पुणे-पिंपरीतून जाणाऱ्या राष्ट्रीय महामार्ग ४८ चे रुंदीकरण करा - खासदार बारणे

खासदार श्रीरंग बारणे यांचे केंद्रीय मंत्री नितीन गडकरी यांना साकडे

पिंपरी, (प्रतिनिधी): पुणे आणि पिंपरी-चिंचवड शहरातून जाणाऱ्या राष्ट्रीय महामार्ग क्रमांक ४८ ची दुरवस्था झाली असून, रस्त्यांची रुंदी वाढवावी, उड्डाणपूल बांधावेत आणि नवीन डांबरीकरण करावे, अशी मागणी मावळचे शिवसेना खासदार श्रीरंग बारणे यांनी केंद्रीय रस्ते वाहतूक मंत्री नितीन गडकरी यांना केली आहे. वाढती वाहतूक कोंडी आणि अपघात कमी करण्यासाठी तातडीने उपाययोजना करण्याची विनंती त्यांनी केली.

खासदार बारणे यांनी दिल्लीत नितीन गडकरी यांची भेट घेतली आणि त्यांना या महामार्गाच्या सद्यस्थितीची माहिती दिली. ते म्हणाले की, पुणे शहरातून जाणारा हा महामार्ग महत्त्वाचा असला तरी कार्ला फाटा, वडगाव फाटा, तळेगाव फाटा आणि देहूरोड फाटा यांसारख्या ठिकाणी मोठ्या प्रमाणात वाहतूक कोंडी होते. उड्डाणपुलांची कमतरता आणि रस्त्याच्या अरुंदपणामुळे वाहतुकीची स्थिती अधिकच बिकट झाली आहे.

या मार्गाच्या सुधारणेमुळे पुणे शहरातून होणारी वाहतूक अधिक सुरळीत होईल आणि प्रवाशांना मोठा दिलासा मिळेल, असा विश्वास बारणे यांनी व्यक्त केला. तसेच, पिंपरी-चिंचवड शहराच्या हद्दीतील सेवा रस्त्यांचा विस्तार झाल्यास वाहतूक कोंडी कमी होण्यास मदत होईल, असेही त्यांनी सांगितले.

रस्त्यांवरील खड्डे, अरुंद लेन यामुळे वाढलेले अपघात आणि वाहतूक कोंडी कमी करण्यासाठी रस्त्याचे रुंदीकरण, नवीन डांबरीकरण आणि उड्डाणपुलांची निर्मिती यांसारख्या उपाययोजना त्वरित कराव्यात, अशी मागणी खासदार बारणे यांनी केली आहे.