प्रसिद्ध व्याघेश्वर महादेव मंदिरातील दानपेटी चोरणारी टोळी गजाआड

मुंबई: दादर पूर्व येथील नायगाव परिसरातील प्रसिद्ध 'व्याघेश्वर महादेव मंदिरा'तील दानपेट्या चोरणाऱ्या ३ अट्टल आरोपींना भोईवाडा पोलीस ठाण्याच्या गुन्हे प्रकटीकरण पथकाने शिताफीने अटक केली आहे. पोलिसांनी आरोपींकडून चोरीला गेलेल्या दोन्ही दानपेट्या आणि त्यामधील रोकड असा एकूण ९,००० रुपयांचा संपूर्ण मुद्देमाल हस्तगत केला आहे. धार्मिक स्थळावरील चोरीच्या या संवेदनशील गुन्ह्याचा छडा अवघ्या काही तासांत लावण्यात पोलिसांना यश आले आहे.

पोलिसांनी दिलेल्या माहितीनुसार, सदानंद जाधव मार्ग, नायगाव येथील व्याघेश्वर महादेव मंदिरात २८ जून २०२६ च्या रात्री ९:०० ते २९ जून २०२६ च्या सकाळी ६:०० वाजेच्या दरम्यान ही चोरी झाली होती. अज्ञात चोरांनी मंदिराचा कडीकोयंडा तोडून आतील दोन दानपेट्या पळवून नेल्या होत्या. याप्रकरणी मंदिराच्या पुजाऱ्यांनी दिलेल्या तक्रारीवरून भोईवाडा पोलीस ठाण्यात भारतीय न्याय संहिता (BNS) कलम ३३२ब, ३३१(४), ३(५) अन्वये गुन्हा नोंद करण्यात आला होता.

घटनेचे गांभीर्य ओळखून वरिष्ठ पोलीस अधिकाऱ्यांच्या मार्गदर्शनाखाली विशेष शोध पथक तयार करण्यात आले. गुन्हे प्रकटीकरण पथकाने घटनास्थळाचा तांत्रिक अभ्यास आणि गुप्त माहितीच्या आधारे रोहित मल्लेश खंडागळे (वय २१, रा. शिवडी), आदित्य रमेश प्रसाद (वय २२, रा. ॲन्टॉपहिल) आणि साहिल शेख उर्फ मांडवा (रा. ॲन्टॉपहिल) या तीन संशयितांना ताब्यात घेतले. पोलीस खाक्या दाखवताच आरोपींनी गुन्ह्याची कबुली दिली, त्यानंतर त्यांच्याकडून संपूर्ण मुद्देमाल जप्त करण्यात आला. ही यशस्वी कारवाई पोलीस आयुक्त देवेन भारती, सह आयुक्त मनोजकुमार शर्मा, अनिल कुंभारे आणि वरिष्ठ पोलीस निरीक्षक कैलास आव्हाड यांच्या नेतृत्वाखालील पथकाने केली.

• Labels: Mumbai Crime News, Temple Theft, Mumbai Police, Dadar East Crime, Crime Detection

• Search Description: Mumbai's Bhoiwada police successfully cracked the Vagheshwar Mahadev temple theft case in Dadar East, arresting three youth and recovering stolen donation boxes.

• Hashtags: #MumbaiCrime #TempleTheft #MumbaiPolice #DadarNews #CrimeBranch #LawAndOrder