पिंपरी, पुणे | २९ जुलै २०२६ : पिंपरी-चिंचवड शहरातील वाकड पोलीस ठाण्याच्या हद्दीत मंगळवारी घडलेल्या अल्पवयीन मुलीवरील बलात्कार प्रकरणातील गुन्हेगाराला कठोरात कठोर शिक्षा व्हावी, यासाठी तपास अत्यंत जलद गतीने पूर्ण करावा. तसेच अल्पवयीन पीडित मुलगी आणि तिच्या कुटुंबाला शासकीय सहाय्य व कायदेशीर मदत ताबडतोब मिळावी, यासाठी प्रशासनाने तातडीने हालचाली कराव्यात, अशी आग्रही मागणी उद्धव बाळासाहेब ठाकरे पक्षाचे शहरप्रमुख चेतन पवार यांनी पोलीस प्रशासनाकडे केली आहे.
चेतन पवार यांच्या नेतृत्वाखालील एका विशेष शिष्टमंडळाने मंगळवारी या प्रकरणाचा तपास करत असलेले सहाय्यक आयुक्त कुराडे यांची प्रत्यक्ष भेट घेऊन त्यांना मागण्यांचे निवेदन दिले. या वेळी ज्येष्ठ नेते मानव कांबळे, काँग्रेस शहराध्यक्ष नरेंद्र बनसोडे, शिवसेनेच्या जिल्हा संघटिका अनिता तुतारे, उपजिल्हा संघटिका कल्पना शेटे यांच्यासह योगिनी मोहन, तस्लिम शेख, गीता कुसाळकर, कमल गोडांबे, वंदना खंडागळे, श्रद्धा शिंदे, सिद्दिकी शेख, अमर सोनवणे, स्वप्निल बनसोडे, अश्विन ढमाले आणि सुमित निकाळजे हे प्रतिनिधी व कार्यकर्ते उपस्थित होते.
माध्यम प्रतिनिधींशी संवाद साधताना चेतन पवार यांनी शहरातील महिला सुरक्षेच्या गंभीर परिस्थितीवर तीव्र चिंता व्यक्त केली. अशा प्रकारच्या विकृत घटनांमुळे पिंपरी-चिंचवड शहराच्या सांस्कृतिक आणि सामाजिक सुरक्षिततेच्या प्रतिमेला मोठा डाग लागत आहे. अल्पवयीन मुली किंवा महिलांवर कोणत्याही प्रकारचा अन्याय अथवा अत्याचार करण्याचे धाडस गुन्हेगारांनी करू नये, असा कडक वचक कायदा व सुव्यवस्थेच्या माध्यमातून निर्माण करण्याची नितांत गरज असल्याचे त्यांनी स्पष्ट केले.
शहरात अल्पवयीन मुलींवरील अत्याचाराच्या घटनांना आळा घालण्यासाठी पोलीस प्रशासनाने प्रतिबंधात्मक उपाययोजनांवर भर दिला पाहिजे. यासाठी शाळा, महाविद्यालये, सार्वजनिक ठिकाणी, तसेच मुख्यत्वे झोपडपट्टी व संवेदनशील परिसरात दिवस-रात्र पोलीस गस्त वाढवण्यात यावी. त्याचप्रमाणे विशेष सुरक्षा पथके, मार्शल आणि 'दामिनी पथक' अधिक क्रियाशील व सतर्क ठेवण्यात यावेत, अशी मागणी त्यांनी केली.
पीडित अल्पवयीन मुलगी आणि तिच्या कुटुंबावर कोसळलेल्या या संकटसमयी शासनाच्या मनोधैर्य किंवा इतर कल्याणकारी योजनांच्या माध्यमातून तातडीने आर्थिक व वैद्यकीय मदत पुरवली जाणे अत्यंत आवश्यक आहे. यासाठी पिंपरी-चिंचवडच्या पोलीस आयुक्तांनी स्वतः या विषयात वैयक्तिक लक्ष घालून संबंधित विभागांना वेगाने प्रक्रिया पूर्ण करण्याचे निर्देश द्यावेत, असे आवाहनही चेतन पवार यांनी या वेळी केले.
Labels: Wakad Crime News, Pimpri Chinchwad Police, Chetan Pawar, Crime Against Women, Damini Pathak, PCMC News
Search Description: Delegation led by Chetan Pawar submits memorandum to ACP Kurade demanding strict punishment for Wakad rape case accused and financial support for minor victim.
Hashtags: #PimpriChinchwad #WakadNews #WomenSafety #PimpriPolice #ChetanPawar #PCMC #JusticeForVictim
कोणत्याही टिप्पण्या नाहीत:
टिप्पणी पोस्ट करा