अवघ्या ५०० रुपयांत 'पिंपरी-चिंचवड दर्शन'; आमदार शंकर जगताप यांची संकल्पना साकार

 

मोरया गोसावी मंदिर ते सायन्स पार्क; एकाच तिकिटात पर्यटकांना अनुभवता येणार शहराचे वैभव 

पिंपरी, दि. १० जून २०२६ (विशेष प्रतिनिधी): शहरातील समृद्ध ऐतिहासिक, सांस्कृतिक आणि धार्मिक वारसा पर्यटकांना सुलभतेने अनुभवता यावा म्हणून पुणे महानगर परिवहन महामंडळाने (PMPML) पुणे दर्शनच्या धर्तीवर 'पुणे व पिंपरी-चिंचवड दर्शन' (बससेवा क्र. २) ही विशेष पर्यटन बससेवा सुरू करण्याचा निर्णय घेतला आहे. चिंचवड विधानसभेचे आमदार शंकर जगताप यांनी २७ मे २०२६ रोजी पीएमपी प्रशासनासोबत घेतलेल्या विशेष बैठकीत केलेल्या सूचनेला प्रशासनाने सकारात्मक प्रतिसाद देत ही सेवा तातडीने कार्यान्वित करण्याचे आदेश दिले आहेत. अवघ्या ५०० रुपयांच्या तिकीट दरात ही एक दिवसीय सहल उपलब्ध होणार असून, यामुळे स्थानिक पर्यटनाला आणि अर्थव्यवस्थेला मोठी चालना मिळणार आहे.

पंतप्रधान नरेंद्र मोदी यांनी देशांतर्गत स्थानिक पर्यटनाला वाव देण्याचे आणि नागरिकांनी आपल्या शहरांमधील वारसा जवळून अनुभवण्याचे आवाहन केले होते. या आवाहनातून प्रेरणा घेऊन आमदार शंकर जगताप यांनी पीएमपी प्रशासनाकडे या विशेष बससेवेची मागणी लावून धरली होती. प्रशासनाने या प्रस्तावाची तातडीने दखल घेतल्यामुळे आता सर्व वयोगटातील नागरिकांना आणि शहरात येणाऱ्या पर्यटकांना परवडणाऱ्या दरात संपूर्ण शहराची सफर करता येणार आहे. या एक दिवसीय पर्यटन सहलीमध्ये विज्ञान, इतिहास आणि निसर्गाचा सुंदर संगम पाहायला मिळणार आहे. प्रवाशांच्या सुविधीसाठी या पर्यटन सहलीचे तिकीट बुक करण्यासाठी महामंडळाकडून लवकरच ऑनलाइन बुकिंग प्रणाली देखील सुरू करण्यात येणार आहे.

या पर्यटन सहलीमध्ये शहराच्या जडणघडणीत महत्त्वाचे स्थान असलेल्या प्रमुख ऐतिहासिक, धार्मिक आणि वैज्ञानिक केंद्रांचा समावेश करण्यात आला आहे. यामध्ये प्रामुख्याने चिंचवड येथील महासाधू मोरया गोसावी मंदिर, ऐतिहासिक मंगलमूर्ती वाडा, क्रांतीकारक चाफेकर बंधू स्मारक/वाडा, आधुनिक सायन्स पार्क आणि रावेत येथील भव्य इस्कॉन मंदिर या महत्त्वाच्या प्रेक्षणीय स्थळांचा समावेश आहे. या उपक्रमाविषयी बोलताना आमदार शंकर जगताप यांनी सांगितले की, पिंपरी-चिंचवड शहराला मोठा ऐतिहासिक आणि सांस्कृतिक वारसा लाभला आहे. हा समृद्ध वारसा तरुण पिढीला आणि पर्यटकांना एकाच प्रवासात अनुभवता यावा, हाच या उपक्रमामागील मुख्य उद्देश आहे. सर्वसामान्यांना परवडणाऱ्या ५०० रुपयांत ही सेवा उपलब्ध करून दिल्याबद्दल त्यांनी पीएमपी प्रशासनाचे आभार मानले आणि नागरिकांनी याचा मोठ्या संख्येने लाभ घेण्याचे आवाहन केले आहे.

Labels

Pimpri Chinchwad Darshan, PMPML Bus Service, Shankar Jagtap MLA, Pune Tourism, Chinchwad Tourism Spots, Public Transport Maharashtra

Search Description

PMPML launches Pimpri-Chinchwad Darshan bus service at just Rs 500, following instructions from MLA Shankar Jagtap to promote local culture, science, and history.

Hashtags

#PimpriChinchwadDarshan #PMPML #ShankarJagtap #PuneTourism #LocalTourism #MoryaGosavi #ChapekarWada #PuneBus