विविध मागण्यांच्या पूर्ततेसाठी सकल लिंगायत समाज तर्फे वाशी येथे निषेध आंदोलन

स्वतंत्र महामंडळासाठी ५०० कोटी निधीची मागणी

उरण : महाराष्ट्र राज्यातील प्रत्येक समाजाच्या सामाजिक, आर्थिक आणि सांस्कृतिक विकासासाठी स्वतंत्र महामंडळे स्थापन करून मोठ्या प्रमाणात निधी दिला जात असताना, लिंगायत समाजाला मात्र महामंडळाच्या लाभापासून वंचित ठेवण्यात आले आहे. या अन्यायाविरोधात आज सकल लिंगायत समाजातर्फे छत्रपती शिवाजी महाराज चौक, वाशी, नवी मुंबई येथे एकत्र येत तीव्र निषेध आंदोलन करण्यात आले.

लिंगायत समाजावर होत असलेला अन्याय

इतर मागास बहुजन कल्याण विकास महामंडळ अंतर्गत 'जगतज्योती महात्मा बसवेश्वर आर्थिक विकास महामंडळ (उपकंपनी)' म्हणून स्थापन करण्यात आले होते. परंतु, या महामंडळाचा लाभ केवळ लिंगायत समाजातील ओबीसी प्रवर्गात येणाऱ्या सुमारे ५% लोकांनाच होतो. महाराष्ट्रात लिंगायत समाजाचा ९५% भाग हा खुल्या (ओपन) प्रवर्गात येत असल्याने त्यांना या महामंडळाचा लाभ घेता येत नाही. तसेच, या महामंडळासाठी केवळ ५० कोटी रुपयांची तरतूद केली असल्यामुळे समाजाेपयोगी उपक्रम राबवण्यासाठी आणि समाजाचा विकास करण्यासाठी ही रक्कम अपुरी ठरत आहे. त्यामुळे लिंगायत समाज, विविध संघटना आणि संस्थांनी ५०० कोटी रुपयांच्या निधीची तरतूद करण्याची मागणी केली आहे.

सत्ताधारी आणि विरोधी पक्षातील आमदारांनीही विषय मांडला

सत्ताधारी व विरोधी पक्षातील आमदारांनी देखील सातत्याने हा विषय सभागृहात मांडूनही स्वतंत्र महामंडळ स्थापन होत नसल्यामुळे सरसकट लिंगायत समाजाला 'जगतज्योती महात्मा बसवेश्वर लिंगायत आर्थिक विकास महामंडळाचा' लाभ मिळत नाही. यामुळे महाराष्ट्रातील लिंगायत समाजात सरकारविरोधी प्रचंड असंतोष पसरला आहे. या असंतोषाला वाट मोकळी करून देण्यासाठी आज वाशी येथे निषेध आंदोलन करण्यात आले.

स्वतंत्र महामंडळाची मुख्य मागणी

सकल लिंगायत समाजाची मुख्य मागणी आहे की, लवकरात लवकर हिंदू-लिंगायत, हिंदू-लिंगायत (वाणी), जंगम, तेली, माली, पंचम, बनजगे अशा सर्व जातींना 'जगतज्योती महात्मा बसवेश्वर आर्थिक विकास महामंडळाचा' लाभ घेता यावा असे स्वतंत्र महामंडळ स्थापन करून ५०० कोटी रुपयांची निधीची तरतूद करावी.

इशारा आणि उपस्थिती

या मागण्यांची पूर्तता न झाल्यास येणाऱ्या काळात संपूर्ण महाराष्ट्रात आणखी तीव्र आंदोलने करण्यात येतील, असा इशारा यावेळी देण्यात आला. या आंदोलनावेळी लिंगायत समाजाचे महेश कोटीवाले, सिद्धाराम शिलवंत, नीलकंठ बिजलगावकर, आनंद गवी, राम लिंगया, सुनील पाटील, अशोक बिराजदार, शंकर संकपाळ, शशी बबलाद, चंद्रशेखर स्वामी, महांतेश बुक्का, स्मिता दमामे, सुवर्णा भद्रे, सुरेखा कोटीवाले, ऐश्वर्या बद्रे, गीता शिलवंत, बिराण्णा बिराजदार, रमेश बैरामडगी, सुनील स्वामी तसेच लिंगायत समाजातील अनेक बंधू-भगिनी मोठ्या संख्येने उपस्थित होते.

Lingayat Community, Protest, Vashi, Navi Mumbai, Independent Corporation, Economic Development, Funding Demand, Maharashtra Government, Social Justice, OBC Reservation, Chhatrapati Shivaji Maharaj Chowk

#LingayatSamaj #Protest #Vashi #NaviMumbai #Maharashtra #IndependentCorporation #SocialJustice #Lingayat #FundDemand