पुणे पोलिसांची अवैध दारू अड्ड्यांवर धडक कारवाई!

अवैध धंद्यांचे समूळ उच्चाटन करणार: डीसीपी सोमय मुंडे

पुणे: पुणे शहर पोलीस आयुक्त कार्यालयाच्या जनसंपर्क विभागाने दिलेल्या माहितीनुसार, पुणे पोलिसांच्या झोन ४ कार्यालयाने अवैध दारू तयार करणाऱ्या अड्ड्यांवर आणि देशी-विदेशी दारूची अवैध विक्री करणाऱ्यांवर मोठी कारवाई केली आहे. पोलीस उप-आयुक्त, परिमंडळ ४, पुणे शहर, श्री. सोमय मुंडे यांनी अवैध धंद्यांवर प्रभावी कारवाई करून त्यांचे समूळ उच्चाटन करण्याचे आदेश दिले होते.

या आदेशांनुसार, २५ जुलै २०२५ रोजी "मासरेड" चे आयोजन करून परिमंडळ ४ च्या हद्दीत लपून-छपून हातभट्टी दारू तयार करणाऱ्या ठिकाणांवर छापे टाकण्यात आले. या कारवाईत हातभट्टी दारू तयार करणारे आणि देशी-विदेशी दारूची अवैध विक्री करणाऱ्या एकूण १६ लोकांवर १६ गुन्हे दाखल करण्यात आले आहेत. पोलिसांनी

४०,७६०/− रुपयांचा मुद्देमाल जप्त केला आहे, ज्यात २०,५४०/− रुपये किमतीची २०५ लिटर गावठी हातभट्टी दारू आणि १२,५००/− रुपये किमतीचे २५० लिटर रसायन जागेवरच नष्ट करण्यात आले.

ही मोहीम राबवण्यासाठी २९ पोलीस अधिकारी, ९५ पोलीस अंमलदार आणि ०२ आरसीपी प्लाटूनची विशेष पथके तयार करण्यात आली होती. पोलीस उप-आयुक्त परिमंडळ ४ च्या हद्दीतील विविध पोलीस ठाण्यांच्या हद्दीतील डोंगराळ भागात आणि नदी परिसरात लपून-छपून हातभट्टी तयार करून त्याची साठवणूक व विक्री करणाऱ्यांवर तसेच देशी-विदेशी मद्याची अवैध विक्री व्यवसाय करणाऱ्यांवर ही कारवाई करण्यात आली.