नऱ्हे हद्दीत २२.९१ लाखांचा प्रतिबंधित गुटखा जप्त, दोघे जेरबंद

पुणे: गुजरात राज्यातील अहमदाबाद येथून ट्रॅव्हल्स बसमधून पुणे शहरात विक्रीसाठी आणलेला २२,९१,५३४ रुपये किमतीचा प्रतिबंधित गुटखा व तंबाखूजन्य पदार्थांचा साठा नऱ्हे पोलिसांनी २३ जून २०२६ रोजी जप्त केला आहे. या कारवाईत पोलिसांनी नवले ब्रिजखाली सापळा रचून ट्रॅव्हल्स बस चालकासह माल स्वीकारणाऱ्या आरोपीला अटक केली असून त्यांच्याकडून दोन वेगवेगळ्या ठिकाणी कारवाई करत एकूण मुद्देमाल हस्तगत केला आहे.

नऱ्हे पोलीस ठाण्याचे तपास पथक परिसरात गस्त घालत असताना, अमंलदार देवा चव्हाण यांना एका ट्रॅव्हल्स बसमधून प्रतिबंधित गुटखा विक्रीसाठी आणला जात असल्याची खात्रीशीर माहिती मिळाली. या माहितीच्या आधारे वरिष्ठ पोलीस निरीक्षक वर्षा देशमुख, निरीक्षक (गुन्हे) ईश्वर चव्हाण आणि उपनिरीक्षक विजयसिंह घाडगे यांच्या तपास पथकाने नवले ब्रिजखाली सापळा रचला व संशयास्पद ट्रॅव्हल्स बस थांबवून तिची झडती घेतली. बस चालवणाऱ्या हबास मुबारक खान (वय ३४ वर्षे, रा. जिल्हा बाडमेर, राजस्थान) याच्या ताब्यातून ५,९०,८०० रुपये किमतीचा प्रतिबंधित विमल पान मसाला, व्ही १ तंबाखू, आर एम डी पानमसाला, तुळशी तंबाखू आणि गोवा गुटखा जप्त करण्यात आला.

पोलिसांनी घटनास्थळावरून माल घेण्यासाठी आलेल्या सोहेल अस्लम मुलाणी (वय २२ वर्षे, रा. ६६७, गंजपेठ, पुणे) याला देखील ताब्यात घेतले. त्याची कसून चौकशी केली असता, त्याने स्वतःच्या आर्थिक फायद्यासाठी केदारीनगर, पुणे येथील एका गोडाऊनमध्ये आणखी प्रतिबंधित माल लपवून ठेवल्याचे कबूल केले. पोलिसांनी सदर गोडाऊनवर छापा टाकून १७,००,७३४ रुपयांचा अतिरिक्त मुद्देमाल जप्त केला. आरोपींनी हा माल अहमदाबाद येथून आणल्याचे सांगितले असून, त्यांच्याविरुद्ध नऱ्हे पोलीस ठाण्यात गुन्हा रजि. नं. ११४/२०२६ नुसार भारतीय न्याय संहिता (BNS) तसेच सिगारेट व अन्य तंबाखूजन्य उत्पादने अधिनियम आणि अन्न सुरक्षा व मानके अधिनियमाच्या विविध कलमांनुसार गुन्हा दाखल करण्यात आला आहे. या गुन्ह्याचा पुढील तपास उपनिरीक्षक विजयसिंह घाडगे करत आहेत.

सदर कामगिरी अप्पर आयुक्त (पश्चिम प्रादेशिक विभाग) राजेश बनसोडे, उप-आयुक्त (परिमंडळ ३) सागर कवडे, सहायक आयुक्त (सिंहगडरोड विभाग) विजय कूंभार यांच्या मार्गदर्शनाखाली वरिष्ठ निरीक्षक वर्षा देशमुख, निरीक्षक ईश्वर चव्हाण, उपनिरीक्षक विजयसिंह घाडगे, किरण लिटे, अंमलदार देवा चव्हाण, सुनील चव्हाण, कार्तिक कोंडे, प्रणिल मेस्त्री, सुमित जगताप, राजु तोरे, नितीन वाघमारे आणि निलेश भोरडे यांच्या पथकाने केली आहे.

• Labels: Pune Police, Gutkha Seized Pune, Narhe Police Station, Crime Branch Pune, Gujarat To Pune Smuggling

• Search Description: Pune Police seized banned gutkha worth Rs 22.91 lakhs smuggled from Gujarat in a travels bus near Navale Bridge, Narhe.

• Hashtags: #PunePolice #GutkhaSeized #NarhePolice #PuneCrime #AntiSmuggling #MaharashtraPolice