पुण्यात लॉरेन्स बिश्नोई गँगची दहशत; पाच कोटींच्या खंडणीसाठी स्टील व्यापाऱ्याच्या गोदामावर गोळीबार

 

बिश्नोई गँगने सोशल मीडियावर स्वीकारली जबाबदारी 

पुणे: पाच कोटी रुपयांची खंडणी न दिल्याचा राग मनात धरून कुख्यात लॉरेन्स बिश्नोई गँगच्या एका शार्पशूटरने पुणे-सासवड रस्त्यावरील फुरसुंगी पोलीस ठाण्याच्या हद्दीत एका स्टील व्यापाऱ्याच्या गोदामावर चार राऊंड गोळीबार केल्याची धक्कादायक घटना काल रात्री ८:१० वाजण्याच्या सुमारास घडली. ही माहिती फुरसुंगी येथील स्टील गोदामाचे मालक आणि फिर्यादी अमोल चामडिया यांनी दिलेल्या तक्रारीवरून समोर आली आहे. या गोळीबाराची जबाबदारी लॉरेन्स बिश्नोई गँगने सोशल मीडियावर एक व्हिडिओ पोस्ट करून स्वीकारली असून, मागणी पूर्ण न केल्यास पुढच्या वेळी थेट डोक्यात गोळी मारण्याची धमकी दिली आहे. या घटनेमुळे संपूर्ण पुणे शहरातील व्यापारी वर्गात प्रचंड भीतीचे आणि खळबळजनक वातावरण निर्माण झाले आहे.

या घटनेची सविस्तर पार्श्वभूमी अशी की, काल संध्याकाळी साडेसात वाजण्याच्या सुमारास फिर्यादी व्यापारी अमोल चामडिया यांच्या मोबाईलवर बिश्नोई गँगच्या आरजू बिश्नोई नावाच्या व्यक्तीचा फोन आला होता. फोन करणाऱ्याने चामडिया आणि त्यांच्या सर्व भागीदारांकडून एकूण पाच कोटी रुपयांच्या खंडणीची मागणी केली. मात्र, व्यापाऱ्याने या कॉलला तात्काळ कोणताही प्रतिसाद दिला नाही. धमकावल्याची गंभीर दखल घेत व्यापारी तात्काळ तक्रार देण्यासाठी फुरसुंगी पोलीस ठाण्यात गेले. ते पोलीस ठाण्यात हजर असतानाच, रात्री ८:१० वाजण्याच्या सुमारास हडपसरच्या दिशेने आलेल्या एका अज्ञात व्यक्तीने त्यांच्या सासवड रस्त्यावरील स्टील गोदामाच्या दिशेने थेट चार  गोळ्या झाडल्या आणि तो  सासवडच्या दिशेने फरार झाला.

घटनेची माहिती मिळताच स्थानिक पोलीस आणि गुन्हे शाखेच्या अधिकाऱ्यांनी तात्काळ घटनास्थळी धाव घेऊन पंचनामा केला. गोदामाच्या भिंतीवर आणि दारावर गोळ्या लागल्याचे निशाण स्पष्ट दिसत असून आहेत. दरम्यान, बिश्नोई गँगने फेसबुकवर या गोळीबाराचा  व्हिडिओ शेअर करत, "आमची मागणी हलक्यात घेतल्यामुळेच हा गोळीबार केला आहे", अशी उघड कबुली दिली आहे. या प्रकरणी फुरसुंगी पोलीस ठाण्यात गुन्हा दाखल करण्यात आला असून आरोपींचा माग काढण्यासाठी स्थानिक पोलीस आणि गुन्हे शाखेची विशेष पथके रवाना करण्यात आली आहेत. सोशल मीडियावरील त्या पोस्टची तांत्रिक पडताळणी सुरू असून लवकरच सत्य समोर येईल, असे पोलिसांकडून सांगण्यात आले.

• Labels: Pune Crime, Lawrence Bishnoi Gang, Fursungi Police, Firing Case Pune, Extortion Case

• Search Description: Shocking firing incident in Pune as Lawrence Bishnoi gang claims responsibility for attacking steel businessman Amol Chamadia's godown over Rs 5 crore extortion demand.

• Hashtags: #PuneCrime #LawrenceBishnoi #FiringInPune #PunePolice #CrimeNews #Extortion