महामेट्रोच्या कामामुळे निगडी-चिंचवड रस्ता बनला मृत्यूचा सापळा; माजी नगरसेवक विजय शिंदे यांचा मेट्रो प्रशासनावर हल्लाबोल

मोठे खड्डे, धूळ आणि कोंडीने नागरिक त्रस्त; तीव्र आंदोलनाचा इशारा

पिंपरी-चिंचवड, (प्रतिनिधी): पिंपरी-चिंचवड शहराच्या विकासासाठी महत्त्वाकांक्षी असलेल्या महामेट्रोच्या कामामुळे आता नागरिक त्रस्त झाले आहेत. भक्ती-शक्ती चौक, निगडी ते चिंचवड स्टेशन चौक या मार्गावर सुरू असलेल्या कामामुळे रस्त्याची दुरवस्था झाली असून, हा रस्ता अपघातांना निमंत्रण देणारा 'मृत्यूचा सापळा' बनला आहे. या गंभीर परिस्थितीवर माजी नगरसेवक विजय शिंदे यांनी मेट्रो आणि महापालिका प्रशासनावर जोरदार हल्लाबोल करत तीव्र आंदोलन छेडण्याचा इशारा दिला आहे.

विजय शिंदे यांनी महापालिकेचे सह शहर अभियंता बापूसाहेब गायकवाड यांच्यासह मेट्रोच्या वरिष्ठ अधिकाऱ्यांसोबत या रस्त्यांची प्रत्यक्ष पाहणी केली. यावेळी त्यांनी, "मेट्रोचा हा मनमानी कारभार थांबला पाहिजे. नागरिकांच्या जिवाशी खेळण्याचा अधिकार तुम्हाला कोणी दिला?" अशा कठोर शब्दांत आपला संताप व्यक्त केला.

मेट्रोच्या कामामुळे रस्त्यावर ठिकठिकाणी खड्डे पडले आहेत, जे वेळेवर बुजवले जात नाहीत. यामुळे दुचाकीस्वार घसरून पडण्याचे प्रकार वाढले असून, वाहनांचे मोठे नुकसान होत आहे. हा रस्ता औद्योगिक वसाहती, शैक्षणिक संस्था आणि रुग्णालयांना जोडणारा असल्याने दररोज हजारो वाहने यावरून ये-जा करतात.

मेट्रोच्या कामामुळे रस्ता अरुंद झाल्याने वाहतूक कोंडीची समस्याही गंभीर झाली आहे. सकाळी आणि संध्याकाळी कामाच्या वेळी ही कोंडी अधिक त्रासदायक ठरत आहे. विशेषतः पावसाळ्यापूर्वी रस्त्याची दुरुस्ती न झाल्याने पालखी सोहळ्यादरम्यान वारकऱ्यांची मोठी गैरसोय झाली. त्यांना चिखल आणि साचलेल्या पाण्यातून जावे लागले, ज्यामुळे प्रशासनाची असंवेदनशीलता दिसून येते.

विजय शिंदे यांनी प्रशासनाला तातडीने रस्त्याची दुरुस्ती करण्याची मागणी केली असून, जर या मागण्या मान्य झाल्या नाहीत, तर तीव्र आंदोलन करण्याचा इशारा दिला आहे.