स्पर्धेच्या युगात टिकण्यासाठी विद्यार्थ्यांनी ध्येयवादी राहावे: खासदार श्रीरंग बारणे

 

 चिंचवडे लॉन्स येथे ५०० गुणवंत विद्यार्थ्यांचा खासदार श्रीरंग बारणे यांच्या हस्ते गौरव, दत्तनागरी पतसंस्थेचा स्तुत्य उपक्रम

पिंपरी (विशेष प्रतिनिधी): सध्याचे युग हे अत्यंत तीव्र स्पर्धेचे युग आहे. या स्पर्धेत स्वतःचे वेगळे अस्तित्व निर्माण करण्यासाठी आणि टिकून राहण्यासाठी विद्यार्थ्यांनी केवळ औपचारिक पदवीवर अवलंबून न राहता ध्येयवादी बनून अहोरात्र कष्ट उपसण्याची तयारी ठेवली पाहिजे, असे प्रतिपादन मावळचे खासदार श्रीरंग बारणे यांनी केले.

थेरगाव येथील श्री दत्तनागरी सहकारी पतसंस्था आणि शिवसेना गटनेते विश्वजीत बारणे यांच्या संयुक्त विद्यमाने आयोजित गुणवंत विद्यार्थी सत्कार समारंभात ते बोलत होते. चिंचवड येथील चिंचवडे लॉन्स येथे हा भव्य सोहळा पार पडला. या वेळी सन २०२६ च्या माध्यमिक (दहावी) व उच्च माध्यमिक (बारावी) परीक्षेत उल्लेखनीय यश संपादन केलेल्या ५०० गुणवंत विद्यार्थ्यांना सन्मानचिन्ह व प्रशस्तीपत्र देऊन गौरविण्यात आले.

खासदार श्रीरंग बारणे आणि 'वीण दोघांतली हि तुटेना' (आधीरा) या लोकप्रिय मराठी मालिकेतील अभिनेत्री पोर्णिमा डे यांच्या हस्ते विद्यार्थ्यांचा सत्कार करण्यात आला. या वेळी व्यासपीठावर युवा सेनेचे पश्चिम महाराष्ट्र सचिव व शिवसेना गटनेते विश्वजीत बारणे, शिवसेना महिला उपनेत्या सुलभा उबाळे, जिल्हाप्रमुख बाळासाहेब वाल्हेकर, शहरप्रमुख निलेश तरस, महिला जिल्हा संघटीका शिला भोंडवे, उपजिल्हा महिला संघटीका शैला निकम, जिल्हा प्रमुख राजेंद्र तरस, सागर पाचरणे, शहर संघटिका सरिता साने, माजी नगरसेविका विमल जगताप, युवती सेनेच्या श्वेता कापसे, युवती सेना जिल्हा संघटिका सायली साळवी, श्री दत्तनागरी सहकारी पतसंस्थेचे उपाध्यक्ष दिलीप बोंबले पाटील, संचालक हनुमंत माळी, धनाजी बारणे, अनंत येळवंडे, दिपाली गुजर यांसह संस्थेचे पदाधिकारी, गुणवंत विद्यार्थी आणि पालक मोठ्या संख्येने उपस्थित होते.

सुप्त गुण ओळखा अन् ध्येयाकडे वाटचाल करा

गुणवंत विद्यार्थ्यांना मार्गदर्शन करताना खासदार श्रीरंग बारणे म्हणाले की, प्रत्येक विद्यार्थ्याच्या अंगात काही ना काही सुप्त गुण, कला आणि क्षमता दडलेली असते. ती क्षमता वेळेत ओळखून स्वतःचे ध्येय निश्चित केले पाहिजे. आजच्या काळात केवळ पुस्तकी ज्ञान किंवा पदवी मिळवणे पुरेसे नाही, तर बदलत्या तंत्रज्ञानानुसार बौद्धिक आणि व्यावसायिक कौशल्यांचे ज्ञान आत्मसात करणे अत्यंत गरजेचे झाले आहे.

आई-वडील अत्यंत हलाखीच्या आणि प्रतिकूल परिस्थितीतून आपल्या पाल्यांना शिक्षण देत असतात. या कष्टाची अन् त्यागाची जाणीव प्रत्येक विद्यार्थ्याने आपल्या मनात ठेवली पाहिजे. शिक्षणाला कोणतीही वयोमर्यादा किंवा सीमा नसते. त्यामुळे वाढत्या गुणांच्या टक्केवारीसोबतच विद्यार्थ्यांनी आपल्या आवडीच्या क्षेत्रात सर्वोच्च स्थान गाठण्यासाठी जिद्दीने प्रयत्न करावेत, असा सल्ला त्यांनी दिला.

अभ्यासासोबत क्रीडा आणि अध्यात्माची जोड द्या

कार्यक्रमप्रसंगी बोलताना शिवसेना गटनेते विश्वजीत बारणे यांनी विद्यार्थ्यांनी स्वतःची आवड ओळखून करिअरचा मार्ग निवडण्याचे आवाहन केले. सायन्स, इंजिनिअरिंग, आर्ट्स किंवा कॉमर्स अशा कोणत्याही शाखेत उत्तम संधी उपलब्ध आहेत. परंतु, पालकांच्या किंवा समाजाच्या दबावाखाली न येता आपल्याला कोणत्या क्षेत्रात उत्तुंग कामगिरी करायची आहे, हे स्वतः ठरवून त्यात स्वतःला झोकून देऊन अभ्यास केला पाहिजे, असे ते म्हणाले.

अभ्यासाच्या ताणतणावातून मुक्त राहण्यासाठी क्रीडा आणि अध्यात्माची जोड देणे तितकेच महत्त्वाचे आहे. आपल्या यशामागे घरातील सर्वांचे कष्ट दडलेले असतात, त्याची जाणीव ठेवून विद्यार्थ्यांनी पुढे जावे, असे त्यांनी नमूद केले.

मुलींसाठी स्वसंरक्षण आणि कला क्षेत्रातील संधी

या सोहळ्यात बोलताना शिवसेना महिला उपनेत्या सुलभा उबाळे यांनी उत्तीर्ण विद्यार्थ्यांमध्ये मुलींचे प्रमाण अधिक असल्याचे सांगून समाधान व्यक्त केले. आजच्या काळात मुलींनी केवळ शैक्षणिक प्रगतीवर न थांबता स्वतःच्या सुरक्षेसाठी स्वसंरक्षणाचे धडे गिरवणे अत्यंत काळाची गरज बनली आहे, यावर त्यांनी भर दिला.

अभिनेत्री पोर्णिमा डे यांनी श्री दत्तनागरी सहकारी पतसंस्थेच्या या सातत्यपूर्ण उपक्रमाचे मनापासून कौतुक केले. आपल्या शालेय जीवनातील आठवणींना उजाळा देताना त्या म्हणाल्या की, मी अभ्यासात टॉपर होते, मात्र मला अभिनय आणि कला क्षेत्राची प्रचंड आवड होती. योग्य वेळी ती आवड जोपासल्यामुळे आज मी या क्षेत्रात यश मिळवू शकले. आजच्या पिढीला अशा कार्यक्रमांतून मिळणारे प्रोत्साहन हे त्यांच्या भविष्यातील उज्ज्वल कारकिर्दीचा पाया ठरत आहे.

कार्यक्रमाचे सूत्रसंचालन सदाशिव कोंडे यांनी केले, तर उपस्थितांचे आभार धनाजी बारणे यांनी मानले. थेरगाव येथील श्री दत्तनागरी सहकारी पतसंस्थेच्या माध्यमातून सामाजिक बांधिलकी जपत गेल्या अनेक वर्षांपासून हा गुणगौरव सोहळा उपक्रम सातत्याने राबवला जात असून, यावर्षीही तो मोठ्या उत्साहात पार पडला.

• Labels:

  Srirang Barne, Pimpri Chinchwad News, Student Felicitation, Thergaon News, Education Update, Dattanagari Pattsanstha, SSC HSC Result 2026

• Search Description:

  MP Srirang Barne felicitated 500 SSC and HSC meritorious students in Chinchwad. Read his key advice to students on career goals, hard work, and professional skills.

• Hashtags:

  #SrirangBarne #PimpriChinchwad #StudentFelicitation #EducationNews #Thergaon #SSC2026 #HSC2026