भारती विद्यापीठ पोलिसांनी एका अल्पवयीनाला ताब्यात घेत ४ वाहनचोरीचे गुन्हे उघडकीस आणले

पुणे, दि. २४ जुलै - भारती विद्यापीठ पोलिसांनी वाहनचोरीच्या गुन्ह्यांमध्ये मोठ्या कारवाई करत, एका अल्पवयीन मुलाला ताब्यात घेतले आहे. त्याच्याकडून चार चोरीच्या दुचाकी जप्त करण्यात आल्या असून, त्यामुळे भारती विद्यापीठ, सिंहगड रोड आणि नांदेड सिटी पोलीस ठाण्यांमधील चार वाहनचोरीचे गुन्हे उघडकीस आले आहेत.

भारती विद्यापीठ पोलीस ठाण्याचे वरिष्ठ पोलीस निरीक्षक राहुलकुमार खिलारे यांनी तपास पथकातील अधिकारी आणि अंमलदार यांना वाहनचोरांचा शोध घेण्याबाबत सूचना दिल्या होत्या. त्यानुसार, पोलीस उपनिरीक्षक निलेश मोकाशी आणि तपास पथकातील पोलीस अंमलदार मंगेश गायकवाड, किरण साबळे यांनी शोधमोहीम राबवली.

या कारवाईदरम्यान, त्यांना भारती विद्यापीठ पोलीस ठाण्यातील गु.र.नं. ३४५/२०२५, भारतीय न्याय संहिता कलम ३०३ (२) नुसार चोरीला गेलेली एमएच१२एनआर३०१२ क्रमांकाची दुचाकी असलेल्या एका अल्पवयीन मुलाला ताब्यात घेण्यात आले. त्याच्याकडे अधिक तपासणी केली असता, त्याच्याकडून आणखी तीन दुचाकी जप्त करण्यात आल्या. यामध्ये भारती विद्यापीठ पोलीस ठाण्यातील गु.र.नं. ३४७/२०२५ नुसार दाखल असलेला एक गुन्हा, सिंहगड रोड पोलीस ठाण्यातील वाहनचोरीचा एक गुन्हा आणि नांदेड सिटी पोलीस ठाण्यातील वाहनचोरीचा एक गुन्हा, असे एकूण चार गुन्हे उघडकीस आले आहेत.