पिंपरी चिंचवड विकास आराखड्याविरोधात राष्ट्रवादी काँग्रेस आक्रमक: उच्च न्यायालयात दाद मागण्याचा इशारा

 

बहल यांचा गंभीर आरोप: पिंपरी चिंचवडचा विकास आराखडा हितसंबंध जपण्यासाठीच!

पिंपरी : पिंपरी चिंचवड महानगरपालिकेचा प्रारूप सुधारित विकास आराखडा २०२५ हा जनविरोधी आणि बेकायदेशीर असल्याचा आरोप करत राष्ट्रवादी काँग्रेस पिंपरी चिंचवड शहरने तीव्र आंदोलन छेडले आहे. हा आराखडा रद्द न झाल्यास उच्च न्यायालयात दाद मागण्याचा इशारा शहराध्यक्ष योगेश बहल यांनी दिला आहे. काही विशिष्ट हितसंबंध जपण्यासाठीच हा आराखडा तयार करण्यात आल्याचा गंभीर आरोपही बहल यांनी केला आहे. या जनविरोधी धोरणांविरोधात गुरुवारी, ७ ऑगस्ट २०२५ रोजी महापालिका भवनावर महामोर्चाचे आयोजन करण्यात आले आहे.

 बहल यांनी आज मंगळवारी पत्रकार परिषदेत ही माहिती दिली.पत्रकार परिषदेस शहराध्यक्ष योगेश बहल, माजी नगरसेवक अजित गव्हाणे, माजी विरोधी पक्षनेते विठ्ठल उर्फ नाना काटे, महिला अध्यक्ष कविता आल्हाट, माजी नगरसेवक व ज्येष्ठ नेते भाऊसाहेब भोईर, राहुल भोसले, मयूर कलाटे, कार्याध्यक्ष शाम लांडे, फजल शेख, पंकज भालेकर,प्रभाकर वाघेरे, माजी नगरसेविका माया बारणे, प्रकाश सोमवंशी, सतीश दरेकर,जगन्नाथ साबळे, मायला खत्री,संजय उदावंत, रवींद्र ओव्हाळ, अक्षय माच्छरे आदी पदाधिकारी उपस्थित होते.

यावेळी बोलताना बहल म्हणाले,  आराखड्यात अनेक गंभीर त्रुटी आणि अनियमितता असून, तो शहरातील जनतेच्या भावना, कायदेशीर बाबी आणि विकासाच्या वास्तवाशी पूर्णपणे विसंगत आहे. तब्बल ५०,००० नागरिकांनी या आराखड्यावर हरकती घेतल्या आहेत, जे या आराखड्याच्या जनविरोधी स्वरूपाची साक्ष देतात. भूमिपुत्र, शेतकरी, छोटे कारखानदार आणि सामान्य नागरिकांच्या अपेक्षा पूर्ण करण्यात हा आराखडा सपशेल अपयशी ठरला आहे.

राष्ट्रवादी काँग्रेसने या आराखड्याला 'केवळ कागदावरचा देखावा' असे संबोधले आहे. जुन्या आराखड्यातील ८०० हून अधिक आरक्षणे कोणतीही फेरबदल न करता तशीच ठेवण्यात आली आहेत, तर केवळ २०.८% आरक्षित जागांचाच विकास झाला आहे. १,१०० हून अधिक जागा अविकसित राहिल्या किंवा त्यावर अनधिकृत बांधकामे झाली आहेत, ज्यामुळे आराखड्याची व्यवहार्यता धोक्यात आली आहे.

'भीमसृष्टी मैदान'वरील धक्कादायक आरक्षणे, रेडझोन आणि पूररेषेतील प्रतिबंधित क्षेत्रांमध्ये बांधकामयोग्य आरक्षणे प्रस्तावित करणे, पूररेषांच्या आखणीतील हेतुपुरस्सर बदल, ३५ वर्षांपासून कागदावरच असलेला HCMTR प्रकल्प, पिंपरी कॅम्प गावठाण मागणीकडे दुर्लक्ष, आणि अधिकृत बांधकामेही धोक्यात येणे यांसारख्या अनेक गंभीर त्रुटी या आराखड्यात आहेत. महिला, किशोरवयीन मुली, अपंग व्यक्ती आणि वृद्धांसाठी सार्वजनिक शौचालये आणि युरीनल्ससाठी कोणतीही तरतूद नसणे ही देखील एक मोठी चूक आहे.

या आराखड्यामुळे अनेक वैधानिक नियम आणि कायदेशीर आदेशांचे उल्लंघन होत असून, तो पूर्णपणे बेकायदेशीर ठरतो. पारदर्शकतेचा अभाव, आर्थिक अव्यवहार्यता, कुचकामी नियोजन, पक्षपातीपणा आणि अपूर्ण माहिती यामुळे हा आराखडा शहराच्या विकासाऐवजी समस्यांमध्ये भर घालत आहे. राष्ट्रवादी काँग्रेसने नागरिकांना या महामोर्चात मोठ्या संख्येने सहभागी होऊन आपल्या हक्कांसाठी आवाज उठवण्याचे आवाहन केले आहे. हा मोर्चा शगुन चौक, पिंपरी येथून पुणे-मुंबई महामार्गाने महापालिका भवनावर धडकणार आहे.

 Pimpri Chinchwad, Development Plan, NCP, Protest, High Court, Yogesh Bahal

 #PimpriChinchwad #DevelopmentPlan #NCP #Protest #HighCourt #YogeshBahal #MarathiNews #UrbanPlanning #Pune