खेळाडू कोट्यातील रिक्त जागांवर प्रवेशाबाबत नियमात बदल करणार - क्रीडा व युवक कल्याण मंत्री दत्तात्रय भरणे

पुणे: क्रीडा क्षेत्रात येणाऱ्या अडचणी सोडवण्यासाठी राज्यशासन प्रयत्नशील असून, महाविद्यालयांमध्ये खेळाडू कोट्यातील रिक्त जागांवर खेळाडूंना प्रवेशाबाबत नियमात आवश्यक ते बदल करण्यात येतील, असे प्रतिपादन राज्याचे क्रीडा व युवक कल्याण मंत्री दत्तात्रय भरणे यांनी केले.

मॉडर्न कला, विज्ञान व वाणिज्य महाविद्यालय येथे प्रोग्रेसिव्ह एज्युकेशन सोसायटीच्या सभागृहात आयोजित क्रीडा पारितोषिक वितरण समारंभात ते बोलत होते. यावेळी आंतरराष्ट्रीय क्रिकेटपटू केदार जाधव, प्रोग्रेसिव्ह एज्युकेशन सोसायटीचे कार्याध्यक्ष डॉ. गजानन एकबोटे, सहकार्यवाहक डॉ. ज्योत्स्ना एकबोटे, उपकार्यवाहक प्रा. निवेदिता एकबोटे, सचिव प्रा. शामाकांत देशमुख, मॉडर्न महाविद्यालयाचे प्राचार्य डॉ. राजेंद्र झुंजारराव, डॉ. विक्रम फाले, प्रा. दीपक कुटे, शिक्षक व शिक्षकेतर कर्मचारी, खेळाडू, विद्यार्थी, पालक आदी उपस्थित होते.

विद्यार्थ्यांना महत्त्वाचे मार्गदर्शन

मंत्री दत्तात्रय भरणे यांनी विद्यार्थ्यांना यशासाठी प्रबळ इच्छाशक्ती आणि ध्येयाने प्रेरित होऊन वाटचाल करण्याचा सल्ला दिला. ते म्हणाले, "नेहमी धाडस करून नवनवीन वाटा शोधल्या पाहिजेत. विद्यार्थ्यांनी आई-वडिलांचे स्वप्न पूर्ण करण्यासाठी काम करावे आणि आपल्यापेक्षा वयाने मोठ्या व्यक्तीची आदरपूर्वक सेवा करावी. आयुष्यात मोठ्यामोठ्या संधी उपलब्ध होतात, त्या संधींचे सोने करा. अहंकार बाजूला ठेवून जीवनात नेहमी आनंदी राहा."

केदार जाधव यांनी खेळाडूंच्या अंगी संघर्ष करण्याची स्वयंशिस्त लागते असे नमूद केले. ते म्हणाले, "खेळाडूंकरिता प्रामाणिकपणा, संयम आणि आत्मविश्वास महत्त्वाचा आहे. खेळात निराश होऊ नका, नेहमी मोठी स्वप्ने पाहा, संधीचे सोने करा, कष्ट करत राहा, एक दिवस निश्चित यश मिळेल."

क्रीडा कोटा नियमात बदलाची मागणी

जाधव यांनी क्रीडा क्षेत्राला योगदान देण्यासाठी महाविद्यालयात खेळाडू कोट्यासाठी आरक्षित जागेवरच खेळाडूंना प्रवेश मिळावा आणि जागा रिक्त राहणार नाहीत, यासाठी नियमात बदल होणे आवश्यक असल्याचे सुचवले. शालेय जीवनापासून क्रीडा क्षेत्राला प्रोत्साहन दिल्यास राज्याचे आणि देशाचे नाव उज्ज्वल होण्यास मदत होईल, असेही ते म्हणाले. आगामी काळात खेळाडूंच्या अडचणी सोडवण्यासाठी आपण नेहमीच काम करत राहील, असे आश्वासन जाधव यांनी दिले.

डॉ. गजानन एकबोटे यांनी सांगितले की, प्रोग्रेसिव्ह एज्युकेशन सोसायटीने विद्यार्थ्यांनी शिक्षणासोबतच क्रीडा क्षेत्रात उल्लेखनीय कामगिरी करण्याच्या दृष्टीने नेहमीच क्रीडा क्षेत्राला प्रोत्साहन दिले आहे. क्रीडा क्षेत्राकडे पाहण्याचा दृष्टिकोन बदलत असून, या क्षेत्रातही रोजगाराच्या संधी उपलब्ध आहेत, असे त्यांनी नमूद केले. संस्थेला स्वायत्त संस्थेचा दर्जा असून, क्रीडा क्षेत्रात नवनवीन उपक्रम राबवून भरीव योगदान देण्याकरिता संस्थेने प्रयत्नशील राहावे, असे आवाहन डॉ. एकबोटे यांनी केले.

डॉ. निवेदिता एकबोटे यांनी सांगितले की, महाविद्यालयातील गुणवंत विद्यार्थ्यांमधील कला, क्रीडा आणि सांस्कृतिक गुणांना प्रोत्साहन देण्यासाठी शिक्षणासोबतच क्रीडा, कलाविषयक आदी स्पर्धा आयोजित केल्या जातात. या स्पर्धांच्या माध्यमातून विद्यार्थ्यांचे आयुष्य घडवण्यासाठी संस्था नेहमीच प्रयत्नशील आहे.

यावेळी डॉ. ज्योत्स्ना एकबोटे आणि प्राचार्य डॉ. राजेंद्र झुंजारराव यांनीही आपले विचार व्यक्त केले. कार्यक्रमात मान्यवरांच्या हस्ते खेळाडूंना पारितोषिकांचे वितरण करण्यात आले.

Dattatray Bharane, Sports Quota Admissions, College Sports, Kedar Jadhav, Progressive Education Society, Modern College Pune, Youth Welfare, Sports Policy

#DattatrayBharane #SportsQuota #CollegeAdmissions #KedarJadhav #PuneSports #ModernCollege #YouthWelfare #MaharashtraGovernment