आंबेनळी घाटात भीषण दुर्घटना: स्कॉर्पिओ १००० फूट खोल दरीत कोसळली; साताऱ्याच्या आजगाव येथील ८ तरुणांचा मृत्यू

 

विशेष प्रतिनिधी, महाबळेश्वर / पोलादपूर: महाबळेश्वर-पोलादपूर मार्गावरील अत्यंत धोकादायक मानल्या जाणाऱ्या आंबेनळी घाटात एक भीषण अपघात घडला आहे. सातारा जिल्ह्यातील आजगाव येथील आठ पर्यटकांची स्कॉर्पियो गाडी नियंत्रित सुटल्याने तब्बल १००० फूट खोल दरीत कोसळली. या दुर्दैवी अपघातात गाडीतील सर्वच्या सर्व म्हणजे आठही युवकांचा जागीच मृत्यू झाला आहे. ही घटना शनिवार, २४ मे रोजीच्या मध्यरात्री उशिरा दाबीळ गावच्या हद्दीत घडली. रविवारी सकाळपासून स्थानिक प्रशासन, पोलीस आणि रेस्क्यू टीमच्या वतीने युद्धपातळीवर शोधमोहीम राबवली जात आहे.

हर्णै बीचवरून परतताना काळाचा घाला

प्राप्त माहितीनुसार, सातारा तालुक्यातील आजगाव येथील आठ तरुण मित्र शुक्रवार, २३ मे रोजी रत्नागिरी जिल्ह्यातील दापोली येथील हर्णै बीचवर पर्यटनासाठी गेले होते. शनिवार, २४ मे रोजी दिवसभर फिरल्यानंतर रात्रीच्या सुमारास ते स्कॉर्पियो गाडीने पोलादपूर मार्गे साताऱ्याकडे आपल्या गावी परत जाण्यास निघाले. मात्र, मध्यरात्रीच्या सुमारास आंबेनळी घाटातील दाबीळ गावच्या हद्दीत चालकाचे गाडीवरील नियंत्रण सुटले आणि क्षणात घात झाला. अनियंत्रित झालेली स्कॉर्पियो थेट १००० फूट खोल दरीत कोसळली.

युद्धपातळीवर शोधकार्य 

दरी अत्यंत खोल आणि अंधार असल्याने सुरुवातीला प्रशासनाला अपघाताची माहिती मिळण्यास आणि मदतकार्य सुरू करण्यास अडचणी आल्या. रविवार सकाळपासून पोलादपूर पोलीस, महाबळेश्वर ट्रॅकर्स आणि सह्याद्री वन्यजीव रक्षक टीमने स्थानिक प्रशासनाच्या मदतीने दरीत उतरून शोधकार्य सुरू केले.

दरीच्या खोलीमुळे आणि दुर्गम रचनेमुळे मृतदेह वर आणण्यात मोठे अडथळे निर्माण होत आहेत. ताज्या माहितीनुसार, बचाव पथकाला आतापर्यंत दोन मृतदेह दरीतून बाहेर काढण्यात यश आले असून, उर्वरित ६ मृतदेह आणि अपघाती स्कॉर्पियो गाडी शोधण्याचे काम युद्धपातळीवर सुरू आहे. सर्व मृतदेह लोकेट (निश्चित) झाले असून त्यांना सुरक्षितपणे वर आणण्यासाठी रेस्क्यू टीम शर्थीचे प्रयत्न करत आहे. या घटनेमुळे साताऱ्याच्या आजगाव परिसरात संपूर्ण गावावर शोककळा पसरली आहे.

• Labels: Maharashtra News, Road Accident, Ambenali Ghat Accident, Satara News, Mahabaleshwar Poladpur Highway, Rescue Operation

• Search Description: Eight youths from Ajgaon, Satara, died in a horrific accident as their Scorpio car plunged 1000 feet into Ambenali Ghat near Mahabaleshwar while returning from Dapoli beach.

• Hashtags: #AmbenaliGhat #Mahabaleshwar #AccidentNews #Satara #Poladpur #BreakingNews #RescueOperation