सामाजिक न्यायासाठी प्रशासकीय यंत्रणांनी संवेदनशीलतेने काम करावे - ॲड. गोरक्ष लोखंडे

पिंपरी-चिंचवड महापालिकेत महाराष्ट्र राज्य अनुसूचित जाती-जमाती आयोगाची आढावा बैठक
मागासवर्गीय अधिकारी-कर्मचाऱ्यांच्या समस्यांवर तातडीने तोडगा काढण्याचे निर्देश
लाड-पागे समितीच्या शिफारशींची अंमलबजावणी करून अनुकंपा नियुक्त्या प्रलंबित ठेवू नका
सफाई कर्मचाऱ्यांच्या निवासाचा प्रश्न मार्गी लावण्याचे ॲड. लोखंडे यांचे आवाहन

पिंपरी, दि. ६ ऑगस्ट २०२५: शोषित आणि वंचित घटकांच्या उत्थानासाठी प्रशासकीय यंत्रणांनी सातत्यपूर्ण व संवेदनशीलतेने काम केल्यास खऱ्या अर्थाने सामाजिक न्याय साध्य होईल, असे प्रतिपादन महाराष्ट्र राज्य अनुसूचित जाती जमाती आयोगाचे सदस्य ॲड. गोरक्ष लोखंडे यांनी केले. पिंपरी चिंचवड महानगरपालिकेत आयोजित एका आढावा बैठकीत ते बोलत होते.

या बैठकीत महापालिकेतील मागासवर्गीय अधिकारी व कर्मचाऱ्यांच्या समस्या, दलित वस्ती रमाई घरकुल योजना आणि झोपडपट्टी पुनर्वसन प्रकल्पातील बाधित नागरिकांच्या अडचणी अशा विविध विषयांवर सविस्तर चर्चा झाली. या बैठकीला झोपडपट्टी निर्मूलन व पुनर्वसन प्राधिकरणाचे मुख्य कार्यकारी अधिकारी सतीश खडके, महापालिका अतिरिक्त आयुक्त विजयकुमार खोराटे आणि तृप्ती सांडभोर यांच्यासह अनेक अधिकारी व विविध संघटनांचे पदाधिकारी उपस्थित होते.

ॲड. लोखंडे यांनी प्रशासकीय यंत्रणांना निर्देश दिले की, लाड-पागे समितीच्या शिफारशी आणि अनुकंपा वारसांच्या नियुक्त्या प्रलंबित ठेवू नयेत. तसेच, यामध्ये काही अडचणी आल्यास त्या तात्काळ संबंधित व्यक्तीला कळवून त्या सोडवण्यासाठी मार्गदर्शन करावे. झोपडपट्टी पुनर्वसन प्रकल्पांमध्ये कोणतीही पात्र व्यक्ती लाभापासून वंचित राहणार नाही, याची काळजी घेण्याचे निर्देशही त्यांनी दिले. सफाई कर्मचाऱ्यांच्या निवासाचा प्रश्न सोडवण्यासाठी महापालिकेने पुढाकार घ्यावा, असे आवाहनही त्यांनी केले.

यावेळी बैठकीत रमाई स्मारकाच्या जागेचे आरक्षण, मागासवर्गीय कर्मचाऱ्यांची पदोन्नती आणि मिलिंदनगर पुनर्वसन प्रकल्पासह अनेक मागण्यांवर चर्चा झाली. ॲड. लोखंडे यांनी या सर्व सूचनांवर सकारात्मक कार्यवाही करण्याचे निर्देश प्रशासनाला दिले.

Maharashtra State Commission for SC/ST, Pimpri Chinchwad Municipal Corporation, Adv. Goraksh Lokhande, Social Justice, Dalit Basti, Slum Rehabilitation.

#PimpriChinchwad #SCSTCommission #SocialJustice #GorakshLokhande #DalitBasti #MunicipalCorporation