पुण्यात ५० लाखांची खंडणी मागणाऱ्याला १२ तासांत अटक

 

व्हॉट्सॲप कॉल आणि धमकीचा वापर करून चालणारे रॅकेट उघड

पुणे, (प्रतिनिधी): पुण्यातील मुंढवा पोलिसांनी एका व्यावसायिकाकडे व्हॉट्सॲप कॉलवरून ५० लाख रुपयांची खंडणी मागणाऱ्या आरोपीला गुन्हा दाखल झाल्याच्या अवघ्या १२ तासांत अटक केली आहे. आरोपीने "पैसे दिले नाहीस तर खून करीन" अशी धमकीही दिली होती. अनिकेत अनिल पावल (वय २४, रा. घोरपडी, पुणे) असे अटक करण्यात आलेल्या आरोपीचे नाव आहे.

२६ जुलै ते २९ जुलै २०२५ या कालावधीत फिर्यादी यांना एका अनोळखी व्हॉट्सॲप नंबरवरून कॉल येत होते. आरोपीने "तू खूप पैसे कमावले आहेत, मला ५० लाख रुपये खंडणी पाहिजे. नाहीतर मी तुझा खून करीन" अशी धमकी दिली. आरोपी फिर्यादीवर पाळत ठेवत असल्याचेही समजले. यानंतर घाबरलेल्या फिर्यादीने मुंढवा पोलीस स्टेशनमध्ये तक्रार दाखल केली.

गुन्ह्याचे गांभीर्य लक्षात घेऊन पोलिसांनी तातडीने तपास सुरू केला. गुन्हा दाखल झाल्यानंतर आरोपीने त्याचा मोबाईल फोन बंद करून पलायन केले होते, ज्यामुळे त्याला शोधण्यात अडथळे येत होते. मात्र, तपास पथकातील पोलीस अंमलदार अक्षय धुमाळ आणि स्वप्नील रासकर यांना आरोपी फिर्यादीला भेटण्यासाठी घोरपडी येथे येणार असल्याची गुप्त माहिती मिळाली.

या माहितीच्या आधारे पोलिसांनी सापळा रचून आरोपी अनिकेत पावलला ३० जुलै २०२५ रोजी अटक केली. ही कामगिरी अपर पोलीस आयुक्त मनोज पाटील, पोलीस उपायुक्त राजकुमार शिंदे आणि सहाय्यक पोलीस आयुक्त अनुराधा उद्द्मले यांच्या मार्गदर्शनाखाली मुंढवा पोलीस स्टेशनचे वरिष्ठ पोलीस निरीक्षक माया देवरे आणि त्यांच्या पथकाने यशस्वीरित्या पार पाडली.

• Pune Police

• Extortion Case

• Mundhwa Police Station

• Arrest

#PunePolice #Extortion #MundhwaPolice #CrimeNews #Arrest #PuneCity #Justice