मावळचे खासदार श्रीरंग बारणे कॉन्स्टिट्यूशन क्लबच्या निवडणुकीत विजयी

सर्वपक्षीय संबंधांमुळे श्रीरंग बारणे यांना निवडणुकीत फायदा

राजीवप्रताप रुडी यांची सचिवपदी निवड; महाराष्ट्रातून बारणे एकमेव विजयी

उरण, (प्रतिनिधी): मावळ लोकसभा मतदारसंघाचे शिवसेना खासदार श्रीरंग बारणे यांनी दिल्लीतील प्रतिष्ठित 'कॉन्स्टिट्यूशन क्लब'च्या निवडणुकीत विजय मिळवला आहे. लोकसभा आणि राज्यसभेच्या विद्यमान व माजी खासदारांसाठी असलेल्या या क्लबच्या कार्यकारी सदस्यपदाच्या निवडणुकीत बारणे हे महाराष्ट्रातून एकमेव विजयी उमेदवार ठरले आहेत. सर्वपक्षीय खासदारांशी असलेल्या त्यांच्या उत्तम संबंधांमुळे त्यांना या निवडणुकीत मोठा फायदा झाला.

कॉन्स्टिट्यूशन क्लबच्या २०१९-२०२५ या कालावधीसाठी झालेल्या निवडणुकीत १२ ऑगस्ट रोजी मतदान झाले. यात एकूण ६६९ विद्यमान व माजी खासदारांनी सहभाग घेतला. या निवडणुकीत सचिवपदासाठी राजीवप्रताप रुडी आणि संजीव बालियान यांच्यात झालेल्या लढतीत रुडी विजयी झाले. सदस्यपदाच्या ११ जागांसाठी १४ उमेदवार रिंगणात होते.

या विजयानंतर खासदार श्रीरंग बारणे म्हणाले की, "ही निवडणूक पक्षविरहित असते. सर्वच पक्षांतील खासदारांशी असलेल्या संबंधांचा मला फायदा झाला. सर्वांनी माझ्यावर विश्वास दाखवून मला काम करण्याची संधी दिली." क्लबच्या माध्यमातून खासदारांच्या गरजा व अपेक्षा लक्षात घेऊन नवे उपक्रम राबवले जातील, असेही त्यांनी सांगितले.

केंद्रीय गृहमंत्री अमित शहा, भाजप अध्यक्ष जे.पी. नड्डा, काँग्रेस नेत्या सोनिया गांधी, काँग्रेस अध्यक्ष मल्लिकार्जुन खर्गे यांच्यासह अनेक दिग्गज नेत्यांनी या मतदानात सहभाग घेतला.