इयत्ता ८वीच्या विद्यार्थ्याने १०वीच्या विद्यार्थ्याची केली हत्या

अहमदाबादमध्ये घडली धक्कादायक घटना

शिक्षणमंत्र्यांनी घटनेचा निषेध केला

अहमदाबाद : अहमदाबादमध्ये एक धक्कादायक घटना समोर आली आहे, जिथे एका खासगी शाळेतील इयत्ता ८वीच्या विद्यार्थ्याने इयत्ता १०वीच्या विद्यार्थ्यावर प्राणघातक हल्ला केला. उपचारादरम्यान पीडित विद्यार्थ्याचा मृत्यू झाल्याने पोलिसांनी अल्पवयीन आरोपीला ताब्यात घेतले आहे.

या घटनेची माहिती देताना, अहमदाबादचे सह पोलीस आयुक्त जयपालसिंह राठोड यांनी सांगितले की, काल रात्री पीडित विद्यार्थ्याचा उपचारादरम्यान मृत्यू झाला. पोलीस या प्रकरणाचा सखोल तपास करत आहेत.

दरम्यान, शिक्षण राज्यमंत्री प्रफुल्ल पानशेरिया यांनीही या घटनेचा निषेध केला आहे. त्यांनी सोशल मीडियावर एक संदेश जारी करून सांगितले की शिक्षण विभाग या घटनेचा अभ्यास करेल. श्री. पानशेरिया यांनी मुलांना धोकादायक खेळ आणि सोशल मीडियापासून दूर राहण्याचे आवाहनही केले आहे.