इंडिया आघाडीचे उपराष्ट्रपतीपदाचे उमेदवार बी. सुदर्शन रेड्डी यांचा उमेदवारी अर्ज दाखल

माजी सरन्यायाधीश रेड्डी यांनी गांधी पुतळ्याला अभिवादन करून अर्ज भरला

मल्लिकार्जुन खरगे, सोनिया गांधी आणि राहुल गांधी यांच्यासह अनेक नेते उपस्थित

उपाध्यक्षपदासाठी ९ सप्टेंबर रोजी मतदान होणार

नवी दिल्ली, (वृत्तसंस्था): इंडिया आघाडीचे उपराष्ट्रपतीपदाचे उमेदवार आणि सर्वोच्च न्यायालयाचे माजी न्यायमूर्ती बी. सुदर्शन रेड्डी यांनी आज आपला उमेदवारी अर्ज दाखल केला. यावेळी काँग्रेसचे राष्ट्रीय अध्यक्ष मल्लिकार्जुन खरगे, सोनिया गांधी, राहुल गांधी, ज्येष्ठ नेते शरद पवार, रामगोपाल यादव यांच्यासह आघाडीतील अनेक प्रमुख नेते उपस्थित होते.

उमेदवारी अर्ज दाखल करण्यापूर्वी न्यायमूर्ती रेड्डी यांनी संसद भवन संकुलातील प्रेरणा स्थळावर जाऊन महात्मा गांधी यांच्या पुतळ्याला अभिवादन केले. दुसरीकडे, राष्ट्रीय लोकशाही आघाडीकडून (एनडीए) सी. पी. राधाकृष्णन यांनी याआधीच आपला उमेदवारी अर्ज दाखल केला आहे.

या अर्जांची छाननी उद्या होणार असून, २५ ऑगस्टपर्यंत अर्ज मागे घेता येईल. उपराष्ट्रपतीपदासाठी ९ सप्टेंबरला मतदान होणार आहे.