मुंबई, १६ जुलै २०२५: मुंबईच्या उपनगरीय रेल्वे प्रवासादरम्यान गेल्या तीन वर्षांत साडेसात हजारपेक्षा जास्त प्रवाशांनी जीव गमावला असून, सुमारे ७ हजार ३०० जण जखमी झाले आहेत, अशी धक्कादायक माहिती परिवहन मंत्री प्रताप सरनाईक यांनी आज विधानसभेत दिली. आमदार अतुल भातखळकर यांनी मुंब्रा-कळवा स्थानकांदरम्यान झालेल्या अपघातासंदर्भात उपस्थित केलेल्या लक्षवेधी सूचनेला उत्तर देताना त्यांनी हे विधान केले.
टास्क फोर्स नेमून गर्दी कमी करण्याचा प्रयत्न
लोकलवरील प्रचंड भार कमी करण्यासाठी सरकारी कार्यालयांप्रमाणेच खासगी आस्थापनांच्या वेळेत बदल कसा करता येईल, याचा अभ्यास करण्यासाठी एक टास्क फोर्स स्थापन करण्याचे आश्वासन मंत्री सरनाईक यांनी दिले. यामुळे गर्दीच्या वेळी प्रवाशांवरील ताण कमी होण्याची अपेक्षा आहे.
लोकलची संख्या वाढवणार, बंद दरवाजे बसवणार
प्रवासी सुरक्षा वाढवण्यासाठी लोकलची संख्या वाढवण्यावर आणि लोकल गाड्यांना बंद होणारे दरवाजे बसवण्यावर सरकार गांभीर्याने विचार करत आहे. या संदर्भात मुख्यमंत्री देवेंद्र फडणवीस यांची रेल्वेमंत्री अश्विनी वैष्णव यांच्याशी सकारात्मक चर्चा सुरू असून, लवकरच यावर निर्णय घेतला जाईल, असेही सरनाईक यांनी सांगितले.
मेट्रोनेही लोकलवरील भार कमी झाला नाही
मुंबई मेट्रोपॉलिटन क्षेत्रात मेट्रोचे जाळे वाढल्यामुळे लोकलवरील भार कमी होईल अशी अपेक्षा होती, मात्र या भागात वाढणाऱ्या लोकसंख्येमुळे तसे चित्र दिसत नाही, अशी कबुलीही त्यांनी दिली. लोकल ही मुंबईची जीवनवाहिनी असली, तरी पॉड टॅक्सी, मेट्रो आणि जलवाहतूक यांसारखे वाहतुकीचे इतर पर्याय वेगाने उपलब्ध करून देण्याचे काम सुरू असल्याचे आश्वासन त्यांनी दिले.
सरकार प्रवासी सुरक्षेसाठी वचनबद्ध
या चर्चेत काँग्रेस आमदार नाना पटोले यांनी सरकारचे पर्याय काल्पनिक असून, बंद दरवाज्यांमुळे प्रवाशांचा जीव चिरडून जाईल, अशी टीका केली. त्यावर मंत्री सरनाईक यांनी रेल्वे प्रवाशांच्या सुरक्षेसाठी सरकार वचनबद्ध असल्याची ग्वाही देत, चर्चेचा समारोप केला.
Mumbai Locals, Mumbai Suburban Rail, Pratap Sarnaik, Maharashtra Assembly, Passenger Safety, Mumbai Transport, Train Accidents
#MumbaiLocal #Mumbai #PratapSarnaik #MaharashtraAssembly #TrainSafety #MumbaiTransport #SuburbanRailway
Reviewed by ANN news network
on
७/१६/२०२५ ०५:११:०० PM
Rating:
कोणत्याही टिप्पण्‍या नाहीत: