पिंपरी-चिंचवड | २८ जुलै २०२६ : पिंपरी-चिंचवड शहराला मुख्य पाणीपुरवठा करणारे पवना धरण शंभर टक्के भरले असून शहरासाठी पुरेसा पाणीसाठा उपलब्ध झाला आहे. तरीही पिंपरी-चिंचवड महानगरपालिकेकडून शहरात एक दिवसाआड पाणीपुरवठा सुरू असल्याने नागरिकांना नाहक त्रासाला सामोरे जावे लागत आहे. त्यामुळे पालिकेने एक दिवसाआड पाणीपुरवठा करण्याची पद्धत तात्काळ बंद करून पिंपरी-चिंचवडकरांना दररोज व मुबलक पाणीपुरवठा पूर्ववत सुरू करावा, अशी आग्रही मागणी आम आदमी पार्टीचे कामगार आघाडी अध्यक्ष शुभम यादव यांनी पिंपरी-चिंचवड महानगरपालिका आयुक्तांकडे एका निवेदनाद्वारे केली आहे.
पिंपरी-चिंचवड शहराची वाढती लोकसंख्या आणि पाण्याची वाढती मागणी लक्षात घेता पवना धरणातील साठा अत्यंत महत्त्वाचा मानला जातो. या वर्षी झालेल्या मुसळधार पावसामुळे पवना धरण पूर्ण क्षमतेने म्हणजेच शंभर टक्के भरले आहे. यामुळे पुढील संपूर्ण वर्षासाठी शहराला पुरेसा ठरेल एवढा साठा जलशय क्षेत्रात जमा झाला आहे. असे असतानाही महापालिका प्रशासनाकडून शहरात अद्यापही एक दिवसाआड पाणीपुरवठा केला जात आहे.
महानगरपालिका आयुक्तांना सादर केलेल्या निवेदनात शुभम यादव यांनी प्रशासकीय कारभारावर तीव्र ताशेरे ओढले आहेत. धरणात मुबलक पाणी उपलब्ध असताना केवळ पालिकेच्या पाणीपुरवठा विभागाच्या ढिसाळ आणि अयोग्य नियोजनामुळे नागरिकांना पिण्याच्या पाण्यासाठी वणवण भटकावे लागत आहे. नियमित आणि वेळेवर पाणीपुरवठा होत नसल्याने शहरातील सर्वसामान्य नागरिकांच्या घरगुती वापरासह त्यांच्या दैनंदिन जीवनावर आणि रोजच्या कामांवर अत्यंत विपरीत परिणाम होत आहे.
धरणात पाणीसाठा पूर्ण असतानाही नागरिकांना हक्काच्या पाण्यासाठी वंचित ठेवणे अत्यंत अयोग्य आणि अन्यायकारक आहे, असे मत शुभम यादव यांनी व्यक्त केले. पिंपरी-चिंचवड शहरातील कोणत्याही भागातील किंवा झोपडपट्टीतील नागरिकांना पाणीटंचाईचा सामना करावा लागू नये, यासाठी महापालिका आयुक्तांनी स्वतः हस्तक्षेप करावा. पाणीपुरवठा विभागाला तात्काळ कडक व योग्य ते निर्देश देऊन संपूर्ण शहरात विनाविलंब, सुरळीत, दररोज आणि मुबलक पाणीपुरवठा सुरू करावा, अशी ठाम मागणी आम आदमी पार्टीच्या वतीने या निवेदनात करण्यात आली आहे.
Labels: Pimpri Chinchwad, Pavana Dam, Water Supply Update, PCMC Commissioner, Aam Aadmi Party, Shubham Yadav, Pimpri News
Search Description: Pavana Dam reaches 100 percent capacity. AAP Labor Wing President Shubham Yadav demands PCMC Commissioner to restore daily water supply in Pimpri Chinchwad.
Hashtags: #PimpriChinchwad #PavanaDam #WaterSupply #PCMC #AamAadmiParty #PimpriNews #DailyWaterSupply
Reviewed by ANN news network
on
७/२९/२०२६ ११:५७:०० AM
Rating:
कोणत्याही टिप्पण्या नाहीत: