महानगर गॅस बिल अपडेटच्या नावाखाली १० लाखांची सायबर फसवणूक; दोन हायटेक भामट्यांना अटक

मुंबई, ९ ऑगस्ट २०२६: महानगर गॅस लिमिटेड कंपनीमधून बोलत असल्याचे भासवून गॅस बिल अपडेट न केल्यास कनेक्शन खंडित करण्याची भीती दाखवून सर्वसामान्य नागरिकांची लाखो रुपयांची फसवणूक करणाऱ्या आंतरराज्य सायबर टोळीचा दहिसर पोलिसांनी पर्दाफाश केला आहे. मोबाईलवर बनावट एपीके (APK) फाईल पाठवून नागरिकांच्या फोनचा बेकायदेशीर ताबा मिळवणाऱ्या आणि त्यांच्या बँक खात्यांमधून पैसे लाटणाऱ्या या टोळीतील दोन सक्रिय हस्तकांना दहिसर पोलीस ठाण्याच्या पथकाने मुसक्या आवळल्या आहेत. या कारवाईत पोलिसांनी जोगेश्वरी आणि वसई परिसरातून दोन आरोपींना अटक केली असून, त्यांच्याविरोधात भारतीय न्याय संहितेनुसार गुन्हा दाखल करण्यात आला आहे.

 
एपीके फाईलद्वारे मोबाईल हॅक करून तब्बल १० लाखांची फसवणूक
मुंबईतील बोरीवली पूर्व भागात राहणाऱ्या ६८ वर्षीय ज्येष्ठ नागरिकाने दिलेल्या तक्रारीवरून २ ऑगस्ट २०२६ रोजी दहिसर पोलीस ठाण्यात गुन्हा नोंदवण्यात आला होता. २५ जुलै २०२६ रोजी दुपारी ४ वाजता तक्रारदारांना विनय शर्मा नावाच्या एका अनोळखी इसमाने फोन केला. त्याने स्वतः महानगर गॅस लिमिटेड कंपनीचा प्रतिनिधी असल्याचे भासवत गॅस बिल अपडेट केले नाही तर कनेक्शन लगेच कट केले जाईल, अशी भीती दाखवली. त्यानंतर मदत करण्याच्या बहाण्याने त्याने तक्रारदाराच्या व्हॉट्सॲपवर एक एपीके फाईल पाठवली. तक्रारदाराने ती फाईल डाऊनलोड करताच संशयिताने त्यांच्या मोबाईलचा थेट ताबा मिळवला. त्यानंतर तक्रारदाराच्या संमतीशिवाय त्यांच्या 'बँक ऑफ महाराष्ट्र'च्या खात्यातून आणि इतर बँकांमधून टप्प्याटप्प्याने एकूण ९ लाख ९८ हजार ३६७ रुपये अज्ञात खात्यांमध्ये वळवून त्यांची मोठी फसवणूक केली.

 
दहिसर पोलिसांचे तांत्रिक कौशल्य आणि आरोपींना बेड्या
घटनेचे गांभीर्य लक्षात घेऊन उत्तर विभागाचे पोलीस उपआयुक्त गजानन देशमाने, दहिसर विभागाचे सहाय्यक पोलीस आयुक्त जयराज रणवरे आणि वरिष्ठ पोलीस निरीक्षक सर्जेराव पाटील यांच्या मार्गदर्शनाखाली तपासाची चक्रे वेगाने फिरवण्यात आली. पोलीस निरीक्षक राजेंद्र दहिफळे, सहाय्यक पोलीस निरीक्षक संदीप पाचांगणे आणि त्यांच्या पथकाने फसवणुकीची रक्कम जमा झालेल्या बँक खात्यांचे तांत्रिक विश्लेषण केले.

तपासादरम्यान पोलिसांना आढळले की, आरोपींनी कॅनरा बँक आणि आयसीआयसीआय बँकेची खाती फसवणुकीचे पैसे स्विकारण्यासाठी वापरली होती. २५ जुलै रोजी तक्रारदाराच्या खात्यातून ३ लाख ४९ हजार ८५६ रुपये एका कॅनरा बँकेच्या खात्यात जमा झाले होते, तर २ लाख रुपये आयसीआयसीआय बँकेच्या खात्यात वर्ग झाले होते. या तांत्रिक धागेदोऱ्यांचा पाठपुरावा करत पोलिसांनी मुंबईतील जोगेश्वरी येथून आर्यन राजेश गुप्ता (वय २१ वर्षे) आणि वसई येथून अंकित संजय तिवारी (वय २४ वर्षे) या दोघांना अटक केली.

तपासात उघड झाले की, आर्यन गुप्ता याने स्वतःच्या वैयक्तिक कागदपत्रांच्या आधारे कॅनरा बँकेत चालू खाते उघडले होते आणि त्यामध्ये फसवणुकीची रक्कम स्वीकारली होती. तर अंकित तिवारी याच्या आयसीआयसीआय बँकेच्या खात्यावर २ लाख रुपये प्राप्त झाले होते. या दोन्ही आरोपींनी सायबर गुन्ह्यातील फसवणुकीची रक्कम प्राप्त करून तिची परस्पर विल्हेवाट लावली होती.

 
पोलीस प्रशासनाकडून नागरिकांना सतर्कतेचे आवाहन
सायबर गुन्हेगारांच्या वाढत्या जाळ्याच्या पार्श्वभूमीवर पोलीस प्रशासनाने सर्वसामान्य नागरिकांना खबरदारी घेण्याचे आवाहन केले आहे. व्हॉट्सॲप किंवा इतर सोशल मीडियावरून कोणत्याही अनोळखी व्यक्तीने पाठवलेली एपीके फाईल डाऊनलोड करू नये. गॅस बिल, लाईट बिल किंवा केवायसी (KYC) अपडेट करण्याच्या नावाखाली येणाऱ्या कोणत्याही धमकी अथवा आमिषाला बळी पडू नये, असे पोलिसांनी स्पष्ट केले आहे.

अशा प्रकारची फसवणूक झाल्यास किंवा संशय आल्यास नागरिकांनी तात्काळ कोणत्याही आर्थिक व्यवहाराशिवाय राष्ट्रीय सायबर हेल्पलाइन '१९३०' वर अथवा cybercrime.gov.in आणि sancharsaathi.gov.in या अधिकृत संकेतस्थळांवर आपली तक्रार नोंदवावी, असे आवाहन पोलिसांनी केले आहे.

सदर उल्लेखनीय कामगिरी तपासी अधिकारी पोलीस निरीक्षक राजेंद्र दहिफळे, सहाय्यक पोलीस निरीक्षक संदीप पाचांगणे, पोलीस उपनिरीक्षक आकाश पाटील, श्रुती मालपोटे, हवालदार कल्पेश सुर्वे, शिपाई श्रीकांत देशपांडे, नितीन चव्हाण आणि महिला शिपाई सोनल मस्के यांच्या पथकाने यशस्वीरीत्या पार पाडली आहे.

Labels:

Mumbai Crime News, Dahisar Police, Cyber Crime Mumbai, Mahanagar Gas Fraud, APK File Scam, Mumbai Police

Search Description:

Dahisar Police arrest two cyber criminals from Jogeshwari and Vasai for defrauding a senior citizen of Rs 10 lakh using a fake Mahanagar Gas APK file.

Hashtags:

#MumbaiPolice #CyberCrime #DahisarPolice #MahanagarGasFraud #CyberSecurity #APKScam #MumbaiNews