट्र पोलीस अधिनियम सन १९५१ च्या कलम ३७ च्या पोटकलम (३) नुसार, पोलीस आयुक्त (पुणे शहर) यांच्या पूर्वपरवानगीशिवाय पाच किंवा पाचपेक्षा जास्त लोकांचा जमाव करण्यास, सभा घेण्यास किंवा मिरवणूक काढण्यास पूर्णपणे बंदी घालण्यात आली आहे.

 
अपवाद आणि शिथिलता
हा मनाई आदेश खालील घटकांसाठी लागू असणार नाही: 

१. शासनाच्या सेवेतील व्यक्ती ज्यांना आपल्या वरिष्ठांच्या आदेशानुसार कर्तव्यपूर्तीसाठी हत्यार बाळगणे आवश्यक आहे.
२. खाजगी सुरक्षा रक्षक, गुरखा किंवा चौकीदार जे केवळ ३.५ फूट लांबीपर्यंतच्या लाठ्या बाळगतात.

 
उल्लंघनावर होणार कडक कारवाई
सदर आदेशाची मुदत संपल्यानंतरही, आदेशाच्या कालावधीत झालेल्या कोणत्याही उल्लंघनासंदर्भात दंड, जप्ती किंवा कायदेशीर कारवाई चालू ठेवली जाईल. जो कोणी या मनाई आदेशाचे उल्लंघन करेल, ती व्यक्ती महाराष्ट्र पोलीस अधिनियम सन १९५१ चे कलम १३५ प्रमाणे शिक्षेस पात्र राहील, असा स्पष्ट इशारा पोलीस प्रशासनाने दिला आहे.

सदर आदेशास सर्व सार्वजनिक ठिकाणी ठळकपणे प्रसिद्धी देण्याचे तसेच ध्वनिवर्धकाद्वारे प्रसारित करण्याचे आदेश सर्व वरिष्ठ पोलीस निरीक्षकांना देण्यात आले आहेत.

• Labels: Pune Police, Prohibitory Orders Pune, Pune Crime News, Law and Order Pune, Section 37 Maharashtra Police Act, Pune News

• Search Description: Pune Police issued 14-day prohibitory orders under Section 37(1)(2)(3) of Maharashtra Police Act from Aug 4 to Aug 17, 2026, banning assemblies and dangerous reels.

Hash Tags

#PunePolice #LawAndOrder #ProhibitoryOrders #PuneNews #Section37 #MaharashtraPolice #BreakingNewsPune #PoliceNotice