सीआयएसएफ युनिट जेएनपीएतर्फे खासगी एजन्सीसाठी मूलभूत बंदर सुरक्षा प्रशिक्षण सुरू

अतिरिक्त महासंचालक पद्माकर रणपिसे यांच्या हस्ते प्रशिक्षणाचे उद्‌घाटन
प्रशिक्षणात मालवाहू सुरक्षा, सायबर धोके आणि तस्करीसारख्या आव्हानांवर लक्ष
४० सहभागींना संकट प्रतिसाद आणि आंतर-समन्वयाचे व्यापक प्रशिक्षण दिले जाणार

उरण, (प्रतिनिधी): सीआयएसएफ युनिट जेएनपीए शेवा येथे खासगी एजन्सीसाठी दोन आठवड्यांचे पहिले मूलभूत बंदर सुरक्षा प्रशिक्षण सुरू झाले आहे. या प्रशिक्षणाचे उद्‌घाटन सीआयएसएफचे अतिरिक्त महासंचालक (दक्षिण) पद्माकर संतू रणपिसे यांच्या हस्ते झाले. यावेळी जेएनपीएचे अध्यक्ष उन्मेष वाघ आणि अन्य वरिष्ठ अधिकारी उपस्थित होते.

भारतीय बंदरांच्या विशिष्ट सुरक्षा आव्हानांना तोंड देण्यासाठी हा प्रशिक्षण अभ्यासक्रम तयार करण्यात आला आहे. यामध्ये प्रवेश नियंत्रण, मालवाहू सुरक्षा तसेच सायबर धोके आणि तस्करी यांसारख्या आव्हानांवर लक्ष केंद्रित करण्यात आले आहे.

पुढील दोन आठवड्यांमध्ये पर्यवेक्षक आणि इतर पदांवर असलेल्या ४० सहभागींना ऑपरेशनल प्रक्रिया, वर्तन ओळखण्याचे तंत्र, संकट प्रतिसाद आणि आंतर-समन्वय यावर व्यापक प्रशिक्षण दिले जाईल. या प्रशिक्षणाचा उद्देश केवळ कार्यपद्धती शिकवणे नसून, सीआयएसएफ आणि खासगी सुरक्षा कर्मचाऱ्यांमध्ये एक समान सुरक्षा संस्कृती निर्माण करणे हा आहे.